2 Salaateen 2
ilyaas ko aasmaan par utha liya jaata hai
1phir vah din aaya jab rabb nay ilyaas ko aandhee men aasmaan par utha liya. us din ilyaas aur ileesha jiljaal shaher say ravaana ho kar safar kar rahay thay. 2raastay men ilyaas ileesha say kahenay laga, “yaheen thaher jaaen, kyoonki rabb nay mujhay bait-el bheja hai.” lekin ileesha nay inkaar kiya, “rabb aur aap kee hayaat kee qasam, main aap ko naheen chhodoonga.”
chunaanchay donon chaltay chaltay bait-el pahunch gaay. 3nabiyon ka jo guroh vahaan raheta tha vah shaher say nikal kar un say milnay aaya. ileesha say mukhaatib ho kar unhon nay poochha, “kya aap ko maaloom hai ki aaj rabb aap kay aaqa ko aap kay paas say utha lay jaaega?” ileesha nay javaab diya, “jee, mujhay pata hai. khaamosh!” 4dubaara ilyaas apnay saathee say kahenay laga, “ileesha, yaheen thaher jaaen, kyoonki rabb nay mujhay yareehoo bheja hai.” ileesha nay javaab diya, “rabb aur aap kee hayaat kee qasam, main aap ko naheen chhodoonga.”
chunaanchay donon chaltay chaltay yareehoo pahunch gaay. 5nabiyon ka jo guroh vahaan raheta tha us nay bhee ileesha kay paas a kar us say poochha, “kya aap ko maaloom hai ki aaj rabb aap kay aaqa ko aap kay paas say utha lay jaaega?” ileesha nay javaab diya, “jee, mujhay pata hai. khaamosh!”
6ilyaas teesree baar ileesha say kahenay laga, “yaheen thaher jaaen, kyoonki rabb nay mujhay darya-ay-yardan kay paas bheja hai.” ileesha nay javaab diya, “rabb aur aap kee hayaat kee qasam, main aap ko naheen chhodoonga.”
chunaanchay donon aagay badhay. 7pachaas nabee bhee un kay saath chal paday. jab ilyaas aur ileesha darya-ay-yardan kay kinaaray par pahunchay to doosray un say kuchh door khaday ho gaay. 8ilyaas nay apnee chaadar utaar kar usay lapet liya aur us kay saath paanee par maara. paanee taqseem hua, aur donon aadmee khushk zameen par chaltay huay darya men say guzar gaay. 9doosray kinaaray par pahunch kar ilyaas nay ileesha say kaha, “meray aap kay paas say utha liyay jaanay say pahelay mujhay bataaen ki aap kay liyay kya karoon?” ileesha nay javaab diya, “mujhay aap kee rooh ka dugna hissa meeraas men mile [a] ileesha pahelauthay ka hissa maang raha hai jo doosray vaarison kee nisbat dugna hota hai. .” 10ilyaas bola, “jo darakhwaast aap nay kee hai usay poora karna mushkil hai. agar aap mujhay us vaqt dekh sakengay jab mujhay aap kay paas say utha liya jaaega to matlab hoga ki aap kee darakhwaast pooree ho gaee hai, varna naheen.” 11donon aapas men baaten kartay huay chal rahay thay ki achaanak ek aatisheen rath nazar aaya jisay aatisheen ghoday khainch rahay thay. rath nay donon ko alag kar diya, aur ilyaas ko aandhee men aasmaan par utha liya gaya. 12yah dekh kar ileesha chilla utha, “haay meray baap, meray baap! israaeel kay rath aur us kay ghoday!”
ilyaas ileesha kee nazron say ojhal hua to ileesha nay gham kay maaray apnay kapdon ko phaad daala. 13ilyaas kee chaadar zameen par gir gaee thee. ileesha usay utha kar darya-ay-yardan kay paas vaapas chala. 14chaadar ko paanee par maar kar vah bola, “rabb aur ilyaas ka khuda kahaan hai?” paanee taqseem hua aur vah beech men say guzar gaya.
15yareehoo say aaay nabee ab tak darya kay maghribee kinaaray par khaday thay. jab unhon nay ileesha ko apnay paas aatay huay dekha to pukaar uthay, “ilyaas kee rooh ileesha par thaheree huee hai!” vah us say milnay gaay aur aundhay munh us kay saamnay jhuk kar 16bolay, “hamaaray 50 taaqatvar aadmee khidmat kay liyay haazir hain. agar ijaazat ho to ham unhen bhej dengay taaki vah aap kay aaqa ko talaash karen. ho sakta hai rabb kay rooh nay usay utha kar kisee pahaad ya vaadee men rakh chhoda ho.”
ileesha nay mana karnay kee koshish kee, “naheen, unhen mat bhejna.” 17lekin unhon nay yahaan tak israar kiya ki aakhirkaar vah maan gaya aur kaha, “chalo, unhen bhej den.” unhon nay 50 aadmiyon ko bhej diya jo teen din tak ilyaas ka khoj lagaatay rahay. lekin vah kaheen nazar na aaya. 18himmat haar kar vah yareehoo vaapas aaay jahaan ileesha thahera hua tha. us nay kaha, “kya main nay naheen kaha tha ki na jaaen?”
ileesha kay mojize
19ek din yareehoo kay aadmee ileesha kay paas a kar shikaayat karnay lagay, “hamaaray aaqa, aap khud dekh saktay hain ki is shaher men achchha guzaara hota hai. lekin paanee kharaab hai, aur nateejay men bahut dafa bachchay maan kay pet men hee mar jaatay hain.”
20ileesha nay hukm diya, “ek ghairistemaalashuda bartan men namak daal kar usay meray paas lay aaen.” jab bartan us kay paas laaya gayaa 21to vah usay lay kar shaher say nikla aur chashmay kay paas gaya. vahaan us nay namak ko paanee men daal diya aur saath saath kaha, “rabb farmaata hai ki main nay is paanee ko bahaal kar diya hai. ab say yah kabhee maut ya bachchon kay zaaay honay ka baais naheen banega.”
22usee lamhay paanee bahaal ho gaya. ileesha kay kahenay kay mutaabiq yah aaj tak theek raha hai.
23yareehoo say ileesha bait-el ko vaapas chala gaya. jab vah raastay par chaltay huay shaher say guzar raha tha to kuchh ladkay shaher say nikal aaay aur us ka mazaaq uda kar chillaanay lagay, “oay ganjay, idhar a! oay ganjay, idhar a!” 24ileesha mud gaya aur un par nazar daal kar rabb kay naam men un par laanat bhejee. tab do reechhnayaan jangal say nikal kar ladkon par toot padin aur kul 42 ladkon ko phaad daala.
25ilyaas aagay nikla aur chaltay chaltay karmil pahaad kay paas aaya. vahaan say vaapas a kar saamriya pahunch gaya.