2 Salaateen 23
yoosiyaah rabb say ahd baandhta hai
1tab baadshaah yahoodaah aur yarooshalam kay tamaam buzurgon ko bula kar 2rabb kay ghar men gaya. sab log chhotay say lay kar baday tak us kay saath gaay yaanee yahoodaah kay aadmee, yarooshalam kay baashinday, imaam aur nabee. vahaan pahunch kar jamaaat kay saamnay ahd kee us pooree kitaab kee tilaavat kee gaee jo rabb kay ghar men milee thee.
3phir baadshaah nay satoon kay paas khaday ho kar rabb kay huzoor ahd baandha aur vaada kiya, “ham rabb kee pairvee karengay, ham pooray dil-o-jaan say us kay ahkaam aur hidaayaat pooree karkay is kitaab men darj ahd kee baaten qaaim rakhengay.” pooree qaum ahd men shareek huee.
yoosiyaah butparastee ko khatm karta hai
4ab baadshaah nay imaam-ay-aazam khilaqiyaah, doosray darjay par muqarrar imaamon aur darbaanon ko hukm diya, “rabb kay ghar men say vah tamaam cheezen nikaal den jo baal devta, yaseerat devee aur aasmaan kay pooray lashkar kee pooja kay liyay istemaal huee hain.” phir us nay yah saara saamaan yarooshalam kay baahar vaadee-ay-qidron kay khulay maidaan men jala diya aur us kee raakh utha kar bait-el lay gaya. 5us nay un butparast pujaariyon ko bhee hata diya jinhen yahoodaah kay baadshaahon nay yahoodaah kay shaheron aur yarooshalam kay gird-o-navaah kay mandiron men qurbaaniyaan pesh karnay kay liyay muqarrar kiya tha. yah pujaaree na sirf baal devta ko apnay nazraanay pesh kartay thay balki sooraj, chaand, jhurmaton aur aasmaan kay pooray lashkar ko bhee. 6yaseerat devee ka khamba yoosiyaah nay rabb kay ghar say nikaal kar shaher kay baahar vaadee-ay-qidron men jala diya. phir us nay usay pees kar us kee raakh ghareeb logon kee qabron par bikher dee. 7rabb kay ghar kay paas aisay makaan thay jo jismafrosh mardon aur aurton kay liyay banaaay gaay thay. un men aurten yaseerat devee kay liyay kapday bhee buntee theen. ab baadshaah nay un ko bhee gira diya.
8phir yoosiyaah tamaam imaamon ko yarooshalam vaapas laaya. saath saath us nay yahoodaah kay shimaal men jiba say lay kar junoob men bair-saba tak oonchee jagahon kay un tamaam mandiron kee behuramtee kee jahaan imaam pahelay qurbaaniyaan pesh kartay thay. yarooshalam kay us darvaazay kay paas bhee do mandir thay jo shaher kay sardaar yashooa kay naam say mashhoor tha. in ko bhee yoosiyaah nay dha diya. (shaher men daakhil hotay vaqt yah mandir baaeen taraf nazar aatay thay.) 9jin imaamon nay oonchee jagahon par khidmat kee thee unhen yarooshalam men rabb kay huzoor qurbaaniyaan pesh karnay kee ijaazat naheen thee. lekin vah baaqee imaamon kee tarah bekhameeree rotee kay liyay makhsoos rotee kha saktay thay. 10bin-hinnoom kee vaadee kee qurbaangaah banaam toofat ko bhee baadshaah nay dha diya taaki aainda koee bhee apnay betay ya betee ko jala kar malik devta ko qurbaan na kar sakay. 11ghoday kay jo mujassmay yahoodaah kay baadshaahon nay sooraj devta kee taazeem men khaday kiay thay unhen bhee yoosiyaah nay gira diya aur un kay rathon ko jala diya. yah ghoday rabb kay ghar kay sahen men darvaazay kay saath khaday thay, vahaan jahaan darbaaree afsar banaam naatan-malik ka kamra tha. 12aakhaz baadshaah nay apnee chhat par ek kamra banaaya tha jis kee chhat par bhee mukhtalif baadshaahon kee banee huee qurbaangaahen theen. ab yoosiyaah nay in ko bhee dha diya aur un do qurbaanagaahon ko bhee jo manassee nay rabb kay ghar kay do sahenon men khadee kee theen. in ko tukday tukday karkay us nay malba vaadee-ay-qidron men phaink diya. 13neez, baadshaah nay yarooshalam kay mashriq men oonchee jagahon kay mandiron kee behuramtee kee. yah mandir halaakat kay pahaad kay junoob men thay, aur sulemaan baadshaah nay unhen taameer kiya tha. us nay unhen saida kee sharmanaak devee astaaraat, moaab kay makrooh devta kamos aur ammon kay qaabil-ay-ghin devta milkoom kay liyay banaaya tha. 14yoosiyaah nay devtaaon kay liyay makhsoos kiay gaay satoonon ko tukday tukday karkay yaseerat devee kay khambay katva diay aur maqaamaat par insaanee haddiyaan bikher kar un kee behuramtee kee.
yoosiyaah bait-el aur saamriya kay mandiron ko gira deta hai
15-16 bait-el men ab tak oonchee jagah par vah mandir aur qurbaangaah padee thee jo yarubiaam bin nabaat nay taameer kee thee. yarubiaam hee nay israaeel ko gunaah karnay par uksaaya tha. jab yoosiyaah nay dekha ki jis pahaad par qurbaangaah hai us kee dhalaanon par bahut see qabren hain to us nay hukm diya ki un kee haddiyaan nikaal kar qurbaangaah par jala dee jaaen. yoon qurbaangaah kee behuramtee bilkul usee tarah huee jis tarah rabb nay mard-ay-khuda kee maarifat farmaaya tha. is kay baad yoosiyaah nay mandir aur qurbaangaah ko gira diya. us nay yaseerat devee ka mujassma koot koot kar aakhir men sab kuchh jala diya.
17phir yoosiyaah ko ek aur qabr nazar aaee. us nay shaher kay baashindon say poochha, “yah kis kee qabr hai?” unhon nay javaab diya, “yah yahoodaah kay us mard-ay-khuda kee qabr hai jis nay bait-el kee qurbaangaah kay baaray men ain vah peshgoee kee thee jo aaj aap kay vaseelay say pooree huee hai.” 18yah sun kar baadshaah nay hukm diya, “isay chhod do! koee bhee is kee haddiyon ko na chheday.” chunaanchay us kee aur us nabee kee haddiyaan bach gaeen jo saamriya say us say milnay aaya aur baad men us kee qabr men dafnaaya gaya tha.
19jis tarah yoosiyaah nay bait-el kay mandir ko tabaah kiya usee tarah us nay saamriya kay tamaam shaheron kay mandiron kay saath kiya. unhen oonchee jagahon par bana kar israaeel kay baadshaahon nay rabb ko taish dilaaya tha. 20in mandiron kay pujaariyon ko us nay un kee apnee apnee qurbaanagaahon par saza-ay-maut dee aur phir insaanee haddiyaan un par jala kar un kee behuramtee kee. is kay baad vah yarooshalam laut gaya.
fasah kee eed manaaee jaatee hai
21yarooshalam men a kar baadshaah nay hukm diya, “pooree qaum rabb apnay khuda kee taazeem men fasah kee eed manaaay, jis tarah ahd kee kitaab men farmaaya gaya hai.” 22us zamaanay say lay kar jab qaazee israaeel kee raahanumaaee kartay thay yoosiyaah kay dinon tak fasah kee eed is tarah naheen manaaee gaee thee. israaeel aur yahoodaah kay baadshaahon kay ayyaam men bhee aisee eed naheen manaaee gaee thee. 23yoosiyaah kee hukoomat kay 18ven saal men pahelee dafa rabb kee taazeem men aisee eed yarooshalam men manaaee gaee.
yoosiyaah kee faramaambardaaree
24yoosiyaah un tamaam hidaayaat kay taabay raha jo shareeat kee us kitaab men darj theen jo khilaqiyaah imaam ko rabb kay ghar men milee thee. chunaanchay us nay murdon kee roohon say raabita karnay vaalon, rammaalon, ghareloo buton, doosray buton aur baaqee tamaam makrooh cheezon ko khatm kar diya. 25na yoosiyaah say pahelay, na us kay baad us jaisa koee baadshaah hua jis nay us tarah pooray dil, pooree jaan aur pooree taaqat kay saath rabb kay paas vaapas a kar moosvee shareeat kay har farmaan kay mutaabiq zindagee guzaaree ho. 26to bhee rabb yahoodaah par apnay ghussay say baaz na aaya, kyoonki manassee nay apnee ghalat harkaton say usay hadd say ziyaada taish dilaaya tha. 27isee liyay rabb nay farmaaya, “jo kuchh main nay israaeel kay saath kiya vahee kuchh yahoodaah kay saath bhee karoonga. main usay apnay huzoor say khaarij kar doonga. apnay chunay huay shaher yarooshalam ko main radd karoonga aur saath saath us ghar ko bhee jis kay baaray men main nay kaha, ‘vahaan mera naam hoga’.”
28baaqee jo kuchh yoosiyaah kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men bayaan kiya gaya hai.
29yoosiyaah kee hukoomat kay dauraan misr ka baadshaah nikoh firaaun darya-ay-furaat kay liyay ravaana hua taaki asoor kay baadshaah say laday. raastay men yoosiyaah us say ladnay kay liyay nikla. lekin jab majiddo kay qareeb un ka ek doosray kay saath muqaabla hua to nikoh nay usay maar diya. 30yoosiyaah kay mulaazim us kee laash rath par rakh kar majiddo say yarooshalam lay aaay jahaan usay us kee apnee qabr men dafan kiya gaya. phir ummat nay us kay betay yahooaakhaz ko masah karkay baap kay takht par bitha diya.
yahoodaah ka baadshaah yahooaakhaz
31yahooaakhaz 23 saal kee umr men baadshaah bana, aur yarooshalam men us kee hukoomat ka dauraaniya teen maah tha. us kee maan hamootal bint yaramiyaah libna kee rahenay vaalee thee. 32apnay baapdaada kee tarah vah bhee aisa kaam karta raha jo rabb ko naapsand tha. 33nikoh firaaun nay mulk-ay-hamaat kay shaher ribla men usay giriftaar kar liya, aur us kee hukoomat khatm huee. mulk-ay-yahoodaah ko kharaaj kay taur par taqreeban 3,400 kilograam chaandee aur 34 kilograam sona ada karna pada. 34yahooaakhaz kee jagah firaaun nay yoosiyaah kay ek aur betay ko takht par bithaaya. us kay naam iliyaaqeem ko us nay yahooyaqeem men badal diya. yahooaakhaz ko vah apnay saath misr lay gaya jahaan vah baad men mara bhee.
35matlooba chaandee aur sonay kee raqam ada karnay kay liyay yahooyaqeem nay logon say khaas taiks liya. ummat ko apnee daulat kay mutaabiq paisay denay paday. is tareeqay say yahooyaqeem firaaun ko kharaaj ada kar saka.
yahoodaah ka baadshaah yahooyaqeem
36yahooyaqeem 25 saal kee umr men baadshaah bana, aur vah yarooshalam men rah kar 11 saal hukoomat karta raha. us kee maan zabooda bint fidaayaah roomaah kee rahenay vaalee thee. 37baapdaada kee tarah us ka chaal-chalan bhee rabb ko naapsand tha.