2 Salaateen 15
yahoodaah ka baadshaah uzziyaah
1uzziyaah bin amasiyaah israaeel kay baadshaah yarubiaam duvum kee hukoomat kay 27ven saal men yahoodaah ka baadshaah bana. 2us vaqt us kee umr 16 saal thee, aur vah yarooshalam men rah kar 52 saal hukoomat karta raha. us kee maan yakooliyaah yarooshalam kee rahenay vaalee thee. 3apnay baap amasiyaah kee tarah us ka chaal-chalan rabb ko pasand tha, 4lekin oonchee jagahon ko door na kiya gaya, aur aam log vahaan apnee qurbaaniyaan chadhaatay aur bakhoor jalaatay rahay.
5ek din rabb nay baadshaah ko saza dee ki usay kodh lag gaya. uzziyaah jeetay jee is beemaaree say shifa na pa saka, aur usay alaahida ghar men rahena pada. us kay betay yootaam ko mahel par muqarrar kiya gaya, aur vahee ummat par hukoomat karnay laga.
6baaqee jo kuchh uzziyaah kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. 7jab vah mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta yootaam takhtnasheen hua.
israaeel ka baadshaah zakariyaah
8zakariyaah bin yarubiaam yahoodaah kay baadshaah uzziyaah kee hukoomat kay 38ven saal men israaeel ka baadshaah bana. us ka daar-ul-hakoomat bhee saamriya tha, lekin chhah maah kay baad us kee hukoomat khatm ho gaee. 9apnay baapdaada kee tarah zakariyaah ka chaal-chalan bhee rabb ko naapsand tha. vah un gunaahon say baaz na aaya jo karnay par yarubiaam bin nabaat nay israaeel ko uksaaya tha. 10salloom bin yabees nay us kay khilaaf saazish karkay usay sab kay saamnay qatl kiya. phir vah us kee jagah baadshaah ban gaya.
11baaqee jo kuchh zakariyaah kee hukoomat kay dauraan hua us ka zikr ‘shaahaan-ay-israaeel kee taareekh’ kee kitaab men kiya gaya hai.
12yoon rabb ka vah vaada poora hua jo us nay yaahoo say kiya tha, “teree aulaad chauthee pusht tak israaeel par hukoomat kartee rahegee.”
israaeel ka baadshaah salloom
13salloom bin yabees yahoodaah kay baadshaah uzziyaah kay 39ven saal men israaeel ka baadshaah bana. vah saamriya men rah kar sirf ek maah tak takht par baith saka. 14phir manaahim bin jaadee nay tirza say a kar salloom ko saamriya men qatl kar diya. is kay baad vah khud takht par baith gaya.
15baaqee jo kuchh salloom kee hukoomat kay dauraan hua aur jo saazishen us nay keen vah ‘shaahaan-ay-israaeel kee taareekh’ kee kitaab men bayaan kiya gaya hai.
16us vaqt manaahim nay tirza say a kar shaher tifsah ko us kay tamaam baashindon aur gird-o-navaah kay ilaaqay samet tabaah kiya. vajah yah thee ki us kay baashinday apnay darvaazon ko khol kar us kay taabay ho jaanay kay liyay tayyaar naheen thay. javaab men manaahim nay un ko maara aur tamaam haamila aurton kay pet cheer daalay.
israaeel ka baadshaah manaahim
17manaahim bin jaadee yahoodaah kay baadshaah uzziyaah kee hukoomat kay 39ven saal men israaeel ka baadshaah bana. saamriya us ka daar-ul-hakoomat tha, aur us kee hukoomat ka dauraaniya 10 saal tha. 18us ka chaal-chalan rabb ko naapsand tha, aur vah zindagee bhar un gunaahon say baaz na aaya jo karnay par yarubiaam bin nabaat nay israaeel ko uksaaya tha.
19-20 manaahim kay daur-ay-hukoomat men asoor ka baadshaah pool yaanee tiglat-pilesar mulk say ladnay aaya. manaahim nay usay 34,000 kilograam chaandee day dee taaki vah us kee hukoomat mazboot karnay men madad karay. tab asoor ka baadshaah israaeel ko chhod kar apnay mulk vaapas chala gaya. chaandee kay yah paisay manaahim nay ameer israaeeliyon say jama kiay. har ek ko chaandee kay 50 sikkay ada karnay paday.
21baaqee jo kuchh manaahim kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men darj hai. 22jab vah mar kar apnay baapdaada say ja mila to us ka beta fiqahiyaah takht par baith gaya.
israaeel ka baadshaah fiqahiyaah
23fiqahiyaah bin manaahim yahoodaah kay baadshaah uzziyaah kay 50ven saal men israaeel ka baadshaah bana. saamriya men rah kar us kee hukoomat ka dauraaniya do saal tha. 24fiqahiyaah ka chaal-chalan rabb ko naapsand tha. vah un gunaahon say baaz na aaya jo karnay par yarubiaam bin nabaat nay israaeel ko uksaaya tha.
25ek din fauj kay aala afsar fiqah bin ramaliyaah nay us kay khilaaf saazish kee. jiliaad kay 50 aadmiyon ko apnay saath lay kar us nay fiqahiyaah ko saamriya kay mahel kay burj men maar daala. us vaqt do aur afsar banaam arjoob aur ariya bhee us kee zad men a kar mar gaay. is kay baad fiqah takht par baith gaya.
26baaqee jo kuchh fiqahiyaah kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men bayaan kiya gaya hai.
israaeel ka baadshaah fiqah
27fiqah bin ramaliyaah yahoodaah kay baadshaah uzziyaah kee hukoomat kay 52ven saal men israaeel ka baadshaah bana. saamriya men rah kar vah 20 saal tak hukoomat karta raha. 28fiqah ka chaal-chalan rabb ko naapsand tha. vah un gunaahon say baaz na aaya jo karnay par yarubiaam bin nabaat nay israaeel ko uksaaya tha.
29fiqah kay daur-ay-hukoomat men asoor kay baadshaah tiglat-pilesar nay israaeel par hamla kiya. zail kay tamaam shaher us kay qabzay men a gaay : aiyyoon, abeel-bait-maaka, yaanooh, qaadis aur hasoor. jiliaad aur galeel kay ilaaqay bhee naftaalee kay pooray qabaailee ilaaqay samet us kee girift men a gaay. asoor ka baadshaah in tamaam jagahon men aabaad logon ko giriftaar karkay apnay mulk asoor lay gaya.
30ek din hosea bin aila nay fiqah kay khilaaf saazish karkay usay maut kay ghaat utaar diya. phir vah khud takht par baith gaya. yah yahoodaah kay baadshaah yootaam bin uzziyaah kee hukoomat kay 20ven saal men hua.
31baaqee jo kuchh fiqah kee hukoomat kay dauraan hua aur jo kuchh us nay kiya vah ‘shaahaan-ay-israaeel kee taareekh’ kee kitaab men darj hai.
yahoodaah ka baadshaah yootaam
32uzziyaah ka beta yootaam israaeel kay baadshaah fiqah kee hukoomat kay doosray saal men yahoodaah ka baadshaah bana. 33vah 25 saal kee umr men baadshaah bana aur yarooshalam men rah kar 16 saal hukoomat karta raha. us kee maan yaroosa bint sadoq thee. 34vah apnay baap uzziyaah kee tarah vah kuchh karta raha jo rabb ko pasand tha. 35to bhee oonchee jagahon kay mandir hataaay na gaay. log vahaan apnee qurbaaniyaan chadhaanay aur bakhoor jalaanay say baaz na aaay. yootaam nay rabb kay ghar ka baalaaee darvaaza taameer kiya.
36baaqee jo kuchh yootaam kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men qalamband hai. 37un dinon men rabb shaam kay baadshaah razeen aur fiqah bin ramaliyaah ko yahoodaah kay khilaaf bhejnay laga taaki us say laden. 38jab yootaam mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta aakhaz takht par baith gaya.