2 Samooel 16

zeeba mifeebosat kay baaray men jhoot bolta hai

¹daaood abhee pahaad kee chotee say kuchh aagay nikal gaya tha ki mifeebosat ka mulaazim zeeba us say milnay aaya. us kay paas do gadhay thay jin par zeenen kasee huee theen. un par 200 rotiyaan, kishmish kee 100 tikkiyaan, 100 taaza phal aur mai kee ek mashk ladee huee thee. ²baadshaah nay poochha, “aap in cheezon kay saath kya karna chaahatay hain?” zeeba nay javaab diya, “gadhay baadshaah kay khaandaan kay liyay hain, vah in par baith kar safar karen. rotee aur phal javaanon kay liyay hain, aur mai un kay liyay jo registaan men chaltay chaltay thak jaaen.” ³baadshaah nay savaal kiya, “aap kay puraanay maalik ka pota mifeebosat kahaan hai?” zeeba nay kaha, “vah yarooshalam men thahera hua hai. vah sochta hai ki aaj israaeelee mujhay baadshaah bana dengay, kyoonki main saaool ka pota hoon.” ⁴yah sun kar daaood bola, “aaj hee mifeebosat kee tamaam milkiyat aap kay naam muntaqil kee jaatee hai!” zeeba nay kaha, “main aap kay saamnay apnay ghutnay tekta hoon. rabb karay ki main apnay aaqa aur baadshaah ka manzoor-ay-nazar rahoon.” ⁵jab daaood baadshaah bahooreem kay qareeb pahuncha to ek aadmee vahaan say nikal kar us par laanten bhejnay laga. aadmee ka naam simaee bin jeera tha, aur vah saaool ka rishtedaar tha.

simaee daaood ko laan-taan karta hai

⁶vah daaood aur us kay afsaron par patthar bhee phainknay laga, agarchi daaood kay baaen aur daaen haath us kay muhaafiz aur behtareen faujee chal rahay thay. ⁷laanat kartay kartay simaee cheekh raha tha, “chal, dafa ho ja! qaatil! badam’aash! ⁸yah tera hee qusoor tha ki saaool aur us ka khaandaan tabaah huay. ab rabb tujhay jo saaool kee jagah takhtnasheen ho gaya hai is kee munaasib saza day raha hai. us nay teray betay abeesloom ko teree jagah takhtnasheen karkay tujhay tabaah kar diya hai. qaatil ko saheeh muaavaza mil gaya hai!”

⁹abeeshai bin zarooyaah baadshaah say kahenay laga, “yah kaisa murda kutta hai jo meray aaqa baadshaah par laanat karay? mujhay ijaazat den, to main ja kar us ka sar qalam kar doon.” ¹⁰lekin baadshaah nay usay rok diya, “mera aap aur aap kay bhaaee yoaab say kya vaasta? naheen, usay laanat karnay den. ho sakta hai rabb nay usay yah karnay ka hukm diya hai. to phir ham kaun hain ki usay roken.” ¹¹phir daaood tamaam afsaron say bhee mukhaatib hua, “jabki mera apna beta mujhay qatl karnay kee koshish kar raha hai to saaool ka yah rishtedaar aisa kyoon na karay? isay chhod do, kyoonki rabb nay isay yah karnay ka hukm diya hai. ¹²shaayad rabb meree museebat ka lihaaz karkay simaee kee laanten barkat men badal day.”

¹³daaood aur us kay logon nay safar jaaree rakha. simaee qareeb kee pahaadee dhalaan par us kay baraabar chaltay chaltay us par laanten bhejta aur patthar aur mittee kay dhelay phainkta raha. ¹⁴sab thakemaanday darya-ay-yardan ko pahunch gaay. vahaan daaood taazaadam ho gaya.

abeesloom yarooshalam men

¹⁵itnay men abeesloom apnay pairokaaron kay saath yarooshalam men daakhil hua tha. akheetufal bhee un kay saath mil gaya tha. ¹⁶thodee der kay baad daaood ka dost hoosee arkee abeesloom kay darbaar men haazir ho kar pukaara, “baadshaah zindaabaad! baadshaah zindaabaad!” ¹⁷yah sun kar abeesloom nay us say tanzan kaha, “yah kaisee vafaadaaree hai jo aap apnay dost daaood ko dikha rahay hain? aap apnay dost kay saath ravaana kyoon na huay?” ¹⁸hoosee nay javaab diya, “naheen, jis aadmee ko rabb aur tamaam israaeeliyon nay muqarrar kiya hai, vahee mera maalik hai, aur usee kee khidmat men main haazir rahoonga. ¹⁹doosray, agar kisee kee khidmat karnee hai to kya daaood kay betay kee khidmat karna munaasib naheen hai? jis tarah main aap kay baap kee khidmat karta raha hoon usee tarah ab aap kee khidmat karoonga.”

²⁰phir abeesloom akheetufal say mukhaatib hua, “aagay kya karna chaahiay? mujhay apna mashvra pesh karen.” ²¹akheetufal nay javaab diya, “aap kay baap nay apnee kuchh daashtaaon ko mahel sambhaalnay kay liyay yahaan chhod diya hai. un kay saath hambistar ho jaaen. phir tamaam israaeel ko maaloom ho jaaega ki aap nay apnay baap kee aisee beizzatee kee hai ki sulah ka raasta band ho gaya hai. yah dekh kar sab jo aap kay saath hain mazboot ho jaaengay.” ²²abeesloom maan gaya, aur mahel kee chhat par us kay liyay khaima lagaaya gaya. us men vah pooray israaeel kay dekhtay dekhtay apnay baap kee daashtaaon say hambistar hua.

²³us vaqt akheetufal ka har mashvra allaah kay farmaan jaisa maana jaata tha. daaood aur abeesloom donon yoon hee us kay mashvaron kee qadar kartay thay.