2 Samooel 17

hoosee aur akheetufal

¹akheetufal nay abeesloom ko ek aur mashvra bhee diya. “mujhay ijaazat den to main 12,000 faujiyon kay saath isee raat daaood ka taaqqub karoon. ²main us par hamla karoonga jab vah thakaamaanda aur bedil hai. tab vah ghabra jaaega, aur us kay tamaam faujee bhaag jaaengay. nateejatan main sirf baadshaah hee ko maar doongaa ³aur baaqee tamaam logon ko aap kay paas vaapas laaoonga. jo aadmee aap pakadna chaahatay hain us kee maut par sab vaapas a jaaengay. aur qaum men amn-o-amaan qaaim ho jaaega.”

⁴yah mashvra abeesloom aur israaeel kay tamaam buzurgon ko pasand aaya. ⁵taaham abeesloom nay kaha, “pahelay ham hoosee arkee say bhee mashvra len. koee usay bula laaay.” ⁶hoosee aaya to abeesloom nay us kay saamnay akheetufal ka mansooba bayaan karkay poochha, “aap ka kya khayaal hai? kya hamen aisa karna chaahiay, ya aap kee koee aur raay hai?”

⁷hoosee nay javaab diya, “jo mashvra akheetufal nay diya hai vah is dafa theek naheen. ⁸aap to apnay vaalid aur un kay aadmiyon say vaaqif hain. vah sab maahir faujee hain. vah us reechhnee kee see shiddat say ladengay jis say us kay bachchay chheen liyay gaay hain. yah bhee zahen men rakhna chaahiay ki aap ka baap tajaribaakaar faujee hai. imkaan naheen ki vah raat ko apnay faujiyon kay darmiyaan guzaarega. ⁹ghaaliban vah is vaqt bhee gaheree khaaee ya kaheen aur chhup gaya hai. ho sakta hai vah vahaan say nikal kar aap kay daston par hamla karay aur ibtida hee men aap kay thoday bahut afraad mar jaaen. phir afwaah phail jaaegee ki abeesloom kay daston men qatl-ay-aam shuroo ho gaya hai. ¹⁰yah sun kar aap kay tamaam afraad dar kay maaray bedil ho jaaengay, khwaah vah sherbabar jaisay bahaadur kyoon na hon. kyoonki tamaam israaeel jaanta hai ki aap ka baap behtareen faujee hai aur ki us kay saathee bhee diler hain.

¹¹yah pesh-ay-nazar rakh kar main aap ko ek aur mashvra deta hoon. shimaal men daan say lay kar junoob men bair-saba tak ladnay kay qaabil tamaam israaeeliyon ko bulaaen. itnay jama karen ki vah saahil kee ret kee maanind hongay, aur aap khud un kay aagay chal kar ladnay kay liyay niklen. ¹²phir ham daaood ka khoj laga kar us par hamla karengay. ham us tarah us par toot padengay jis tarah os zameen par girtee hai. sab kay sab halaak ho jaaengay, aur na vah aur na us kay aadmee bach paaengay. ¹³agar daaood kisee shaher men panaah lay to tamaam israaeelee faseel kay saath rassay laga kar pooray shaher ko vaadee men ghaseet lay jaaengay. patthar par patthar baaqee naheen rahega!”

¹⁴abeesloom aur tamaam israaeeliyon nay kaha, “hoosee ka mashvra akheetufal kay mashvray say behatar hai.” haqeeqat men akheetufal ka mashvra kaheen behatar tha, lekin rabb nay usay naakaam honay diya taaki abeesloom ko museebat men daalay.

daaood ko abeesloom ka mansooba bataaya jaata hai

¹⁵hoosee nay donon imaamon sadoq aur abiyaatar ko vah mansooba bataaya jo akheetufal nay abeesloom aur israaeel kay buzurgon ko pesh kiya tha. saath saath us nay unhen apnay mashvray kay baaray men bhee aagaah kiya. ¹⁶us nay kaha, “ab fauran daaood ko ittila den ki kisee soorat men bhee is raat ko darya-ay-yardan kee us jagah par na guzaaren jahaan log darya ko paar kartay hain. laazim hai ki aap aaj hee darya ko uboor kar len, varna aap tamaam saathiyon samet barbaad ho jaaengay.”

¹⁷yoontan aur akheemaaz yarooshalam say baahar kay chashmay ain-raajil kay paas intizaar kar rahay thay, kyoonki vah shaher men daakhil ho kar kisee ko nazar aanay ka khatra mol naheen lay saktay thay. ek naukraanee shaher say nikal aaee aur unhen hoosee ka paighaam day diya taaki vah aagay nikal kar usay daaood tak pahunchaaen. ¹⁸lekin ek javaan nay unhen dekha aur bhaag kar abeesloom ko ittila dee. donon jaldee jaldee vahaan say chalay gaay aur ek aadmee kay ghar men chhup gaay jo bahooreem men raheta tha. us kay sahen men kuaan tha. us men vah utar gaay. ¹⁹aadmee kee beevee nay kuen kay munh par kapda bichha kar us par anaaj kay daanay bikher diay taaki kisee ko maaloom na ho ki vahaan kuaan hai.

²⁰abeesloom kay sipaahee us ghar men pahunchay aur aurat say poochhnay lagay, “akheemaaz aur yoontan kahaan hain?” aurat nay javaab diya, “vah aagay nikal chukay hain, kyoonki vah nadee ko paar karna chaahatay thay.” sipaahee donon aadmiyon ka khoj lagaatay lagaatay thak gaay. aakhirkaar vah khaalee haath yarooshalam laut gaay.

²¹jab chalay gaay to akheemaaz aur yoontan kuen say nikal kar seedhay daaood baadshaah kay paas chalay gaay taaki usay paighaam sunaaen. unhon nay kaha, “laazim hai ki aap darya ko fauran paar karen!” phir unhon nay daaood ko akheetufal ka poora mansooba bataaya. ²²daaood aur us kay tamaam saathee jald hee ravaana huay aur usee raat darya-ay-yardan ko uboor kiya. pau phattay vaqt ek bhee peechhay naheen rah gaya tha.

²³jab akheetufal nay dekha ki mera mashvra radd kiya gaya hai to vah apnay gadhay par zeen kas kar apnay vatnee shaher vaapas chala gaya. vahaan us nay ghar kay tamaam muaamalaat ka band-o-bast kiya, phir ja kar phaansee lay lee. usay us kay baap kee qabr men dafnaaya gaya.

²⁴jab daaood mahenaaim pahunch gaya to abeesloom israaeelee fauj kay saath darya-ay-yardan ko paar karnay laga. ²⁵us nay amaasa ko fauj par muqarrar kiya tha, kyoonki yoaab to daaood kay saath tha. amaasa ek ismaaeelee banaam itra ka beta tha. us kee maan abeejel bint naahas thee, aur vah yoaab kee maan zarooyaah kee bahen thee. ²⁶abeesloom aur us kay saathiyon nay mulk-ay-jiliaad men padaao daala.

²⁷jab daaood mahenaaim pahuncha to teen aadmiyon nay us ka istiqbaal kiya. sobee bin naahas ammoniyon kay daar-ul-hakoomat rabba say, makeer bin ammeeel lo-dibaar say aur barzillee jiliaadee raajileem say aaay. ²⁸teenon nay daaood aur us kay logon ko bistar, baasan, mittee kay bartan, gandum, jau, maida, anaaj kay bhunay huay daanay, lobiya, masoor, ²⁹shahed, dahee, bhed-bakriyaan aur gaay kay doodh ka paneer muhayya kiya. kyoonki unhon nay socha, “yah log registaan men chaltay chaltay zaroor bhookay, piyaasay aur thakemaanday ho gaay hongay.”