2 Salaateen 16

yahoodaah ka baadshaah aakhaz

¹aakhaz bin yootaam israaeel kay baadshaah fiqah bin ramaliyaah kee hukoomat kay 17ven saal men yahoodaah ka baadshaah bana. ²us vaqt aakhaz 20 saal ka tha, aur vah yarooshalam men rah kar 16 saal hukoomat karta raha. vah apnay baap daaood kay namoonay par na chala balki vah kuchh karta raha jo rabb ko naapsand tha. ³kyoonki us nay israaeel kay baadshaahon ka chaal-chalan apnaaya, yahaan tak ki us nay apnay betay ko qurbaanee kay taur par jala diya. yoon vah un qaumon kay ghinaunay rasm-o-rivaaj ada karnay laga jinhen rabb nay israaeeliyon kay aagay mulk say nikaal diya tha. ⁴aakhaz bakhoor jala kar apnee qurbaaniyaan oonchay maqaamon, pahaadiyon kee chotiyon aur har ghanay darakht kay saay men chadhaata tha.

aakhaz asoor kay baadshaah say madad leta hai

⁵ek din shaam ka baadshaah razeen aur israaeel ka baadshaah fiqah bin ramaliyaah yarooshalam par hamla karnay kay liyay yahoodaah men ghus aaay. unhon nay shaher ka muhaasara to kiya lekin us par qabza karnay men naakaam rahay. ⁶un hee dinon men razeen nay ailaat par dubaara qabza karkay shaam ka hissa bana liya. yahoodaah kay logon ko vahaan say nikaal kar us nay vahaan adomiyon ko basa diya. yah adomee aaj tak vahaan aabaad hain.

⁷aakhaz nay apnay qaasidon ko asoor kay baadshaah tiglat-pilesar kay paas bhej kar usay ittila dee, “main aap ka khaadim aur beta hoon. meharbaanee karkay aaen aur mujhay shaam aur israaeel kay baadshaahon say bachaaen jo mujh par hamla kar rahay hain.” ⁸saath saath aakhaz nay vah chaandee aur sona jama kiya jo rabb kay ghar aur shaahee mahel kay khazaanon men tha aur usay tuhfay kay taur par asoor kay baadshaah ko bhej diya. ⁹tiglat-pilesar raazee ho gaya. us nay damishq par hamla karkay shaher par qabza kar liya aur us kay baashindon ko giriftaar karkay qeer ko lay gaya. razeen ko us nay qatl kar diya.

aakhaz rabb kay ghar kee behuramtee karta hai

¹⁰aakhaz baadshaah asoor kay baadshaah tiglat-pilesar say milnay kay liyay damishq gaya. vahaan ek qurbaangaah thee jis ka namoona aakhaz nay bana kar ooriyaah imaam ko bhej diya. saath saath us nay dizaain kee tamaam tafseelaat bhee yarooshalam bhej deen. ¹¹jab ooriyaah ko hidaayaat mileen to us nay un hee kay mutaabiq yarooshalam men ek qurbaangaah banaaee. aakhaz kay damishq say vaapas aanay say pahelay pahelay usay tayyaar kar liya gaya.

¹²jab baadshaah vaapas aaya to us nay naee qurbaangaah ka muaaina kiya. phir us kee seedhee par chadh kar ¹³us nay khud qurbaaniyaan us par pesh keen. bhasm honay vaalee qurbaanee aur ghalla kee nazar jala kar us nay mai kee nazar qurbaangaah par undel dee aur salaamatee kee qurbaaniyon ka khoon us par chhidak diya.

¹⁴rabb kay ghar aur naee qurbaangaah kay darmiyaan ab tak peetal kee puraanee qurbaangaah thee. ab aakhaz nay usay utha kar rabb kay ghar kay saamnay say muntaqil karkay naee qurbaangaah kay peechhay yaanee shimaal kee taraf rakhva diya. ¹⁵ooriyaah imaam ko us nay hukm diya, “ab say aap ko tamaam qurbaaniyon ko naee qurbaangaah par pesh karna hai. in men subah-o-shaam kee rozaana qurbaaniyaan bhee shaamil hain aur baadshaah aur ummat kee mukhtalif qurbaaniyaan bhee, maslan bhasm honay vaalee qurbaaniyaan aur ghalla aur mai kee nazren. qurbaaniyon kay tamaam khoon ko bhee sirf naee qurbaangaah par chhidakna hai. aainda peetal kee puraanee qurbaangaah sirf meray zaatee istemaal kay liyay hogee jab mujhay allaah say kuchh darayaaft karna hoga.” ¹⁶ooriyaah imaam nay vaisa hee kiya jaisa baadshaah nay usay hukm diya.

¹⁷lekin aakhaz baadshaah rabb kay ghar men mazeed tabdeeliyaan bhee laaya. hathgaadiyon kay jin fremon par baasan rakhay jaatay thay unhen tod kar us nay baasnon ko door kar diya. is kay ilaava us nay ‘samundar’ naamee baday hauz ko peetal kay un bailon say utaar diya jin par vah shuroo say pada tha aur usay patthar kay ek chabootray par rakhva diya. ¹⁸us nay asoor kay baadshaah ko khush rakhnay kay liyay ek aur kaam bhee kiya. us nay rabb kay ghar say vah chabootra door kar diya jis par baadshaah ka takht rakha jaata tha aur vah darvaaza band kar diya jo baadshaah rabb kay ghar men daakhil honay kay liyay istemaal karta tha.

¹⁹baaqee jo kuchh aakhaz kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. ²⁰jab vah mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta hizaqiyaah takhtnasheen hua.