2 Samooel 11

daaood aur bat-sabaa

¹bahaar ka mausam a gaya, vah vaqt jab baadshaah jang kay liyay nikaltay hain. daaood baadshaah nay bhee apnay faujiyon ko ladnay kay liyay bhej diya. yoaab kee raahanumaaee men us kay afsar aur pooree fauj ammoniyon say ladnay kay liyay ravaana huay. vah dushman ko tabaah karkay daar-ul-hakoomat rabba ka muhaasara karnay lagay. daaood khud yarooshalam men raha.

²ek din vah dopaher kay vaqt so gaya. jab shaam kay vaqt jaag utha to mahel kee chhat par tahelnay laga. achaanak us kee nazar ek aurat par padee jo apnay sahen men naha rahee thee. aurat nihaayat khoobsoorat thee. ³daaood nay kisee ko us kay baaray men maaloomaat haasil karnay kay liyay bhej diya. vaapas a kar us nay ittila dee, “aurat ka naam bat-saba hai. vah ileeaam kee betee aur ooriyaah hittee kee beevee hai.” ⁴tab daaood nay qaasidon ko bat-saba kay paas bheja taaki usay mahel men lay aaen. aurat aaee to daaood us say hambistar hua. phir bat-saba apnay ghar vaapas chalee gaee. (thodee der pahelay us nay vah rasm ada kee thee jis ka taqaaza shareeat maahavaaree kay baad kartee hai taaki aurat dubaara paak-saaf ho jaaay).

⁵kuchh der kay baad usay maaloom hua ki mera paaon bhaaree ho gaya hai. us nay daaood ko ittila dee, “mera paaon bhaaree ho gaya hai.” ⁶yah suntay hee daaood nay yoaab ko paighaam bheja, “ooriyaah hittee ko meray paas bhej den!” yoaab nay usay bhej diya. ⁷jab ooriyaah darbaar men pahuncha to daaood nay us say yoaab aur fauj ka haal maaloom kiya aur poochha ki jang kis tarah chal rahee hai?

⁸phir us nay ooriyaah ko bataaya, “ab apnay ghar jaaen aur paaon dho kar aaraam karen.” ooriyaah abhee mahel say door naheen gaya tha ki ek mulaazim nay us kay peechhay bhaag kar usay baadshaah kee taraf say tuhfa diya. ⁹lekin ooriyaah apnay ghar na gaya balki raat kay liyay baadshaah kay muhaafizon kay saath thahera raha jo mahel kay darvaazay kay paas sotay thay.

¹⁰daaood ko is baat ka pata chala to us nay aglay din usay dubaara bulaaya. us nay poochha, “kya baat hai? aap to badee door say aaay hain. aap apnay ghar kyoon na gaay?” ¹¹ooriyaah nay javaab diya, “ahd ka sandooq aur israaeel aur yahoodaah kay faujee jhompadiyon men rah rahay hain. yoaab aur baadshaah kay afsar bhee khulay maidaan men thaheray huay hain to kya munaasib hai ki main apnay ghar ja kar aaraam say khaaoon piyoon aur apnee beevee say hambistar ho jaaoon? hargiz naheen! aap kee hayaat kee qasam, main kabhee aisa naheen karoonga.”

¹²daaood nay usay kaha, “ek aur din yahaan thaheren. kal main aap ko vaapas jaanay doonga.” chunaanchay ooriyaah ek aur din yarooshalam men thahera raha.

¹³shaam kay vaqt daaood nay usay khaanay kee daavat dee. us nay usay itnee mai pilaaee ki ooriyaah nashay men dhut ho gaya, lekin is martaba bhee vah apnay ghar na gaya balki dubaara mahel men muhaafizon kay saath so gaya.

daaood ooriyaah ko qatl karvaata hai

¹⁴aglay din subah daaood nay yoaab ko khat likh kar ooriyaah kay haath bhej diya. ¹⁵us men likha tha, “ooriyaah ko sab say aglee saf men khada karen, jahaan ladaaee sab say sakht hotee hai. phir achaanak peechhay kee taraf hat kar usay chhod den taaki dushman usay maar day.”

¹⁶yah padh kar yoaab nay ooriyaah ko ek aisee jagah par khada kiya jis kay baaray men usay ilm tha ki dushman kay sab say zabardast faujee vahaan ladtay hain. ¹⁷jab ammoniyon nay shaher say nikal kar un par hamla kiya to kuchh israaeelee shaheed huay. ooriyaah hittee bhee un men shaamil tha.

¹⁸yoaab nay ladaaee kee pooree riport bhej dee. ¹⁹daaood ko yah paighaam pahunchaanay vaalay ko us nay bataaya, “jab aap baadshaah ko tafseel say ladaaee ka saara silsila sunaaenge ²⁰to ho sakta hai vah ghussay ho kar kahay, ‘aap shaher kay itnay qareeb kyoon gaay? kya aap ko maaloom na tha ki dushman faseel say teer chalaaengay? ²¹kya aap ko yaad naheen ki qadeem zamaanay men jidaaoon kay betay abeemlik kay saath kya hua? taibiz shaher men ek aurat hee nay usay maar daala. aur vajah yah thee ki vah qilaay kay itnay qareeb a gaya tha ki aurat deevaar par say chakkee ka oopar ka paat us par phaink sakee. shaher kee faseel kay is qadar qareeb ladnay kee kya zaroorat thee?’ agar baadshaah aap par aisay ilzaamaat lagaaen to javaab men bas itna hee kah dena, ‘ooriyaah hittee bhee maara gaya hai’.”

²²qaasid ravaana hua. jab yarooshalam pahuncha to us nay daaood ko yoaab ka poora paighaam suna diya, ²³“dushman ham say ziyaada taaqatvar thay. vah shaher say nikal kar khulay maidaan men ham par toot paday. lekin ham nay un ka saamna yoon kiya ki vah peechhay hat gaay, balki ham nay un ka taaqqub shaher kay darvaazay tak kiya. ²⁴lekin afsos ki phir kuchh teer’andaaz ham par faseel par say teer barsaanay lagay. aap kay kuchh khaadim khet aaay aur ooriyaah hittee bhee un men shaamil hai.” ²⁵daaood nay javaab diya, “yoaab ko bata dena ki yah muaamala aap ko himmat haarnay na day. jang to aisee hee hotee hai. kabhee koee yahaan talvaar ka luqma ho jaata hai, kabhee vahaan. pooray azam kay saath shaher say jang jaaree rakh kar usay tabaah kar den. yah kah kar yoaab kee hausalaaafzaaee karen.”

²⁶jab bat-saba ko ittila milee ki ooriyaah naheen raha to us nay us ka maatam kiya. ²⁷maatam ka vaqt poora hua to daaood nay usay apnay ghar bula kar us say shaadee kar lee. phir us kay beta paida hua.

lekin daaood kee yah harkat rabb ko nihaayat buree lagee.