2 Samooel 10

ammonee daaood kee beizzatee kartay hain

¹kuchh der kay baad ammoniyon ka baadshaah faut hua, aur us ka beta hanoon takhtnasheen hua. ²daaood nay socha, “naahas nay hamesha mujh par meharbaanee kee thee, is liyay ab main bhee us kay betay hanoon par meharbaanee karoonga.” us nay baap kee vafaat ka afsos karnay kay liyay hanoon kay paas vafad bheja.

lekin jab daaood kay safeer ammoniyon kay darbaar men pahunch gae ³to us mulk kay buzurg hanoon baadshaah kay kaan men manfee baaten bharnay lagay, “kya daaood nay in aadmiyon ko vaaqaee sirf is liyay bheja hai ki vah afsos karkay aap kay baap ka ehatiraam karen? hargiz naheen! yah sirf bahaana hai. asal men yah jaasoos hain jo hamaaray daar-ul-hakoomat kay baaray men maaloomaat haasil karna chaahatay hain taaki us par qabza kar saken.” ⁴chunaanchay hanoon nay daaood kay aadmiyon ko pakadva kar un kee daadhiyon ka aadha hissa mundva diya aur un kay libaas ko kamar say lay kar paaon tak kaat kar utaravaaya. isee haalat men baadshaah nay unhen faarigh kar diya.

⁵jab daaood ko is kee khabar milee to us nay apnay qaasidon ko un say milnay kay liyay bheja taaki unhen bataaen, “yareehoo men us vaqt tak thaheray rahen jab tak aap kee daadhiyaan dubaara bahaal na ho jaaen.” kyoonki vah apnee daadhiyon kee vajah say badee sharmindagee mahsoos kar rahay thay.

ammoniyon say jang

⁶ammoniyon ko khoob maaloom tha ki is harkat say ham daaood kay dushman ban gaay hain. is liyay unhon nay kiraaay par kaee jagahon say faujee talab kiay. bait-rahob aur zobaah kay 20,000 araamee piyaada sipaahee, maaka ka baadshaah 1,000 faujiyon samet aur mulk-ay-tob kay 12,000 sipaahee un kee madad karnay aaay. ⁷jab daaood ko is ka ilm hua to us nay yoaab ko pooree fauj kay saath un ka muqaabla karnay kay liyay bhej diya. ⁸ammonee apnay daar-ul-hakoomat rabba say nikal kar shaher kay darvaazay kay saamnay hee saf’aara huay jabki un kay araamee ittihaadee zobaah aur rahob mulk-ay-tob aur maaka kay mardon samet kuchh faasilay par khulay maidaan men khaday ho gaay.

⁹jab yoaab nay jaan liya ki saamnay aur peechhay donon taraf say hamlay ka khatra hai to us nay apnee fauj ko do hisson men taqseem kar diya. sab say achchhay faujiyon kay saath vah khud shaam kay sipaahiyon say ladnay kay liyay tayyaar hua. ¹⁰baaqee aadmiyon ko us nay apnay bhaaee abeeshai kay havaalay kar diya taaki vah ammoniyon say laden. ¹¹ek doosray say alag honay say pahelay yoaab nay abeeshai say kaha, “agar shaam kay faujee mujh par ghaalib aanay lagen to meray paas a kar meree madad karna. lekin agar aap ammoniyon par qaaboo na pa saken to main a kar aap kee madad karoonga. ¹²hausla rakhen! ham dileree say apnee qaum aur apnay khuda kay shaheron kay liyay laden. aur rabb vah kuchh honay day jo us kee nazar men theek hai.”

¹³yoaab nay apnee fauj kay saath shaam kay faujiyon par hamla kiya to vah us kay saamnay say bhaagnay lagay. ¹⁴yah dekh kar ammonee abeeshai say faraar ho kar shaher men daakhil huay. phir yoaab ammoniyon say ladnay say baaz aaya aur yarooshalam vaapas chala gaya.

shaam kay khilaaf jang

¹⁵jab shaam kay faujiyon ko shikast kee beizzatee ka ihsaas hua to vah dubaara jama ho gaay. ¹⁶hadad’azar nay darya-ay-furaat kay paar masoputaamiya men aabaad araamiyon ko bulaaya taaki vah us kee madad karen. phir sab hilaam pahunch gaay. hadad’azar kee fauj par muqarrar afsar sobak un kee raahanumaaee kar raha tha. ¹⁷jab daaood ko khabar milee to us nay israaeel kay tamaam ladnay kay qaabil aadmiyon ko jama kiya aur darya-ay-yardan ko paar karkay hilaam pahunch gaya. shaam kay faujee saf’aara ho kar israaeeliyon ka muqaabla karnay lagay. ¹⁸lekin unhen dubaara shikast maan kar faraar hona pada. is dafa un kay 700 rathbaanon kay ilaava 40,000 piyaada sipaahee halaak huay. daaood nay fauj kay kamaandar sobak ko itna zakhmee kar diya ki vah maidaan-ay-jang men halaak ho gaya.

¹⁹jo araamee baadshaah pahelay hadad’azar kay taabay thay unhon nay ab haar maan kar israaeeliyon say sulah kar lee aur un kay taabay ho gaay. us vaqt say araamiyon nay ammoniyon kee madad karnay kee phir jur’at na kee.