2 Salaateen 3

israaeel ka baadshaah yooraam

¹akhiyab ka beta yooraam yahoodaah kay baadshaah yahoosafat kay 18ven saal men israaeel ka baadshaah bana. us kee hukoomat ka dauraaniya 12 saal tha aur us ka daar-ul-hakoomat saamriya raha. ²us ka chaal-chalan rabb ko naapsand tha, agarchi vah apnay maan-baap kee nisbat kuchh behatar tha. kyoonki us nay baal devta ka vah satoon door kar diya jo us kay baap nay banvaaya tha. ³to bhee vah yarubiaam bin nabaat kay un gunaahon kay saath lipta raha jo karnay par yarubiaam nay israaeel ko uksaaya tha. vah kabhee un say door na hua.

moaab kay khilaaf jang

⁴moaab ka baadshaah mesa bheden rakhta tha, aur saalaana usay bhed kay ek laakh bachchay aur ek laakh mendhay un kee oon samet israaeel kay baadshaah ko kharaaj kay taur par ada karnay padtay thay. ⁵lekin jab akhiyab faut hua to moaab ka baadshaah taabay na raha.

⁶tab yooraam baadshaah nay saamriya say nikal kar tamaam israaeeliyon kee bhartee kee. ⁷saath saath us nay yahoodaah kay baadshaah yahoosafat ko ittila dee, “moaab ka baadshaah sarkash ho gaya hai. kya aap meray saath us say ladnay jaaengay?” yahoosafat nay javaab bheja, “jee, main aap kay saath jaaoonga. ham to bhaaee hain. meree qaum ko apnee qaum aur meray ghodon ko apnay ghoday samjhen. ⁸ham kis raastay say jaaen?” yooraam nay javaab diya, “ham adom kay registaan say ho kar jaaengay.”

⁹chunaanchay israaeel ka baadshaah yahoodaah kay baadshaah kay saath mil kar ravaana hua. mulk-ay-adom ka baadshaah bhee saath tha. apnay mansoobay kay mutaabiq unhon nay registaan ka raasta ikhtiyaar kiya. lekin choonki vah seedhay naheen balki mutbaadil raastay say ho kar gaay is liyay saat din kay safar kay baad un kay paas paanee na raha, na un kay liyay, na jaanvaron kay liyay.

¹⁰israaeel ka baadshaah bola, “haay, rabb hamen is liyay yahaan bula laaya hai ki ham teenon baadshaahon ko moaab kay havaalay karay.”

¹¹lekin yahoosafat nay savaal kiya, “kya yahaan rabb ka koee nabee naheen hai jis kee maarifat ham rabb kee marzee jaan saken?” israaeel kay baadshaah kay kisee afsar nay javaab diya, “ek to hai, ileesha bin saafat jo ilyaas ka qareebee shaagird tha, vah us kay haathon par paanee daalnay kee khidmat anjaam diya karta tha.” ¹²yahoosafat bola, “rabb ka kalaam us kay paas hai.” teenon baadshaah ileesha kay paas gaay.

¹³lekin ileesha nay israaeel kay baadshaah say kaha, “mera aap kay saath kya vaasta? agar koee baat ho to apnay maan-baap kay nabiyon kay paas jaaen.” israaeel kay baadshaah nay javaab diya, “naheen, ham is liyay yahaan aaay hain ki rabb hee ham teenon ko yahaan bula laaya hai taaki hamen moaab kay havaalay karay.” ¹⁴ileesha nay kaha, “rabb-ul-afwaaj kee hayaat kee qasam jis kee khidmat main karta hoon, agar yahoodaah ka baadshaah yahaan maujood na hota to phir main aap ka lihaaz na karta balki aap kee taraf dekhta bhee na. lekin main yahoosafat ka khayaal karta hoon, ¹⁵is liyay kisee ko bulaaen jo sarod baja sakay.”

koee sarod bajaanay laga to rabb ka haath ileesha par a thahera, ¹⁶aur us nay elaan kiya, “rabb farmaata hai ki is vaadee men har taraf gadhon kee khudaaee karo. ¹⁷go tum na hava aur na baarish dekhogay to bhee vaadee paanee say bhar jaaegee. paanee itna hoga ki tum, tumhaaray revad aur baaqee tamaam jaanvar pee sakengay. ¹⁸lekin yah rabb kay nazdeek kuchh naheen hai, vah moaab ko bhee tumhaaray havaalay kar dega. ¹⁹tum tamaam qil’aaband aur markzee shaheron par fatah paaogay. tum mulk kay tamaam achchhay darakhton ko kaat kar tamaam chashmon ko band karogay aur tamaam achchhay kheton ko pattharon say kharaab karogay.”

²⁰aglee subah taqreeban us vaqt jab ghalla kee nazar pesh kee jaatee hai mulk-ay-adom kee taraf say sailaab aaya, aur nateejay men vaadee kay tamaam gadhay paanee say bhar gaay.

moaab par fatah

²¹itnay men tamaam moaabiyon ko pata chal gaya tha ki teenon baadshaah ham say ladnay a rahay hain. chhoton say lay kar badon tak jo bhee apnee talvaar chala sakta tha usay bula kar sarhadd kee taraf bheja gaya. ²²subah-saveray jab moaabee ladnay kay liyay tayyaar huay to tuloo-ay-aaftaab kee surkh raushnee men vaadee ka paanee khoon kee tarah surkh nazar aaya. ²³moaabee chillaanay lagay, “yah to khoon hai! teenon baadshaahon nay aapas men lad kar ek doosray ko maar diya hoga. aao, ham un ko loot len!”

²⁴lekin jab vah israaeelee lashkargaah kay qareeb pahunchay to israaeelee un par toot paday aur unhen maar kar bhaga diya. phir unhon nay un kay mulk men daakhil ho kar moaab ko shikast dee. ²⁵chaltay chaltay unhon nay tamaam shaheron ko barbaad kiya. jab bhee vah kisee achchhay khet say guzray to har sipaahee nay ek patthar us par phaink diya. yoon tamaam khet pattharon say bhar gaay. israaeeliyon nay tamaam chashmon ko bhee band kar diya aur har achchhay darakht ko kaat daala.

aakhir men sirf qeer-haraasat qaaim raha. lekin falaakhan chalaanay vaalay us ka muhaasara karkay us par hamla karnay lagay. ²⁶jab moaab kay baadshaah nay jaan liya ki main shikast kha raha hoon to us nay talvaaron say les 700 aadmiyon ko apnay saath liya aur adom kay baadshaah kay qareeb dushman ka muhaasara tod kar nikalnay kee koshish kee, lekin befaaida. ²⁷phir us nay apnay pahelauthay ko jisay us kay baad baadshaah banna tha lay kar faseel par apnay devta kay liyay qurbaan karkay jala diya. tab israaeeliyon par bada ghazab naazil hua, aur vah shaher ko chhod kar apnay mulk vaapas chalay gaay.