2 Salaateen 14
yahoodaah ka baadshaah amasiyaah
1amasiyaah bin yooaas israaeel kay baadshaah yahooaas bin yahooaakhaz kay doosray saal men yahoodaah ka baadshaah bana. 2us vaqt vah 25 saal ka tha. vah yarooshalam men rah kar 29 saal hukoomat karta raha. us kee maan yahooaddaan yarooshalam kee rahenay vaalee thee. 3jo kuchh amasiyaah nay kiya vah rabb ko pasand tha, agarchi vah utnee vafaadaaree say rabb kee pairvee naheen karta tha jitnee us kay baap daaood nay kee thee. har kaam men vah apnay baap yooaas kay namoonay par chala, 4lekin us nay bhee oonchee jagahon kay mandiron ko door na kiya. aam log ab tak vahaan qurbaaniyaan chadhaatay aur bakhoor jalaatay rahay.
5joon hee amasiyaah kay paaon mazbootee say jam gaay us nay un afsaron ko saza-ay-maut dee jinhon nay baap ko qatl kar diya tha. 6lekin un kay beton ko us nay zinda rahenay diya aur yoon moosvee shareeat kay taabay raha jis men rabb farmaata hai, “vaalidain ko un kay bachchon kay jaraaim kay sabab say saza-ay-maut na dee jaaay, na bachchon ko un kay vaalidain kay jaraaim kay sabab say. agar kisee ko saza-ay-maut denee ho to us gunaah kay sabab say jo us nay khud kiya hai.”
7amasiyaah nay adomiyon ko namak kee vaadee men shikast dee. us vaqt un kay 10,000 faujee us say ladnay aaay thay. jang kay dauraan us nay sila shaher par qabza kar liya aur us ka naam yuqtiel rakha. yah naam aaj tak raaij hai.
amasiyaah israaeel kay baadshaah yahooaas say ladta hai
8is fatah kay baad amasiyaah nay israaeel kay baadshaah yahooaas bin yahooaakhaz ko paighaam bheja, “aaen, ham ek doosray ka muqaabla karen!” 9lekin israaeel kay baadshaah yahooaas nay javaab diya, “lubnaan men ek kaantedaar jhaadee nay deodaar kay ek darakht say baat kee, ‘meray betay kay saath apnee betee ka rishta baandho.’ lekin usee vaqt lubnaan kay janglee jaanvaron nay us kay oopar say guzar kar usay paaon talay kuchal daala. 10mulk-ay-adom par fatah paanay kay sabab say aap ka dil maghroor ho gaya hai. lekin mera mashvra hai ki aap apnay ghar men rah kar fatah men haasil huee shuharat ka maza lenay par iktifa karen. aap aisee museebat ko kyoon daavat detay hain jo aap aur yahoodaah kee tabaahee ka baais ban jaaay?”
11lekin amasiyaah maannay kay liyay tayyaar naheen tha, is liyay yahooaas apnee fauj lay kar yahoodaah par chadh aaya. bait-shams kay paas us ka yahoodaah kay baadshaah kay saath muqaabla hua. 12israaeel kee fauj nay yahoodaah kee fauj ko shikast dee, aur har ek apnay apnay ghar bhaag gaya. 13israaeel kay baadshaah yahooaas nay yahoodaah kay baadshaah amasiyaah bin yooaas bin akhaziyaah ko vaheen bait-shams men giriftaar kar liya. phir vah yarooshalam gaya aur shaher kee faseel ifraaeem naamee darvaazay say konay kay darvaazay tak gira dee. is hissay kee lambaaee taqreeban 600 fut thee. 14jitna bhee sona, chaandee aur qeemtee saamaan rabb kay ghar aur shaahee mahel kay khazaanon men tha usay us nay pooray ka poora chheen liya. loota hua maal aur baaz yaraghamaalon ko lay kar vah saamriya vaapas chala gaya.
israaeel kay baadshaah yahooaas kee maut
15baaqee jo kuchh yahooaas kee hukoomat kay dauraan hua, jo kuchh us nay kiya aur jo kaamyaabiyaan usay haasil hueen vah shaahaan-ay-israaeel kee taareekh kee kitaab men darj hain. us men us kee yahoodaah kay baadshaah amasiyaah kay saath jang ka zikr bhee hai. 16jab yahooaas mar kar apnay baapdaada say ja mila to usay saamriya men israaeel kay baadshaahon kee qabr men dafnaaya gaya. phir us ka beta yarubiaam duvum takhtnasheen hua.
yahoodaah kay baadshaah amasiyaah kee maut
17israaeel kay baadshaah yahooaas bin yahooaakhaz kee maut kay baad yahoodaah ka baadshaah amasiyaah bin yooaas mazeed 15 saal jeeta raha. 18baaqee jo kuchh amasiyaah kee hukoomat kay dauraan hua vah ‘shaahaan-ay-yahoodaah kee taareekh’ kee kitaab men darj hai. 19ek din log yarooshalam men us kay khilaaf saazish karnay lagay. aakhirkaar us nay faraar ho kar lakees men panaah lee, lekin saazish karnay vaalon nay apnay logon ko us kay peechhay bheja, aur vah vahaan usay qatl karnay men kaamyaab ho gaay. 20us kee laash ghoday par utha kar yarooshalam laaee gaee jahaan usay shaher kay us hissay men jo ‘daaood ka shaher’ kahelaata hai khaandaanee qabr men dafnaaya gaya.
21yahoodaah kay tamaam logon nay amasiyaah kay betay uzziyaah [a] yahaan kaee jagahon par ibraanee men uzziyaah ka doosra naam azariyaah mustaamal hai. ko baap kay takht par bitha diya. us kee umr 16 saal thee 22jab us ka baap mar kar apnay baapdaada say ja mila. baadshaah bannay kay baad uzziyaah nay ailaat shaher par qabza karkay usay dubaara yahoodaah ka hissa bana liya. us nay shaher men bahut taameeree kaam karvaaya.
israaeel ka baadshaah yarubiaam duvum
23yahoodaah kay baadshaah amasiyaah bin yooaas kay 15ven saal men yarubiaam bin yahooaas israaeel ka baadshaah bana. us kee hukoomat ka dauraaniya 41 saal tha, aur us ka daar-ul-hakoomat saamriya raha. 24us ka chaal-chalan rabb ko naapsand tha. vah un gunaahon say baaz na aaya jo karnay par nabaat kay betay yarubiaam avval nay israaeel ko uksaaya tha. 25yarubiaam duvum labo-hamaat say lay kar baheera-ay-murdaar tak un tamaam ilaaqon par dubaara qabza kar saka jo pahelay israaeel kay thay. yoon vah vaada poora hua jo rabb israaeel kay khuda nay apnay khaadim jaat-hifar kay rahenay vaalay nabee yoonus bin amittee kee maarifat kiya tha. 26kyoonki rabb nay israaeel kee nihaayat buree haalat par dhyaan diya tha. usay maaloom tha ki chhotay baday sab halaak honay vaalay hain aur ki unhen chhudaanay vaala koee naheen hai. 27rabb nay kabhee naheen kaha tha ki main israaeel qaum ka naam-o-nishaan mita doonga, is liyay us nay unhen yarubiaam bin yahooaas kay vaseelay say najaat dilaaee.
28baaqee jo kuchh yarubiaam duvum kee hukoomat kay dauraan hua, jo kuchh us nay kiya aur jo jangee kaamyaabiyaan usay haasil hueen un ka zikr ‘shaahaan-ay-israaeel kee taareekh’ kee kitaab men hua hai. us men yah bhee bayaan kiya gaya hai ki us nay kis tarah damishq aur hamaat par dubaara qabza kar liya. 29jab yarubiaam mar kar apnay baapdaada say ja mila to usay saamriya men baadshaahon kee qabr men dafnaaya gaya. phir us ka beta zakariyaah takhtnasheen hua.