2 Salaateen 24

¹yahooyaqeem kee hukoomat kay dauraan baabal kay baadshaah nabookadnazzar nay yahoodaah par hamla kiya. nateejay men yahooyaqeem us kay taabay ho gaya. lekin teen saal kay baad vah sarkash ho gaya. ²tab rabb nay baabal, shaam, moaab aur ammon say daakuon kay jathay bhej diay taaki usay tabaah karen. vaisa hee hua jis tarah rabb nay apnay khaadimon yaanee nabiyon kee maarifat farmaaya tha. ³yah aaften is liyay yahoodaah par aaeen ki rabb nay in ka hukm diya tha. vah manassee kay sangeen gunaahon kee vajah say yahoodaah ko apnay huzoor say khaarij karna chaahata tha.

⁴vah yah haqeeqat bhee nazar’andaaz na kar saka ki manassee nay yarooshalam ko bequsoor logon kay khoon say bhar diya tha. rabb yah muaaf karnay kay liyay tayyaar naheen tha. ⁵baaqee jo kuchh yahooyaqeem kee hukoomat kay dauraan hua aur jo kuchh us nay kiya vah ‘shaahaan-ay-yahoodaah kee taareekh’ kee kitaab men darj hai. ⁶jab vah mar kar apnay baapdaada say ja mila to us ka beta yahooyaakeen takhtnasheen hua. ⁷us vaqt misr ka baadshaah dubaara apnay mulk say nikal na saka, kyoonki baabal kay baadshaah nay misr kee sarhadd banaam vaadee-ay-misr say lay kar darya-ay-furaat tak ka saara ilaaqa misr kay qabzay say chheen liya tha.

yahooyaakeen kee hukoomat aur yarooshalam par baabal ka qabzaa

⁸yahooyaakeen 18 saal kee umr men baadshaah bana, aur yarooshalam men us kee hukoomat ka dauraaniya teen maah tha. us kee maan nahushta bint ilnaatan yarooshalam kee rahenay vaalee thee. ⁹apnay baap kee tarah yahooyaakeen bhee aisa kaam karta raha jo rabb ko naapsand tha.

¹⁰us kee hukoomat kay dauraan baabal kay baadshaah nabookadnazzar kee fauj yarooshalam tak badh kar us ka muhaasara karnay lagee. ¹¹nabookadnazzar khud shaher kay muhaasaray kay dauraan pahunch gaya. ¹²tab yahooyaakeen nay shikast maan kar apnay aap ko apnee maan, mulaazimon, afsaron aur darbaariyon samet baabal kay baadshaah kay havaalay kar diya. baadshaah nay usay giriftaar kar liya.

yah nabookadnazzar kee hukoomat kay aathven saal men hua. ¹³jis ka elaan rabb nay pahelay kiya tha vah ab poora hua, nabookadnazzar nay rabb kay ghar aur shaahee mahel kay tamaam khazaanay chheen liyay. us nay sonay ka vah saara saamaan bhee loot liya jo sulemaan nay rabb kay ghar kay liyay banvaaya tha. ¹⁴aur jitnay khaatay-peetay log yarooshalam men thay un sab ko baadshaah nay jilaavatan kar diya. un men tamaam afsar, faujee, dastakaar aur dhaaton ka kaam karnay vaalay shaamil thay, kul 10,000 afraad. ummat kay sirf ghareeb log peechhay rah gaay. ¹⁵nabookadnazzar yahooyaakeen ko bhee qaidee bana kar baabal lay gaya aur us kee maan, beeviyon, darbaariyon aur mulk kay tamaam asar-o-rasookh rakhnay vaalon ko bhee. ¹⁶us nay faujiyon kay 7,000 afraad aur 1,000 dastakaaron aur dhaaton ka kaam karnay vaalon ko jilaavatan karkay baabal men basa diya. yah sab maahir aur jang karnay kay qaabil aadmee thay. ¹⁷yarooshalam men baabal kay baadshaah nay yahooyaakeen kee jagah us kay chacha mattaniyaah ko takht par bitha kar us ka naam sidaqiyaah men badal diya.

yahoodaah ka baadshaah sidaqiyaah

¹⁸sidaqiyaah 21 saal kee umr men baadshaah bana, aur yarooshalam men us kee hukoomat ka dauraaniya 11 saal tha. us kee maan hamootal bint yaramiyaah libna shaher kee rahenay vaalee thee. ¹⁹yahooyaqeem kee tarah sidaqiyaah aisa kaam karta raha jo rabb ko naapsand tha. ²⁰rabb yarooshalam aur yahoodaah kay baashindon say itna naaraaz hua ki aakhir men us nay unhen apnay huzoor say khaarij kar diya.

sidaqiyaah ka faraar aur giriftaaree

ek din sidaqiyaah baabal kay baadshaah say sarkash huaa