2 Salaateen 20

allaah hizaqiyaah ko shifa deta hai

¹un dinon men hizaqiyaah itna beemaar hua ki marnay kee naubat a pahunchee. aamoos ka beta yasaayaah nabee us say milnay aaya aur kaha, “rabb farmaata hai ki apnay ghar ka band-o-bast kar lay, kyoonki tujhay marna hai. too is beemaaree say shifa naheen paaega.”

²yah sun kar hizaqiyaah nay apna munh deevaar kee taraf pher kar dua kee, ³“ai rabb, yaad kar ki main vafaadaaree aur khuloosdilee say teray saamnay chalta raha hoon, ki main vah kuchh karta aaya hoon jo tujhay pasand hai.” phir vah phoot phoot kar ronay laga.

⁴itnay men yasaayaah chala gaya tha. lekin vah abhee androonee sahen say nikla naheen tha ki usay rabb ka kalaam mila, ⁵“meree qaum kay raahanuma hizaqiyaah kay paas vaapas ja kar usay bata dena ki rabb teray baap daaood ka khuda farmaata hai, ‘main nay teree dua sun lee aur teray aansoo dekhay hain. main tujhay shifa doonga. parson too dubaara rabb kay ghar men jaaega. ⁶main teree zindagee men 15 saal ka izaafa karoonga. saath saath main tujhay aur is shaher ko asoor kay baadshaah say bacha loonga. main apnee aur apnay khaadim daaood kee khaatir shaher ka difa karoonga’.”

⁷phir yasaayaah nay hukm diya, “anjeer kee tikkee la kar baadshaah kay naasoor par baandh do!” jab aisa kiya gaya to hizaqiyaah ko shifa milee. ⁸pahelay hizaqiyaah nay yasaayaah say poochha tha, “rabb mujhay kaun sa nishaan dega jis say mujhay yaqeen aaay ki vah mujhay shifa dega aur ki main parson dubaara rabb kay ghar kee ibaadat men shareek hoonga?” ⁹yasaayaah nay javaab diya, “rabb dhoopaghdee ka saaya das darjay aagay karega ya das darjay peechhay. is say aap jaan lengay ki vah apna vaada poora karega. aap kya chaahatay hain, kya saaya das darjay aagay chalay ya das darjay peechhay?” ¹⁰hizaqiyaah nay javaab diya, “yah karvaana ki saaya das darjay aagay chalay aasaan kaam hai. naheen, vah das darjay peechhay jaaay.”

¹¹tab yasaayaah nabee nay rabb say dua kee, aur rabb nay aakhaz kee banaaee huee dhoopaghdee ka saaya das darjay peechhay kar diya.

hizaqiyaah say sangeen ghaltee hotee hai

¹²thodee der kay baad baabal kay baadshaah maroodak-baldaan bin baldaan nay hizaqiyaah kee beemaaree kee khabar sun kar vafad kay haath khat aur tuhfay bhejay. ¹³hizaqiyaah nay vafad ka istiqbaal karkay usay vah tamaam khazaanay dikhaaay jo zakheeraakhaanay men mahfooz rakhay gaay thay yaanee tamaam sona-chaandee, balsaan ka tel aur baaqee qeemtee tel. us nay aslihaakhaana aur baaqee sab kuchh bhee dikhaaya jo us kay khazaanon men tha. pooray mahel aur pooray mulk men koee khaas cheez na rahee jo us nay unhen na dikhaaee. ¹⁴tab yasaayaah nabee hizaqiyaah baadshaah kay paas aaya aur poochha, “in aadmiyon nay kya kaha? kahaan say aaay hain?” hizaqiyaah nay javaab diya, “doordaraaz mulk baabal say aaay hain.” ¹⁵yasaayaah bola, “unhon nay mahel men kya kuchh dekha?” hizaqiyaah nay kaha, “unhon nay mahel men sab kuchh dekh liya hai. meray khazaanon men koee cheez na rahee jo main nay unhen naheen dikhaaee.”

¹⁶tab yasaayaah nay kaha, “rabb ka farmaan sunen! ¹⁷ek din aanay vaala hai ki teray mahel ka tamaam maal chheen liya jaaega. jitnay bhee khazaanay too aur teray baapdaada nay aaj tak jama kiay hain un sab ko dushman baabal lay jaaega. rabb farmaata hai ki ek bhee cheez peechhay naheen rahegee. ¹⁸teray beton men say bhee baaz chheen liyay jaaengay, aisay jo ab tak paida naheen huay. tab vah khwaajaasara ban kar shaah-ay-baabal kay mahel men khidmat karengay.”

¹⁹hizaqiyaah bola, “rabb ka jo paighaam aap nay mujhay diya hai vah theek hai.” kyoonki us nay socha, “badee baat yah hai ki meray jeetay jee amn-o-amaan hoga.”

hizaqiyaah kee maut

²⁰baaqee jo kuchh hizaqiyaah kee hukoomat kay dauraan hua aur jo kaamyaabiyaan usay haasil hueen vah ‘shaahaan-ay-yahoodaah kee taareekh’ kee kitaab men darj hain. vahaan yah bhee bayaan kiya gaya hai ki us nay kis tarah taalaab banva kar vah surang khudvaaee jis kay zareeay chashmay ka paanee shaher tak pahunchta hai. ²¹jab hizaqiyaah mar kar apnay baapdaada say ja mila to us ka beta manassee takhtnasheen hua.