2 Salaateen 13

israaeel ka baadshaah yahooaakhaz

¹yahooaakhaz bin yaahoo yahoodaah kay baadshaah yooaas bin akhaziyaah kee hukoomat kay 23ven saal men israaeel ka baadshaah bana. us kee hukoomat ka dauraaniya 17 saal tha, aur us ka daar-ul-hakoomat saamriya raha. ²us ka chaal-chalan rabb ko naapsand tha, kyoonki vah bhee yarubiaam bin nabaat kay buray namoonay par chalta raha. us nay vah gunaah jaaree rakhay jo karnay par yarubiaam nay israaeel ko uksaaya tha. us butparastee say vah kabhee baaz na aaya. ³is vajah say rabb israaeel say bahut naaraaz hua, aur vah shaam kay baadshaah hazaael aur us kay betay bin-hadad kay vaseelay say unhen baar baar dabaata raha.

⁴lekin phir yahooaakhaz nay rabb ka ghazab thanda kiya, aur rabb nay us kee minnaten suneen, kyoonki usay maaloom tha ki shaam ka baadshaah israaeel par kitna zulm kar raha hai. ⁵rabb nay kisee ko bhej diya jis nay unhen shaam kay zulm say aazaad karvaaya. is kay baad vah pahelay kee tarah sukoon kay saath apnay gharon men rah saktay thay. ⁶to bhee vah un gunaahon say baaz na aaay jo karnay par yarubiaam nay unhen uksaaya tha balki un kee yah butparastee jaaree rahee. yaseerat devee ka but bhee saamriya say hataaya na gaya.

⁷aakhir men yahooaakhaz kay sirf 50 ghudsavaar, 10 rath aur 10,000 piyaada sipaahee rah gaay. fauj ka baaqee hissa shaam kay baadshaah nay tabaah kar diya tha. us nay israaeelee faujiyon ko kuchal kar yoon uda diya tha jis tarah dhool anaaj ko gaahatay vaqt ud jaatee hai.

⁸baaqee jo kuchh yahooaakhaz kee hukoomat kay dauraan hua, jo kuchh us nay kiya aur jo kaamyaabiyaan usay haasil hueen vah ‘shaahaan-ay-israaeel kee taareekh’ kee kitaab men bayaan kee gaee hain. ⁹jab vah mar kar apnay baapdaada say ja mila to usay saamriya men dafnaaya gaya. phir us ka beta yahooaas takhtnasheen hua.

israaeel ka baadshaah yahooaas

¹⁰yahooaas bin yahooaakhaz yahoodaah kay baadshaah yooaas kee hukoomat kay 37ven saal men israaeel ka baadshaah bana. ¹¹yahooaas ka chaal-chalan rabb ko naapsand tha. vah un gunaahon say baaz na aaya jo karnay par yarubiaam bin nabaat nay israaeel ko uksaaya tha balki yah butparastee jaaree rahee. ¹²baaqee jo kuchh yahooaas kee hukoomat kay dauraan hua, jo kuchh us nay kiya aur jo kaamyaabiyaan usay haasil hueen vah ‘shaahaan-ay-israaeel kee taareekh’ kee kitaab men darj hain. us men us kee yahoodaah kay baadshaah amasiyaah kay saath jang ka zikr bhee hai.

¹³jab yahooaas mar kar apnay baapdaada say ja mila to usay saamriya men shaahee qabr men dafnaaya gaya. phir yarubiaam duvum takht par baith gaya.

bistar-ay-marg par yahooaas kee ileesha say mulaaqaat

¹⁴yahooaas kay daur-ay-hukoomat men ileesha shadeed beemaar ho gaya. jab vah marnay ko tha to israaeel ka baadshaah yahooaas us say milnay aaya. us kay oopar jhuk kar vah khoob ro pada aur chillaaya, “haay, meray baap, meray baap. israaeel kay rath aur us kay ghoday!” ¹⁵ileesha nay usay hukm diya, “ek kamaan aur kuchh teer lay aaen.” baadshaah kamaan aur teer ileesha kay paas lay aaya. ¹⁶phir ileesha bola, “kamaan ko pakden.” jab baadshaah nay kamaan ko pakad liya to ileesha nay apnay haath us kay haathon par rakh diay. ¹⁷phir us nay hukm diya, “mashriqee khidkee ko khol den.” baadshaah nay usay khol diya. ileesha nay kaha, “teer chalaaen!” baadshaah nay teer chalaaya. ileesha pukaara, “yah rabb ka fatah dilaanay vaala teer hai, shaam par fatah ka teer! aap afeeq kay paas shaam kee fauj ko mukammal taur par tabaah kar dengay.”

¹⁸phir us nay baadshaah ko hukm diya, “ab baaqee teeron ko pakden.” baadshaah nay unhen pakad liya. phir ileesha bola, “in ko zameen par patakh den.” baadshaah nay teen martaba teeron ko zameen par patakh diya aur phir ruk gaya. ¹⁹yah dekh kar mard-ay-khuda ghussay ho gaya aur bola, “aap ko teeron ko paanch ya chhah martaba zameen par patakhna chaahiay tha. agar aisa kartay to shaam kee fauj ko shikast day kar mukammal taur par tabaah kar detay. lekin ab aap usay sirf teen martaba shikast dengay.”

²⁰thodee der kay baad ileesha faut hua aur usay dafan kiya gaya. un dinon men moaabee luteray har saal mausam-ay-bahaar kay dauraan mulk men ghus aatay thay. ²¹ek din kisee ka janaaza ho raha tha to achaanak yah luteray nazar aaay. maatam karnay vaalay laash ko qareeb kee ileesha kee qabr men phaink kar bhaag gaay. lekin joon hee laash ileesha kee haddiyon say takraaee us men jaan a gaee aur vah aadmee khada ho gaya.

ileesha kay aakhiree alfaaz pooray ho jaatay hain

²²yahooaakhaz kay jeetay jee shaam ka baadshaah hazaael israaeel ko dabaata raha. ²³to bhee rabb ko apnee qaum par taras aaya. us nay un par rahem kiya, kyoonki usay vah ahd yaad raha jo us nay ibraaheem, ishaaq aur yaaqoob say baandha tha. aaj tak vah unhen tabaah karnay ya apnay huzoor say khaarij karnay kay liyay tayyaar naheen hua.

²⁴jab shaam ka baadshaah hazaael faut hua to us ka beta bin-hadad takhtnasheen hua. ²⁵tab yahooaas bin yahooaakhaz nay bin-hadad say vah israaeelee shaher dubaara chheen liyay jin par bin-hadad kay baap hazaael nay qabza kar liya tha. teen baar yahooaas nay bin-hadad ko shikast day kar israaeelee shaher vaapas lay liyay.