2 Salaateen 17

israaeel ka aakhiree baadshaah hosea

¹hosea bin aila yahoodaah kay baadshaah aakhaz kee hukoomat kay 12ven saal men israaeel ka baadshaah bana. saamriya us ka daar-ul-hakoomat raha, aur us kee hukoomat ka dauraaniya 9 saal tha. ²hosea ka chaal-chalan rabb ko naapsand tha, lekin israaeel kay un baadshaahon kee nisbat jo us say pahelay thay vah kuchh behatar tha.

³ek din asoor kay baadshaah salmanasar nay israaeel par hamla kiya. tab hosea shikast maan kar us kay taabay ho gaya. usay asoor ko kharaaj ada karna pada. ⁴lekin chand saal kay baad vah sarkash ho gaya. us nay kharaaj ka saalaana silsila band karkay apnay safeeron ko misr kay baadshaah so kay paas bheja taaki us say madad haasil karay. jab asoor kay baadshaah ko pata chala to us nay usay pakad kar jel men daal diya.

saamriya ka anjaam

⁵salmanasar pooray mulk men say guzar kar saamriya tak pahunch gaya. teen saal tak usay shaher ka muhaasara karna pada, ⁶lekin aakhirkaar vah hosea kee hukoomat kay navven saal men kaamyaab hua aur shaher par qabza karkay israaeeliyon ko jilaavatan kar diya. unhen asoor la kar us nay kuchh khalah kay ilaaqay men, kuchh jauzaan kay darya-ay-khaaboor kay kinaaray par aur kuchh maadiyon kay shaheron men basaaay.

⁷yah sab kuchh is liyay hua ki israaeeliyon nay rabb apnay khuda ka gunaah kiya tha, haalaanki vah unhen misree baadshaah firaaun kay qabzay say riha karkay misr say nikaal laaya tha. vah deegar maaboodon kee pooja karte ⁸aur un qaumon kay rasm-o-rivaaj kee pairvee kartay jin ko rabb nay un kay aagay say nikaal diya tha. saath saath vah un rasmon say bhee liptay rahay jo israaeel kay baadshaahon nay shuroo kee theen. ⁹israaeeliyon ko rabb apnay khuda kay khilaaf bahut tarkeeben soojheen jo theek naheen theen. sab say chhotee chaukee say lay kar baday say baday qil’aaband shaher tak unhon nay apnay tamaam shaheron kee oonchee jagahon par mandir banaaay. ¹⁰har pahaadee kee chotee par aur har ghanay darakht kay saay men unhon nay patthar kay apnay devtaaon kay satoon aur yaseerat devee kay khambay khaday kiay. ¹¹har oonchee jagah par vah bakhoor jala detay thay, bilkul un aqvaam kee tarah jinhen rabb nay un kay aagay say nikaal diya tha. gharaz israaeeliyon say bahut see aisee shareer harkaten sarzad hueen jin ko dekh kar rabb ko ghussa aaya. ¹²vah buton kee parastish kartay rahay agarchi rabb nay is say mana kiya tha.

¹³baar baar rabb nay apnay nabiyon aur ghaibbeenon ko israaeel aur yahoodaah kay paas bheja tha taaki unhen aagaah karen, “apnee shareer raahon say baaz aao. meray ahkaam aur qavaaid kay taabay raho. us pooree shareeat kee pairvee karo jo main nay tumhaaray baapdaada ko apnay khaadimon yaanee nabiyon kay vaseelay say day dee thee.”

¹⁴lekin vah sunnay kay liyay tayyaar naheen thay balki apnay baapdaada kee tarah ad gaay, kyoonki vah bhee rabb apnay khuda par bharosa naheen kartay thay. ¹⁵unhon nay us kay ahkaam aur us ahd ko radd kiya jo us nay un kay baapdaada say baandha tha. jab bhee us nay unhen kisee baat say aagaah kiya to unhon nay usay haqeer jaana. bekaar buton kee pairvee kartay kartay vah khud bekaar ho gaay. vah gird-o-navaah kee qaumon kay namoonay par chal paday haalaanki rabb nay is say mana kiya tha. ¹⁶rabb apnay khuda kay tamaam ahkaam ko mustarad karkay unhon nay apnay liyay bachhdon kay do mujassmay dhaal liyay aur yaseerat devee ka khamba khada kar diya. vah sooraj, chaand balki aasmaan kay pooray lashkar kay saamnay jhuk gaay aur baal devta kee parastish karnay lagay. ¹⁷apnay betay-betiyon ko unhon nay apnay buton kay liyay qurbaan karkay jala diya. nujoomiyon say mashvra lena aur jaadoogree karna aam ho gaya. gharaz unhon nay apnay aap ko badee kay haath men bech kar aisa kaam kiya jo rabb ko naapsand tha aur jo usay ghussa dilaata raha.

¹⁸tab rabb ka ghazab israaeel par naazil hua, aur us nay unhen apnay huzoor say khaarij kar diya. sirf yahoodaah ka qabeela mulk men baaqee rah gaya.

¹⁹lekin yahoodaah kay afraad bhee rabb apnay khuda kay ahkaam kay taabay rahenay kay liyay tayyaar naheen thay. vah bhee un buray rasm-o-rivaaj kee pairvee kartay rahay jo israaeel nay shuroo kiay thay. ²⁰phir rabb nay pooree kee pooree qaum ko radd kar diya. unhen tang karkay vah unhen luteron kay havaalay karta raha, aur ek din us nay unhen bhee apnay huzoor say khaarij kar diya.

²¹rabb nay khud israaeel kay shimaalee qabeelon ko daaood kay gharaanay say alag kar diya tha, aur unhon nay yarubiaam bin nabaat ko apna baadshaah bana liya tha. lekin yarubiaam nay israaeel ko ek sangeen gunaah karnay par uksa kar rabb kee pairvee karnay say door kiay rakha. ²²israaeelee yarubiaam kay buray namoonay par chaltay rahay aur kabhee is say baaz na aaay.

²³yahee vajah hai ki jo kuchh rabb nay apnay khaadimon yaanee nabiyon kee maarifat farmaaya tha vah poora hua. us nay unhen apnay huzoor say khaarij kar diya, aur dushman unhen qaidee bana kar asoor lay gaya jahaan vah aaj tak zindagee guzaartay hain.

saamriya men ajnabee qaumon ko aabaad kiya jaata hai

²⁴asoor kay baadshaah nay baabal, koota, avva, hamaat aur sifarvaaim say logon ko israaeel men la kar saamriya kay israaeeliyon say khaalee kiay gaay shaheron men aabaad kiya. yah log saamriya par qabza karkay us kay shaheron men basnay lagay. ²⁵lekin aatay vaqt vah rabb kee parastish naheen kartay thay, is liyay rabb nay un kay darmiyaan sherbabar bhej diay jinhon nay kaee ek ko phaad daala.

²⁶asoor kay baadshaah ko ittila dee gaee, “jin logon ko aap nay jilaavatan karkay saamriya kay shaheron men aabaad kiya hai vah naheen jaantay ki us mulk ka devta kin kin baaton ka taqaaza karta hai. nateejay men us nay un kay darmiyaan sherbabar bhej diay hain jo unhen phaad rahay hain. aur vajah yahee hai ki vah us kee saheeh pooja karnay say vaaqif naheen hain.” ²⁷yah sun kar asoor kay baadshaah nay hukm diya, “saamriya say yahaan laaay gaay imaamon men say ek ko chun lo jo apnay vatan laut kar vahaan dubaara aabaad ho jaaay aur logon ko sikhaaay ki us mulk ka devta apnee pooja kay liyay kin kin baaton ka taqaaza karta hai.”

²⁸tab ek imaam jilaavatanee say vaapas aaya. bait-el men aabaad ho kar us nay naay baashindon ko sikhaaya ki rabb kee munaasib ibaadat kis tarah kee jaatee hai. ²⁹lekin saath saath vah apnay zaatee devtaaon kee pooja bhee kartay rahay. shaher-ba-shaher har qaum nay apnay apnay but bana kar un tamaam oonchee jagahon kay mandiron men khaday kiay jo saamriya kay logon nay bana chhoday thay. ³⁰baabal kay baashindon nay sukkaat-banaat kay but, koota kay logon nay nairgal kay mujassmay, hamaat vaalon nay aseema kay but ³¹aur avva kay logon nay nibhaaz aur tartaaq kay mujassmay khaday kiay. sifarvaaim kay baashinday apnay bachchon ko apnay devtaaon adrammalik aur anammalik kay liyay qurbaan karkay jala detay thay. ³²gharaz sab rabb kee parastish kay saath saath apnay devtaaon kee pooja bhee kartay aur apnay logon men say mukhtalif qism kay afraad ko chun kar pujaaree muqarrar kartay thay taaki vah oonchee jagahon kay mandiron ko sambhaalen. ³³vah rabb kee ibaadat bhee kartay aur saath saath apnay devtaaon kee un qaumon kay rivaajon kay mutaabiq ibaadat bhee kartay thay jin men say unhen yahaan laaya gaya tha.

³⁴yah silsila aaj tak jaaree hai. saamriya kay baashinday apnay un puraanay rivaajon kay mutaabiq zindagee guzaartay hain aur sirf rabb kee parastish karnay kay liyay tayyaar naheen hotay. vah us kee hidaayaat aur ahkaam kee parva naheen kartay aur us shareeat kee pairvee naheen kartay jo rabb nay yaaqoob kee aulaad ko dee thee. (rabb nay yaaqoob ka naam israaeel men badal diya tha.) ³⁵kyoonki rabb nay israaeel kee qaum kay saath ahd baandh kar usay hukm diya tha,

“doosray kisee bhee maabood kee ibaadat mat karna! un kay saamnay jhuk kar un kee khidmat mat karna, na unhen qurbaaniyaan pesh karna. ³⁶sirf rabb kee parastish karo jo badee qudrat aur azeem kaam dikha kar tumhen misr say nikaal laaya. sirf usee kay saamnay jhuk jaao, sirf usee ko apnee qurbaaniyaan pesh karo. ³⁷laazim hai ki tum dhyaan say un tamaam hidaayaat, ahkaam aur qavaaid kee pairvee karo jo main nay tumhaaray liyay qalamband kar diay hain. kisee aur devta kee pooja mat karna. ³⁸vah ahd mat bhoolna jo main nay tumhaaray saath baandh liya hai, aur deegar maaboodon kee parastish na karo. ³⁹sirf aur sirf rabb apnay khuda kee ibaadat karo. vahee tumhen tumhaaray tamaam dushmanon kay haath say bacha lega.”

⁴⁰lekin log yah sunnay kay liyay tayyaar naheen thay balki apnay puraanay rasm-o-rivaaj kay saath liptay rahay. ⁴¹chunaanchay rabb kee ibaadat kay saath hee saamriya kay naay baashinday apnay buton kee pooja kartay rahay. aaj tak un kee aulaad yahee kuchh kartee aaee hai.