2 Salaateen 22

yahoodaah ka baadshaah yoosiyaah

¹yoosiyaah 8 saal kee umr men baadshaah bana, aur yarooshalam men rah kar us kee hukoomat ka dauraaniya 31 saal tha. us kee maan yadeeda bint adaayaah busqat kee rahenay vaalee thee. ²yoosiyaah vah kuchh karta raha jo rabb ko pasand tha. vah har baat men apnay baap daaood kay achchhay namoonay par chalta raha aur us say na daaeen, na baaeen taraf hata.

³apnee hukoomat kay 18ven saal men yoosiyaah baadshaah nay apnay meeramunshee saafan bin asaliyaah bin masullaam ko rabb kay ghar kay paas bhej kar kaha, ⁴“imaam-ay-aazam khilaqiyaah kay paas ja kar usay bata dena ki un tamaam paison ko gin len jo darbaanon nay logon say jama kiay hain. ^5-6 phir paisay un thekedaaron ko day den jo rabb kay ghar kee marammat karva rahay hain taaki vah kaareegaron, taameer karnay vaalon aur raajon kee ujrat ada kar saken. in paison say vah daraadon ko theek karnay kay liyay darkaar lakdee aur taraashay huay patthar bhee khareeden. ⁷thekedaaron ko akhraajaat ka hisaab-kitaab denay kee zaroorat naheen hai, kyoonki vah qaabil-ay-etimaad hain.”

rabb kay ghar say shareeat kee kitaab mil jaatee hai

⁸jab meeramunshee saafan khilaqiyaah kay paas pahuncha to imaam-ay-aazam nay usay ek kitaab dikha kar kaha, “mujhay rabb kay ghar men shareeat kee kitaab milee hai.” us nay usay saafan ko day diya jis nay usay padh liya. ⁹tab saafan baadshaah kay paas gaya aur usay ittila dee, “ham nay rabb kay ghar men jamaashuda paisay marammat par muqarrar thekedaaron aur baaqee kaam karnay vaalon ko day diay hain.” ¹⁰phir saafan nay baadshaah ko bataaya, “khilaqiyaah nay mujhay ek kitaab dee hai.” kitaab ko khol kar vah baadshaah kee maujoodgee men us kee tilaavat karnay laga.

¹¹kitaab kee baaten sun kar baadshaah nay ranjeeda ho kar apnay kapday phaad liyay. ¹²us nay khilaqiyaah imaam, akheeqaam bin saafan, akbor bin meekaayaah, meeramunshee saafan aur apnay khaas khaadim asaayaah ko bula kar unhen hukm diya, ¹³“ja kar meree aur qaum balki tamaam yahoodaah kee khaatir rabb say is kitaab men darj baaton kay baaray men darayaaft karen. rabb ka jo ghazab ham par naazil honay vaala hai vah nihaayat sakht hai, kyoonki hamaaray baapdaada na kitaab kay farmaanon kay taabay rahay, na un hidaayaat kay mutaabiq zindagee guzaaree hai jo us men hamaaray liyay darj kee gaee hain.”

¹⁴chunaanchay khilaqiyaah imaam, akheeqaam, akbor, saafan aur asaayaah khulda nabiya ko milnay gaay. khulda ka shauhar salloom bin tiqva bin kharkhas rabb kay ghar kay kapday sambhaalta tha. vah yarooshalam kay naay ilaaqay men rahetay thay. ^15-16 khulda nay unhen javaab diya,

“rabb israaeel ka khuda farmaata hai ki jis aadmee nay tumhen bheja hai usay bata dena, ‘rabb farmaata hai ki main is shaher aur us kay baashindon par aafat naazil karoonga. vah tamaam baaten pooree ho jaaengee jo yahoodaah kay baadshaah nay kitaab men padhee hain. ¹⁷kyoonki meree qaum nay mujhay tark karkay deegar maaboodon ko qurbaaniyaan pesh kee hain aur apnay haathon say but bana kar mujhay taish dilaaya hai. mera ghazab is maqaam par naazil ho jaaega aur kabhee khatm naheen hoga.’

¹⁸lekin yahoodaah kay baadshaah kay paas jaaen jis nay aap ko rabb say darayaaft karnay kay liyay bheja hai aur usay bata den ki rabb israaeel ka khuda farmaata hai, ‘meree baaten sun kar ¹⁹tera dil narm ho gaya hai. jab tujhay pata chala ki main nay is maqaam aur is kay baashindon kay baaray men farmaaya hai ki vah laantee aur tabaah ho jaaengay to too nay apnay aap ko rabb kay saamnay past kar diya. too nay ranjeeda ho kar apnay kapday phaad liyay aur meray huzoor phoot phoot kar roya. rabb farmaata hai ki yah dekh kar main nay teree sunee hai. ²⁰jab too meray kahenay par mar kar apnay baapdaada say ja milega to salaamatee say dafan hoga. jo aafat main shaher par naazil karoonga vah too khud naheen dekhega’.”

afsar baadshaah kay paas vaapas gaay aur usay khulda ka javaab suna diya.