2 Samooel 1

daaood ko saaool aur yoontan kee maut kee khabar miltee hai

¹jab daaood amaaleeqiyon ko shikast denay say vaapas aaya to saaool baadshaah mar chuka tha. vah abhee do hee din siqlaaj men thahera thaa ²ki ek aadmee saaool kee lashkargaah say pahuncha. dukh kay izhaar kay liyay us nay apnay kapdon ko phaad kar apnay sar par khaak daal rakhee thee. daaood kay paas a kar vah baday ehatiraam kay saath us kay saamnay jhuk gaya. ³daaood nay poochha, “aap kahaan say aaay hain?” aadmee nay javaab diya, “main baal baal bach kar israaeelee lashkargaah say aaya hoon.” ⁴daaood nay poochha, “bataaen, haalaat kaisay hain?” us nay bataaya, “hamaaray bahut say aadmee maidaan-ay-jang men kaam aaay. baaqee bhaag gaay hain. saaool aur us ka beta yoontan bhee halaak ho gaay hain.”

⁵daaood nay savaal kiya, “aap ko kaisay maaloom hua ki saaool aur yoontan mar gaay hain?” ⁶javaan nay javaab diya, “ittifaaq say main jilbooa kay pahaadee silsilay par say guzar raha tha. vahaan mujhay saaool nazar aaya. vah nezay ka sahaara lay kar khada tha. dushman kay rath aur ghudsavaar taqreeban usay pakadnay hee vaalay the ⁷ki us nay mud kar mujhay dekha aur apnay paas bulaaya. main nay kaha, ‘jee, main haazir hoon.’ ⁸us nay poochha, ‘tum kaun ho?’ main nay javaab diya, ‘main amaaleeqee hoon.’ ⁹phir us nay mujhay hukm diya, ‘aao aur mujhay maar daalo! kyoonki go main zinda hoon meree jaan nikal rahee hai.’ ¹⁰chunaanchay main nay usay maar diya, kyoonki main jaanta tha ki bachnay ka koee imkaan naheen raha tha. phir main us ka taaj aur baazooband lay kar apnay maalik kay paas yahaan lay aaya hoon.”

¹¹yah sab kuchh sun kar daaood aur us kay tamaam logon nay gham kay maaray apnay kapday phaad liyay. ¹²shaam tak unhon nay ro ro kar aur roza rakh kar saaool, us kay betay yoontan aur rabb kay un baaqee logon ka maatam kiya jo maaray gaay thay.

¹³daaood nay us javaan say jo un kee maut kee khabar laaya tha poochha, “aap kahaan kay hain?” us nay javaab diya, “main amaaleeqee hoon jo ajnabee kay taur par aap kay mulk men raheta hoon.” ¹⁴daaood bola, “aap nay rabb kay masah kiay huay baadshaah ko qatl karnay kee jur’at kaisay kee?” ¹⁵us nay apnay kisee javaan ko bula kar hukm diya, “isay maar daalo!” usee vaqt javaan nay amaaleeqee ko maar daala. ¹⁶daaood nay kaha, “aap nay apnay aap ko khud mujrim thaheraaya hai, kyoonki aap nay apnay munh say iqraar kiya hai ki main nay rabb kay masah kiay huay baadshaah ko maar diya hai.”

saaool aur yoontan par maatam ka geet

¹⁷phir daaood nay saaool aur yoontan par maatam ka geet gaaya. ¹⁸us nay hidaayat dee ki yahoodaah kay tamaam baashinday yah geet yaad karen. geet ka naam ‘kamaan ka geet’ hai aur ‘yaashar kee kitaab’ men darj hai. geet yah hai,

¹⁹“haay, ai israaeel! teree shaan-o-shaukat teree bulandiyon par maaree gaee hai. haay, teray soormay kis tarah gir gaay hain!

²⁰jaat men ja kar yah khabar mat sunaana. asqaloon kee galiyon men is ka elaan mat karna, varna filistiyon kee betiyaan khushee manaaengee, naamakhtoonon kee betiyaan fatah kay naaray lagaaengee.

²¹ai jilbooa kay pahaado! ai pahaadee dhalaano! aainda tum par na os paday, na baarish barsay. kyoonki soormaaon kee dhaal naapaak ho gaee hai. ab say saaool kee dhaal tel mal kar istemaal naheen kee jaaegee.

²²yoontan kee kamaan zabardast thee, saaool kee talvaar kabhee khaalee haath na lautee. un kay hathiyaaron say hamesha dushman ka khoon tapakta raha, vah soormaaon kee charbee say chamaktay rahay.

²³saaool aur yoontan kitnay piyaaray aur meharbaan thay! jeetay jee vah ek doosray kay qareeb rahay, aur ab maut bhee unhen alag na kar sakee. vah uqaab say tez aur sherbabar say taaqatvar thay.

²⁴ai israaeel kee khavaateen! saaool kay liyay aansoo bahaaen. kyoonki usee nay aap ko qirmizee rang kay shaandaar kapdon say mulabbas kiya, usee nay aap ko sonay kay zevraat say aaraasta kiya.

²⁵haay, hamaaray soormay ladtay ladtay shaheed ho gaay hain. haay ai israaeel, yoontan murda haalat men teree bulandiyon par pada hai.

²⁶ai yoontan meray bhaaee, main teray baaray men kitna dukhee hoon. too mujhay kitna azeez tha. teree mujh say muhabbat anokhee thee, vah aurton kee muhabbat say bhee anokhee thee.

²⁷haay, haay! hamaaray soormay kis tarah gir kar shaheed ho gaay hain. jang kay hathiyaar tabaah ho gaay hain.”