2 Salaateen 9

ileesha yaahoo ko masah karta hai

¹ek din ileesha nabee nay nabiyon kay guroh men say ek ko bula kar kaha, “safar kay liyay kamarbasta ho kar raamaat-jiliaad kay liyay ravaana ho jaaen. zaitoon kay tel kee yah kuppee apnay saath lay jaaen. ²vahaan pahunch kar yaahoo bin yahoosafat bin nimsee ko talaash karen. jab us say mulaaqaat ho to usay us kay saathiyon say alag karkay kisee androonee kamray men lay jaaen. ³vahaan kuppee lay kar yaahoo kay sar par tel undel den aur kahen, ‘rabb farmaata hai ki main tujhay tel say masah karkay israaeel ka baadshaah bana deta hoon.’ is kay baad der na karen balki fauran darvaazay ko khol kar bhaag jaaen!”

⁴chunaanchay javaan nabee raamaat-jiliaad kay liyay ravaana hua. ⁵jab vahaan pahuncha to faujee afsar mil kar baithay huay thay. vah un kay qareeb gaya aur bola, “meray paas kamaandar kay liyay paighaam hai.” yaahoo nay savaal kiya, “ham men say kis kay liyay?” nabee nay javaab diya, “aap hee kay liyay.”

⁶yaahoo khada hua aur us kay saath ghar men gaya. vahaan nabee nay yaahoo kay sar par tel undel kar kaha, “rabb israaeel ka khuda farmaata hai, ‘main nay tujhay masah karkay apnee qaum ka baadshaah bana diya hai. ⁷tujhay apnay maalik akhiyab kay pooray khaandaan ko halaak karna hai. yoon main un nabiyon ka intiqaam loonga jo meree khidmat kartay huay shaheed ho gaay hain. haan, main rabb kay un tamaam khaadimon ka badla loonga jinhen eezbil nay qatl kiya hai. ⁸akhiyab ka poora gharaana tabaah ho jaaega. main us kay khaandaan kay har mard ko halaak kar doonga, khwaah vah baaligh ho ya bachcha. ⁹mera akhiyab kay khaandaan kay saath vahee sulook hoga jo main nay yarubiaam bin nabaat aur baasha bin akhiyaah kay khaandaanon kay saath kiya. ¹⁰jahaan tak eezbil ka taalluq hai usay dafnaaya naheen jaaega balki kuttay usay yazrael kee zameen par kha jaaengay’.” yah kah kar nabee darvaaza khol kar bhaag gaya.

¹¹jab yaahoo nikal kar apnay saathee afsaron kay paas vaapas aaya to unhon nay poochha, “kya sab khairiyat hai? yah deevaana aap say kya chaahata tha?” yaahoo bola, “khair, aap to is qism kay logon ko jaantay hain ki kis tarah kee gappen haanktay hain.” ¹²lekin us kay saathee is javaab say mutmain na huay, “jhoot! saheeh baat bataaen.” phir yaahoo nay unhen khul kar baat bataaee, “aadmee nay kaha, ‘rabb farmaata hai ki main nay tujhay masah karkay israaeel ka baadshaah bana diya hai’.”

¹³yah sun kar afsaron nay jaldee jaldee apnee chaadron ko utaar kar us kay saamnay seedhiyon par bichha diya. phir vah narsinga baja baja kar naara lagaanay lagay, “yaahoo baadshaah zindaabaad!”

yooraam aur akhaziyaah ka anjaam

¹⁴yaahoo bin yahoosafat bin nimsee fauran yooraam baadshaah ko takht say utaarnay kay mansoobay baandhnay laga. yooraam us vaqt pooree israaeelee fauj samet raamaat-jiliaad kay qareeb damishq kay baadshaah hazaael say lad raha tha. lekin shaher ka difa kartay karte ¹⁵baadshaah shaam kay faujiyon kay haathon zakhmee ho gaya tha aur maidaan-ay-jang ko chhod kar yazrael vaapas aaya tha taaki zakhm bhar jaaen. ab yaahoo nay apnay saathee afsaron say kaha, “agar aap vaaqaee meray saath hain to kisee ko bhee shaher say nikalnay na den, varna khatra hai ki koee yazrael ja kar baadshaah ko ittila day day.” ¹⁶phir vah rath par savaar ho kar yazrael chala gaya jahaan yooraam aaraam kar raha tha. us vaqt yahoodaah ka baadshaah akhaziyaah bhee yooraam say milnay kay liyay yazrael aaya hua tha.

¹⁷jab yazrael kay burj par khaday paheredaar nay yaahoo kay ghol ko shaher kee taraf aatay huay dekha to us nay baadshaah ko ittila dee. yooraam nay hukm diya, “ek ghudsavaar ko un kee taraf bhej kar un say maaloom karen ki sab khairiyat hai ya naheen.” ¹⁸ghudsavaar shaher say nikla aur yaahoo kay paas a kar kaha, “baadshaah poochhtay hain ki kya sab khairiyat hai?” yaahoo nay javaab diya, “is say aap ka kya vaasta? aaen, meray peechhay ho len.” burj par kay paheredaar nay baadshaah ko ittila dee, “qaasid un tak pahunch gaya hai, lekin vah vaapas naheen a raha.”

¹⁹tab baadshaah nay ek aur ghudsavaar ko bhej diya. yaahoo kay paas pahunch kar us nay bhee kaha, “baadshaah poochhtay hain ki kya sab khairiyat hai?” yaahoo nay javaab diya, “is say aap ka kya vaasta? meray peechhay ho len.” ²⁰burj par kay paheredaar nay yah dekh kar baadshaah ko ittila dee, “hamaara qaasid un tak pahunch gaya hai, lekin yah bhee vaapas naheen a raha. aisa lagta hai ki un ka raahanuma yaahoo bin nimsee hai, kyoonki vah apnay rath ko deevaanay kee tarah chala raha hai.”

²¹yooraam nay hukm diya, “meray rath ko tayyaar karo!” phir vah aur yahoodaah ka baadshaah apnay apnay rath men savaar ho kar yaahoo say milnay kay liyay shaher say niklay. un kee mulaaqaat us baagh kay paas huee jo nabot yazraelee say chheen liya gaya tha. ²²yaahoo ko pahechaan kar yooraam nay poochha, “yaahoo, kya sab khairiyat hai?” yaahoo bola, “khairiyat kaisay ho saktee hai jab teree maan eezbil kee butparastee aur jaadoogree har taraf phailee huee hai?” ²³yooraam baadshaah chilla utha, “ai akhaziyaah, ghaddaaree!” aur mud kar bhaagnay laga.

²⁴yaahoo nay fauran apnee kamaan khainch kar teer chalaaya jo seedha yooraam kay kandhon kay darmiyaan yoon laga ki dil men say guzar gaya. baadshaah ek dam apnay rath men gir pada. ²⁵yaahoo nay apnay saath vaalay afsar bidqar say kaha, “is kee laash utha kar us baagh men phaink den jo nabot yazraelee say chheen liya gaya tha. kyoonki vah din yaad karen jab ham donon apnay rathon ko is kay baap akhiyab kay peechhay chala rahay thay aur rabb nay akhiyab kay baaray men elaan kiya, ²⁶‘yaqeen jaan ki kal nabot aur us kay beton ka qatl mujh say chhupa na raha. is ka muaavaza main tujhay nabot kee isee zameen par doonga.’ chunaanchay ab yooraam ko utha kar us zameen par phaink den taaki rabb kee baat pooree ho jaaay.”

²⁷jab yahoodaah kay baadshaah akhaziyaah nay yah dekha to vah bait-gaan ka raasta lay kar faraar ho gaya. yaahoo us ka taaqqub kartay huay chillaaya, “usay bhee maar do!” ibleeaam kay qareeb jahaan raasta joor kee taraf chadhta hai akhaziyaah apnay rath men chaltay chaltay zakhmee hua. vah bach to nikla lekin majiddo pahunch kar mar gaya. ²⁸us kay mulaazim laash ko rath par rakh kar yarooshalam laaay. vahaan usay yarooshalam kay us hissay men jo ‘daaood ka shaher’ kahelaata hai khaandaanee qabr men dafnaaya gaya. ²⁹akhaziyaah yooraam bin akhiyab kee hukoomat kay 11ven saal men yahoodaah ka baadshaah ban gaya tha.

eezbil ka anjaam

³⁰is kay baad yaahoo yazrael chala gaya. jab eezbil ko ittila milee to us nay apnee aankhon men surma laga kar apnay baalon ko khoobsoortee say sanvaara aur phir khidkee say baahar jhaanknay lagee. ³¹jab yaahoo mahel kay get men daakhil hua to eezbil chillaaee, “ai zimree jis nay apnay maalik ko qatl kar diya hai, kya sab khairiyat hai?” ³²yaahoo nay oopar dekh kar aavaaz dee, “kaun meray saath hai, kaun?” do ya teen khwaajaasaraaon nay khidkee say baahar dekh kar us par nazar daalee ³³to yaahoo nay unhen hukm diya, “usay neechay phaink do!”

tab unhon nay malika ko neechay phaink diya. vah itnay zor say zameen par giree ki khoon kay chheentay deevaar aur ghodon par pad gaay. yaahoo aur us kay logon nay apnay rathon ko us kay oopar say guzarnay diya. ³⁴phir yaahoo mahel men daakhil hua aur khaaya aur piya. is kay baad us nay hukm diya, “koee jaaay aur us laantee aurat ko dafan karay, kyoonki vah baadshaah kee betee thee.”

³⁵lekin jab mulaazim usay dafan karnay kay liyay baahar niklay to dekha ki sirf us kee khopdee, haath aur paaon baaqee rah gaay hain. ³⁶yaahoo kay paas vaapas ja kar unhon nay usay aagaah kiya. tab us nay kaha, “ab sab kuchh poora hua hai jo rabb nay apnay khaadim ilyaas tishbee kee maarifat farmaaya tha, ‘yazrael kee zameen par kuttay eezbil kee laash kha jaaengay. ³⁷us kee laash yazrael kee zameen par gobar kee tarah padee rahegee taaki koee yaqeen say na kah sakay ki vah kahaan hai’.”