2 Salaateen 8

yooraam baadshaah shooneemee aurat kee zameen vaapas kar deta hai

¹ek din ileesha nay us aurat ko jis ka beta us nay zinda kiya tha mashvra diya, “apnay khaandaan ko lay kar aarizee taur par bairoon-ay-mulk chalee jaaen, kyoonki rabb nay hukm diya hai ki mulk men saat saal tak kaal hoga.” ²shooneem kee aurat nay mard-ay-khuda kee baat maan lee. apnay khaandaan ko lay kar vah chalee gaee aur saat saal filistee mulk men rahee. ³saat saal guzar gaay to vah us mulk say vaapas aaee. lekin kisee aur nay us kay ghar aur zameen par qabza kar rakha tha, is liyay vah madad kay liyay baadshaah kay paas gaee.

⁴ain us vaqt jab vah darbaar men pahunchee to baadshaah mard-ay-khuda ileesha kay naukar jaihaazee say guftagu kar raha tha. baadshaah nay us say darakhwaast kee thee, “mujhay vah tamaam baday kaam suna do jo ileesha nay kiay hain.” ⁵aur ab jab jaihaazee suna raha tha ki ileesha nay murda ladkay ko kis tarah zinda kar diya to us kee maan andar a kar baadshaah say iltimaas karnay lagee, “ghar aur zameen vaapas milnay men meree madad keejiay.” usay dekh kar jaihaazee nay baadshaah say kaha, “meray aaqa aur baadshaah, yah vahee aurat hai aur yah us ka vahee beta hai jisay ileesha nay zinda kar diya tha.” ⁶baadshaah nay aurat say savaal kiya, “kya yah saheeh hai?” aurat nay tasdeeq men usay dubaara sab kuchh sunaaya. tab us nay aurat ka muaamala kisee darbaaree afsar kay sapurd karkay hukm diya, “dhyaan den ki isay pooree milkiyat vaapas mil jaaay! aur jitnay paisay qabza karnay vaala aurat kee ghairmaujoodgee men zameen kee faslon say kama saka vah bhee aurat ko day diay jaaen.”

bin-hadad kee maut kee peshgoee

⁷ek din ileesha damishq aaya. us vaqt shaam ka baadshaah bin-hadad beemaar tha. jab usay ittila milee ki mard-ay-khuda aaya hai ⁸to us nay apnay afsar hazaael ko hukm diya, “mard-ay-khuda kay liyay tuhfa lay kar usay milnay jaaen. vah rabb say darayaaft karay ki kya main beemaaree say shifa paaoonga ya naheen?”

⁹hazaael 40 oonton par damishq kee behtareen paidaavaar laad kar ileesha say milnay gaya. us kay paas pahunch kar vah us kay saamnay khada hua aur kaha, “aap kay betay shaam kay baadshaah bin-hadad nay mujhay aap kay paas bheja hai. vah yah jaanna chaahata hai ki kya main apnee beemaaree say shifa paaoonga ya naheen?”

¹⁰ileesha nay javaab diya, “jaaen aur usay ittila den, ‘aap zaroor shifa paaengay.’ lekin rabb nay mujh par zaahir kiya hai ki vah haqeeqat men mar jaaega.” ¹¹ileesha khaamosh ho gaya aur tiktikee baandh kar badee der tak usay ghoorta raha, phir ronay laga. ¹²hazaael nay poochha, “meray aaqa, aap kyoon ro rahay hain?” ileesha nay javaab diya, “mujhay maaloom hai ki aap israaeeliyon ko kitna nuqsaan pahunchaaengay. aap un kee qil’aaband aabaadiyon ko aag laga kar un kay javaanon ko talvaar say qatl kar dengay, un kay chhotay bachchon ko zameen par patakh dengay aur un kee haamila aurton kay pet cheer daalengay.” ¹³hazaael bola, “mujh jaisay kuttay kee kya haisiyat hai ki itna bada kaam karoon?” ileesha nay kaha, “rabb nay mujhay dikha diya hai ki aap shaam kay baadshaah ban jaaengay.”

¹⁴is kay baad hazaael chala gaya aur apnay maalik kay paas vaapas aaya. baadshaah nay poochha, “ileesha nay aap ko kya bataaya?” hazaael nay javaab diya, “us nay mujhay yaqeen dilaaya ki aap shifa paaengay.” ¹⁵lekin aglay din hazaael nay kambal lay kar paanee men bhigo diya aur usay baadshaah kay munh par rakh diya. baadshaah ka saans ruk gaya aur vah mar gaya. phir hazaael takhtnasheen hua.

yahoodaah ka baadshaah yahooraam

¹⁶yahooraam bin yahoosafat israaeel kay baadshaah yooraam kee hukoomat kay paanchven saal men yahoodaah ka baadshaah bana. shuroo men vah apnay baap kay saath hukoomat karta tha. ¹⁷yahooraam 32 saal kee umr men baadshaah bana, aur vah yarooshalam men rah kar 8 saal tak hukoomat karta raha. ¹⁸us kee shaadee israaeel kay baadshaah akhiyab kee betee say huee thee, aur vah israaeel kay baadshaahon aur khaaskar akhiyab kay khaandaan kay buray namoonay par chalta raha. us ka chaal-chalan rabb ko naapsand tha. ¹⁹to bhee vah apnay khaadim daaood kee khaatir yahoodaah ko tabaah naheen karna chaahata tha, kyoonki us nay daaood say vaada kiya tha ki tera aur teree aulaad ka charaagh hamesha tak jalta rahega.

²⁰yahooraam kee hukoomat kay dauraan adomiyon nay baghaavat kee aur yahoodaah kee hukoomat ko radd karkay apna baadshaah muqarrar kiya. ²¹tab yahooraam apnay tamaam rathon ko lay kar seer kay qareeb aaya. jab jang chhid gaee to adomiyon nay usay aur us kay rathon par muqarrar afsaron ko gher liya. raat ko baadshaah ghernay vaalon kee safon ko todnay men kaamyaab ho gaya, lekin us kay faujee usay chhod kar apnay apnay ghar bhaag gaay. ²²is vajah say mulk-ay-adom aaj tak dubaara yahoodaah kee hukoomat kay tahet naheen aaya. usee vaqt libna shaher bhee sarkash ho kar khudmukhtaar ho gaya.

²³baaqee jo kuchh yahooraam kee hukoomat kay dauraan hua aur jo kuchh us nay kiya vah ‘shaahaan-ay-yahooda kee taareekh’ kee kitaab men bayaan kiya gaya hai. ²⁴jab yahooraam mar kar apnay baapdaada say ja mila to usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. phir us ka beta akhaziyaah takhtnasheen hua.

yahoodaah ka baadshaah akhaziyaah

²⁵akhaziyaah bin yahooraam israaeel kay baadshaah yooraam bin akhiyab kee hukoomat kay 12ven saal men yahoodaah ka baadshaah bana. ²⁶vah 22 saal kee umr men takhtnasheen hua aur yarooshalam men rah kar ek saal baadshaah raha. us kee maan ataliyaah israaeel kay baadshaah umree kee potee thee. ²⁷akhaziyaah bhee akhiyab kay khaandaan kay buray namoonay par chal pada. akhiyab kay gharaanay kee tarah us ka chaal-chalan rabb ko naapsand tha. vajah yah thee ki us ka rishta akhiyab kay khaandaan kay saath bandh gaya tha. ²⁸ek din akhaziyaah baadshaah yooraam bin akhiyab kay saath mil kar raamaat-jiliaad gaya taaki shaam kay baadshaah hazaael say laday. jab jang chhid gaee to yooraam shaam kay faujiyon kay haathon zakhmee huaa ²⁹aur maidaan-ay-jang ko chhod kar yazrael vaapas aaya taaki zakhm bhar jaaen. jab vah vahaan thahera hua tha to yahoodaah ka baadshaah akhaziyaah bin yahooraam us ka haal poochhnay kay liyay yazrael aaya.