2 Salaateen 12
1vah israaeel kay baadshaah yaahoo kee hukoomat kay saatven saal men yahoodaah ka baadshaah bana, aur yarooshalam men us kee hukoomat ka dauraaniya 40 saal tha. us kee maan zibiyaah bair-saba kee rahenay vaalee thee. 2jab tak yahoyada us kee raahanumaaee karta tha yooaas vah kuchh karta raha jo rabb ko pasand tha. 3to bhee oonchee jagahon kay mandir door na kiay gaay. avaam maamool kay mutaabiq vahaan apnee qurbaaniyaan pesh kartay aur bakhoor jalaatay rahay.
yooaas rabb kay ghar kee marammat karvaata hai
4ek din yooaas nay imaamon ko hukm diya, “rabb kay liyay makhsoos jitnay bhee paisay rabb kay ghar men laaay jaatay hain un sab ko jama karen, chaahay vah mardumashumaaree kay taiks [a] dekhiay khurooj 30:11-16 ya kisee mannat kay zimn men diay gaay hon, chaahay razaakaaraana taur par ada kiay gaay hon. 5yah tamaam paisay imaamon kay sapurd kiay jaaen. in say aap ko jahaan bhee zaroorat hai rabb kay ghar kee daraadon kee marammat karvaanee hai.” 6lekin yooaas kee hukoomat kay 23ven saal men us nay dekha ki ab tak rabb kay ghar kee daraadon kee marammat naheen huee. 7tab us nay yahoyada aur baaqee imaamon ko bula kar poochha, “aap rabb kay ghar kee marammat kyoon naheen kara rahay? ab say aap ko in paison say aap kee apnee zarooriyaat pooree karnay kee ijaazat naheen balki tamaam paisay rabb kay ghar kee marammat kay liyay istemaal karnay hain.”
8imaam maan gaay ki ab say ham logon say hadiya naheen lengay aur ki is kay badlay hamen rabb kay ghar kee marammat naheen karvaanee padegee. 9phir yahoyada imaam nay ek sandooq lay kar us kay dhaknay men sooraakh bana diya. is sandooq ko us nay qurbaangaah kay paas rakh diya, us darvaazay kay dahenee taraf jis men say parastaar rabb kay ghar kay sahen men daakhil hotay thay. jab log apnay hadiyaajaat rabb kay ghar men pesh kartay to darvaazay kee paheraadaaree karnay vaalay imaam tamaam paison ko sandooq men daal detay. 10jab kabhee pata chalta ki sandooq bhar gaya hai to baadshaah ka meeramunshee aur imaam-ay-aazam aatay aur tamaam paisay gin kar thailiyon men daal detay thay. 11phir yah ginay huay paisay un thekedaaron ko diay jaatay jin kay sapurd rabb kay ghar kee marammat ka kaam kiya gaya tha. in paison say vah marammat karnay vaalay kaareegaron kee ujrat ada kartay thay. in men badhaee, imaarat par kaam karnay vaalay, 12raaj aur patthar taraashnay vaalay shaamil thay. is kay ilaava unhon nay yah paisay daraadon kee marammat kay liyay darkaar lakdee aur taraashay huay pattharon kay liyay bhee istemaal kiay. baaqee jitnay akhraajaat rabb kay ghar ko bahaal karnay kay liyay zarooree thay vah sab in paison say pooray kiay gaay. 13lekin in hadiyaajaat say sonay ya chaandee kee cheezen na banvaaee gaeen, na chaandee kay baasan, battee katarnay kay auzaar, chhidkaao kay katoray ya turam. 14yah sirf aur sirf thekedaaron ko diay gaay taaki vah rabb kay ghar kee marammat kar saken. 15thekedaaron say hisaab na liya gaya jab unhen kaareegaron ko paisay denay thay, kyoonki vah qaabil-ay-etimaad thay.
16mahez vah paisay jo qusoor aur gunaah kee qurbaaniyon kay liyay miltay thay rabb kay ghar kee marammat kay liyay istemaal na huay. vah imaamon ka hissa rahay.
kharaaj milnay par hazaael yarooshalam ko chhodta hai
17un dinon men shaam kay baadshaah hazaael nay jaat par hamla karkay us par qabza kar liya. is kay baad vah mud kar yarooshalam kee taraf badhnay laga taaki us par bhee hamla karay. 18yah dekh kar yahoodaah kay baadshaah yooaas nay un tamaam hadiyaajaat ko ikattha kiya jo us kay baapdaada yahoosafat, yahooraam aur akhaziyaah nay rabb kay ghar kay liyay makhsoos kiay thay. us nay vah bhee jama kiay jo us nay khud rabb kay ghar kay liyay makhsoos kiay thay. yah cheezen us saaray sonay kay saath mila kar jo rabb kay ghar aur shaahee mahel kay khazaanon men tha us nay sab kuchh hazaael ko bhej diya. tab hazaael yarooshalam ko chhod kar chala gaya.
yooaas kee maut
19baaqee jo kuchh yooaas kee hukoomat kay dauraan hua aur jo kuchh us nay kiya us ka zikr ‘shaahaan-ay-yahoodaah’ kee kitaab men kiya gaya hai. 20ek din us kay afsaron nay us kay khilaaf saazish karkay usay qatl kar diya jab vah bait-millo kay paas us raastay par tha jo silla kee taraf utar jaata tha. 21qaatilon kay naam yoozbad bin sim’aat aur yahoozabad bin shoomeer thay. yooaas ko yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta amasiyaah takhtnasheen hua.