2 Salaateen 25
1is liyay shaah-ay-baabal nabookadnazzar tamaam fauj ko apnay saath lay kar dubaara yarooshalam pahuncha taaki us par hamla karay.
sidaqiyaah kee hukoomat kay navven saal men baabal kee fauj yarooshalam ka muhaasara karnay lagee. yah kaam dasven maheenay kay dasven din [a] yaanee 15 janvree shuroo hua. pooray shaher kay ird-gird baadshaah nay pushtay banvaaay. 2sidaqiyaah kee hukoomat kay 11ven saal tak yarooshalam qaaim raha. 3lekin phir kaal nay shaher men zor pakda, aur avaam kay liyay khaanay kee cheezen na raheen.
chauthay maheenay kay navven din [b] yaanee 18 julaaee 4baabal kay faujiyon nay faseel men rakhna daal diya. usee raat sidaqiyaah apnay tamaam faujiyon samet faraar honay men kaamyaab hua, agarchi shaher dushman say ghira hua tha. vah faseel kay us darvaazay say niklay jo shaahee baagh kay saath mulhiq do deevaaron kay beech men tha. vah vaadee-ay-yardan kee taraf bhaagnay lagay, 5lekin baabal kee fauj nay baadshaah ka taaqqub karkay usay yareehoo kay maidaan men pakad liya. us kay faujee us say alag ho kar chaaron taraf muntashir ho gaay, 6aur vah khud giriftaar ho gaya.
phir usay ribla men shaah-ay-baabal kay paas laaya gaya, aur vaheen sidaqiyaah par faisla saadir kiya gaya. 7sidaqiyaah kay dekhtay dekhtay us kay beton ko qatl kiya gaya. is kay baad faujiyon nay us kee aankhen nikaal kar usay peetal kee zanjeeron men jakad liya aur baabal lay gaay.
yarooshalam aur rabb kay ghar kee tabaahee
8shaah-ay-baabal nabookadnazzar kee hukoomat kay 19ven saal men baadshaah ka khaas afsar naboozaraadaan yarooshalam pahuncha. vah shaahee muhaafizon par muqarrar tha. paanchven maheenay kay saatven din [c] yaanee 14 agast us nay a kar 9rabb kay ghar, shaahee mahel aur yarooshalam kay tamaam makaanon ko jala diya. har badee imaarat bhasm ho gaee. 10us nay apnay tamaam faujiyon say shaher kee faseel ko bhee gira diya. 11phir naboozaraadaan nay sab ko jilaavatan kar diya jo yarooshalam aur yahoodaah men peechhay rah gaay thay. vah bhee un men shaamil thay jo jang kay dauraan ghaddaaree karkay shaah-ay-baabal kay peechhay lag gaay thay. 12lekin naboozaraadaan nay sab say nichlay tabqay kay baaz logon ko mulk-ay-yahoodaah men chhod diya taaki vah angoor kay baaghon aur kheton ko sambhaalen.
13baabal kay faujiyon nay rabb kay ghar men ja kar peetal kay donon satoonon, paanee kay baasnon ko uthaanay vaalee hathgaadiyon aur samundar naamee peetal kay hauz ko tod diya aur saara peetal utha kar baabal lay gaay. 14vah rabb kay ghar kee khidmat sar’anjaam denay kay liyay darkaar saamaan bhee lay gaay yaanee baaltiyaan, belachay, battee katarnay kay auzaar, bartan aur peetal ka baaqee saara saamaan. 15khaalis sonay aur chaandee kay bartan bhee is men shaamil thay yaanee jaltay huay koilay kay bartan aur chhidkaao kay katoray. shaahee muhaafizon ka afsar saara saamaan utha kar baabal lay gaya. 16jab donon satoonon, samundar naamee hauz aur baasnon ko uthaanay vaalee hathgaadiyon ka peetal tudvaaya gaya to vah itna vaznee tha ki usay tola na ja saka. sulemaan baadshaah nay yah cheezen rabb kay ghar kay liyay banvaaee theen. 17har satoon kee oonchaaee 27 fut thee. un kay baalaaee hisson kee oonchaaee saadhay chaar fut thee, aur vah peetal kee jaalee aur anaaron say sajay huay thay.
18shaahee muhaafizon kay afsar naboozaraadaan nay zail kay qaidiyon ko alag kar diya : imaam-ay-aazam siraayaah, us kay baad aanay vaala imaam safaniyaah, rabb kay ghar kay teen darbaanon, 19shaher kay bachay huon men say us afsar ko jo shaher kay faujiyon par muqarrar tha, sidaqiyaah baadshaah kay paanch musheeron, ummat kee bhartee karnay vaalay afsar aur shaher men maujood us kay 60 mardon ko. 20naboozaraadaan in sab ko alag karkay sooba hamaat kay shaher ribla lay gaya jahaan baabal ka baadshaah tha. 21vahaan nabookadnazzar nay unhen saza-ay-maut dee.
yoon yahoodaah kay baashindon ko jilaavatan kar diya gaya.
jidaliyaah kee hukoomat
22jin logon ko baabal kay baadshaah nabookadnazzar nay yahoodaah men peechhay chhod diya tha, un par us nay jidaliyaah bin akheeqaam bin saafan muqarrar kiya. 23jab fauj kay bachay huay afsaron aur un kay daston ko khabar milee ki jidaliyaah ko gavarnar muqarrar kiya gaya hai to vah misfaah men us kay paas aaay. afsaron kay naam ismaaeel bin nataniyaah, yoohanaan bin qareeh, siraayaah bin tanhoomat natoofaatee aur yaazaniyaah bin maakaatee thay. un kay faujee bhee saath aaay.
24jidaliyaah nay qasam kha kar un say vaada kiya, “baabal kay afsaron say mat darna! mulk men rah kar baabal kay baadshaah kee khidmat karen to aap kee salaamatee hogee.”
25lekin us saal kay saatven maheenay men ismaaeel bin nataniyaah bin ileesma nay das saathiyon kay saath misfaah a kar dhokay say jidaliyaah ko qatl kiya. ismaaeel shaahee nasal ka tha. jidaliyaah kay ilaava unhon nay us kay saath rahenay vaalay yahoodaah aur baabal kay tamaam logon ko bhee qatl kiya. 26yah dekh kar yahoodaah kay tamaam baashinday chhotay say lay kar baday tak faujee afsaron samet hijrat karkay misr chalay gaay, kyoonki vah baabal kay intiqaam say dartay thay.
yahooyaakeen ko aazaad kiya jaata hai
27yahoodaah kay baadshaah yahooyaakeen kee jilaavatanee kay 37ven saal men aveel-maroodak baabal ka baadshaah bana. usee saal kay 12ven maheenay kay 27ven din us nay yahooyaakeen ko qaidkhaanay say aazaad kar diya. 28us nay us say narm baaten karkay usay izzat kee aisee kursee par bithaaya jo baabal men jilaavatan kiay gaay baaqee baadshaahon kee nisbat ziyaada ahem thee. 29yahooyaakeen ko qaidiyon kay kapday utaarnay kee ijaazat milee, aur usay zindagee bhar baadshaah kee mez par baaqaaidagee say shareek honay ka sharaf haasil raha. 30baadshaah nay muqarrar kiya ki yahooyaakeen ko umr bhar itna vazeefa milta rahay ki us kee rozmarra zarooriyaat pooree hotee rahen.