2 Salaateen 21

yahoodaah ka baadshaah manassee

¹manassee 12 saal kee umr men baadshaah bana, aur yarooshalam men us kee hukoomat ka dauraaniya 55 saal tha. us kee maan hifseebaah thee. ²manassee ka chaal-chalan rabb ko naapsand tha. us nay un qaumon kay qaabil-ay-ghin rasm-o-rivaaj apna liyay jinhen rabb nay israaeeliyon kay aagay say nikaal diya tha. ³oonchee jagahon kay jin mandiron ko us kay baap hizaqiyaah nay dha diya tha unhen us nay naay siray say taameer kiya. us nay baal devta kee qurbaangaahen banvaaeen aur yaseerat devee ka khamba khada kiya, bilkul usee tarah jis tarah israaeel kay baadshaah akhiyab nay kiya tha. in kay ilaava vah sooraj, chaand balki aasmaan kay pooray lashkar ko sijda karkay un kee khidmat karta tha. ⁴us nay rabb kay ghar men bhee apnee qurbaangaahen khadee keen, haalaanki rabb nay is maqaam kay baaray men farmaaya tha, “main yarooshalam men apna naam qaaim karoonga.” ⁵lekin manassee nay parva na kee balki rabb kay ghar kay donon sahenon men aasmaan kay pooray lashkar kay liyay qurbaangaahen banvaaeen. ⁶yahaan tak ki us nay apnay betay ko bhee qurbaan karkay jala diya. jaadoogree aur ghaibdaanee karnay kay ilaava vah murdon kee roohon say raabita karnay vaalon aur rammaalon say bhee mashvra karta tha.

gharaz us nay bahut kuchh kiya jo rabb ko naapsand tha aur usay taish dilaaya. ⁷yaseerat devee ka khamba banva kar us nay usay rabb kay ghar men khada kiya, haalaanki rabb nay daaood aur us kay betay sulemaan say kaha tha, “is ghar aur is shaher yarooshalam men jo main nay tamaam israaeelee qabeelon men say chun liya hai main apna naam abad tak qaaim rakhoonga. ⁸agar israaeelee ehatiyaat say meray un tamaam ahkaam kee pairvee karen jo moosa nay shareeat men unhen diay to main kabhee naheen honay doonga ki israaeeliyon ko us mulk say jilaavatan kar diya jaaay jo main nay un kay baapdaada ko ata kiya tha.” ⁹lekin log rabb kay taabay na rahay, aur manassee nay unhen aisay ghalat kaam karnay par uksaaya jo un qaumon say bhee sarzad naheen huay thay jinhen rabb nay mulk men daakhil hotay vaqt un kay aagay say tabaah kar diya tha.

¹⁰aakhirkaar rabb nay apnay khaadimon yaanee nabiyon kee maarifat elaan kiya, ¹¹“yahoodaah kay baadshaah manassee say qaabil-ay-ghin gunaah sarzad huay hain. us kee harkaten mulk men israaeel say pahelay rahenay vaalay amoriyon kee nisbat kaheen ziyaada shareer hain. apnay buton say us nay yahoodaah kay baashindon ko gunaah karnay par uksaaya hai. ¹²chunaanchay rabb israaeel ka khuda farmaata hai, ‘main yarooshalam aur yahoodaah par aisee aafat naazil karoonga ki jisay bhee is kee khabar milegee us kay kaan bajnay lagengay. ¹³main yarooshalam ko usee naap say naapoonga jis say saamriya ko naap chuka hoon. main usay us taraazoo men rakh kar toloonga jis men akhiyab ka gharaana tol chuka hoon. jis tarah bartan safaaee kartay vaqt ponchh kar ultay rakhay jaatay hain usee tarah main yarooshalam ka safaaya kar doonga. ¹⁴us vaqt main apnee meeraas ka bacha khacha hissa bhee tark kar doonga. main unhen un kay dushmanon kay havaalay kar doonga jo un kee loot-maar karengay. ¹⁵aur vajah yahee hogee ki un say aisee harkaten sarzad huee hain jo mujhay naapsand hain. us din say lay kar jab un kay baapdaada misr say nikal aaay aaj tak vah mujhay taish dilaatay rahay hain’.”

¹⁶lekin manassee nay na sirf yahoodaah kay baashindon ko butparastee aur aisay kaam karnay par uksaaya jo rabb ko naapsand thay balki us nay beshumaar bequsoor logon ko qatl bhee kiya. un kay khoon say yarooshalam ek siray say doosray siray tak bhar gaya.

¹⁷baaqee jo kuchh manassee kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. us men us kay gunaahon ka zikr bhee kiya gaya hai. ¹⁸jab vah mar kar apnay baapdaada say ja mila to usay us kay mahel kay baagh men dafnaaya gaya jo uzza ka baagh kahelaata hai. phir us ka beta amoon takhtnasheen hua.

yahoodaah ka baadshaah amoon

¹⁹amoon 22 saal kee umr men baadshaah bana aur do saal tak yarooshalam men hukoomat karta raha. us kee maan masullimat bint haroos yutba kee rahenay vaalee thee. ²⁰apnay baap manassee kee tarah amoon aisa ghalat kaam karta raha jo rabb ko naapsand tha. ²¹vah har tarah say apnay baap kay buray namoonay par chal kar un buton kee khidmat aur pooja karta raha jin kee pooja us ka baap karta aaya tha. ²²rabb apnay baapdaada kay khuda ko us nay tark kiya, aur vah us kee raahon par naheen chalta tha.

²³ek din amoon kay kuchh afsaron nay us kay khilaaf saazish karkay usay mahel men qatl kar diya. ²⁴lekin ummat nay tamaam saazish karnay vaalon ko maar daala aur amoon kay betay yoosiyaah ko baadshaah bana diya.

²⁵baaqee jo kuchh amoon kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men bayaan kiya gaya hai. ²⁶usay uzza kay baagh men us kee apnee qabr men dafan kiya gaya. phir us ka beta yoosiyaah takhtnasheen hua.