2 Samooel 19
yoaab daaood ko samjhaata hai
1yoaab ko ittila dee gaee, “baadshaah rotay rotay abeesloom ka maatam kar raha hai.” 2jab faujiyon ko khabar milee ki baadshaah apnay betay ka maatam kar raha hai to fatah paanay par un kee saaree khushee kaafoor ho gaee. har taraf maatam aur gham ka samaan tha. 3us din daaood kay aadmee choree choree shaher men ghus aaay, aisay logon kee tarah jo maidaan-ay-jang say faraar honay par sharmaatay huay chupkay say shaher men a jaatay hain.
4baadshaah abhee kamray men baitha tha. apnay munh ko dhaamp kar vah cheekhta chillaata raha, “haay meray betay abeesloom! haay abeesloom, meray betay, meray betay!” 5tab yoaab us kay paas ja kar usay samjhaanay laga, “aaj aap kay khaadimon nay na sirf aap kee jaan bachaaee hai balki aap kay beton, betiyon, beeviyon aur daashtaaon kee jaan bhee. to bhee aap nay un ka munh kaala kar diya hai. 6jo aap say nafrat kartay hain un say aap muhabbat rakhtay hain jabki jo aap say piyaar kartay hain un say aap nafrat kartay hain. aaj aap nay saaf zaahir kar diya hai ki aap kay kamaandar aur dastay aap kee nazar men koee haisiyat naheen rakhtay. haan, aaj main nay jaan liya hai ki agar abeesloom zinda hota to aap khush hotay, khwaah ham baaqee tamaam log halaak kyoon na ho jaatay. 7ab uth kar baahar jaaen aur apnay khaadimon kee hausalaaafzaaee karen. rabb kee qasam, agar aap baahar na nikalengay to raat tak ek bhee aap kay saath naheen rahega. phir aap par aisee museebat aaegee jo aap kee javaanee say lay kar aaj tak aap par naheen aaee hai.”
8tab daaood utha aur shaher kay darvaazay kay paas utar aaya. jab faujiyon ko bataaya gaya ki baadshaah shaher kay darvaazay men baitha hai to vah sab us kay saamnay jama huay. itnay men israaeelee apnay ghar bhaag gaay thay.
daaood yarooshalam vaapas aata hai
9israaeel kay tamaam qabeelon men log aapas men bahs-mubaahasa karnay lagay, “daaood baadshaah nay hamen hamaaray dushmanon say bachaaya, aur usee nay hamen filistiyon kay haath say aazaad kar diya. lekin abeesloom kee vajah say vah mulk say hijrat kar gaya hai. 10ab jab abeesloom jisay ham nay masah karkay baadshaah banaaya tha mar gaya hai to aap baadshaah ko vaapas laanay say kyoon jhijaktay hain?”
11daaood nay sadoq aur abiyaatar imaamon kee maarifat yahoodaah kay buzurgon ko ittila dee, “yah baat mujh tak pahunch gaee hai ki tamaam israaeel apnay baadshaah ka istiqbaal karkay usay mahel men vaapas laana chaahata hai. to phir aap kyoon der kar rahay hain? kya aap mujhay vaapas laanay men sab say aakhir men aana chaahatay hain? 12aap meray bhaaee, meray qareebee rishtedaar hain. to phir aap baadshaah ko vaapas laanay men aakhir men kyoon a rahay hain?” 13aur abeesloom kay kamaandar amaasa ko donon imaamon nay daaood ka yah paighaam pahunchaaya, “sunen, aap meray bhateejay hain, is liyay ab say aap hee yoaab kee jagah meree fauj kay kamaandar hongay. allaah mujhay sakht saza day agar main apna yah vaada poora na karoon.”
14is tarah daaood yahoodaah kay tamaam dilon ko jeet saka, aur sab kay sab us kay peechhay lag gaay. unhon nay usay paighaam bheja, “vaapas aaen, aap bhee aur aap kay tamaam log bhee.” 15tab daaood yarooshalam vaapas chalnay laga. jab vah darya-ay-yardan tak pahuncha to yahoodaah kay log jiljaal men aaay taaki us say milen aur usay darya kay doosray kinaaray tak pahunchaaen.
daaood simaee ko muaaf kar deta hai
16binymeenee shaher bahooreem ka simaee bin jeera bhee bhaag kar yahoodaah kay aadmiyon kay saath daaood say milnay aaya. 17binyameen kay qabeelay kay hazaar aadmee us kay saath thay. saaool ka puraana naukar zeeba bhee apnay 15 beton aur 20 naukron samet un men shaamil tha. baadshaah kay yardan kay kinaaray tak pahunchnay say pahelay pahele 18vah jaldee say darya ko uboor karkay us kay paas aaay taaki baadshaah kay gharaanay ko darya kay doosray kinaaray tak pahunchaaen aur har tarah say baadshaah ko khush rakhen.
daaood darya ko paar karnay ko tha ki simaee aundhay munh us kay saamnay gir gaya. 19us nay iltimaas kee, “meray aaqa, mujhay muaaf karen. jo ziyaadtee main nay us din aap say kee jab aap ko yarooshalam ko chhodna pada vah yaad na karen. baraah-ay-karam yah baat apnay zahen say nikaal den. 20main nay jaan liya hai ki mujh say bada jurm sarzad hua hai, is liyay aaj main yoosuf kay gharaanay kay tamaam afraad say pahelay hee apnay aaqa aur baadshaah kay huzoor a gaya hoon.”
21abeeshai bin zarooyaah bola, “simaee saza-ay-maut kay laaiq hai! us nay rabb kay masah kiay huay baadshaah par laanat kee hai.” 22lekin daaood nay usay daanta, “mera aap aur aap kay bhaaee yoaab kay saath kya vaasta? aisee baaton say aap is din meray mukhaalif ban gaay hain! aaj to israaeel men kisee ko saza-ay-maut denay ka naheen balki khushee ka din hai. dekhen, is din main dubaara israaeel ka baadshaah ban gaya hoon!” 23phir baadshaah simaee say mukhaatib hua, “rabb kee qasam, aap naheen marengay.”
mifeebosat daaood say milnay aata hai
24saaool ka pota mifeebosat bhee baadshaah say milnay aaya. us din say jab daaood ko yarooshalam ko chhodna pada aaj tak jab vah salaamatee say vaapas pahuncha mifeebosat maatam kee haalat men raha tha. na us nay apnay paaon na apnay kapday dhoay thay, na apnee moonchhon kee kaant-chhaant kee thee. 25jab vah baadshaah say milnay kay liyay yarooshalam say nikla to baadshaah nay us say savaal kiya, “mifeebosat, aap meray saath kyoon naheen gaay thay?”
26us nay javaab diya, “meray aaqa aur baadshaah, main jaanay kay liyay tayyaar tha, lekin mera naukar zeeba mujhay dhoka day kar akela hee chala gaya. main nay to usay bataaya tha, ‘meray gadhay par zeen kaso taaki main baadshaah kay saath ravaana ho sakoon.’ aur mera jaanay ka koee aur vaseela tha naheen, kyoonki main donon taangon say maazoor hoon. 27zeeba nay mujh par tuhamat lagaaee hai. lekin meray aaqa aur baadshaah allaah kay farishtay jaisay hain. meray saath vahee kuchh karen jo aap ko munaasib lagay. 28meray daada kay pooray gharaanay ko aap halaak kar saktay thay, lekin phir bhee aap nay meree izzat karkay un mehamaanon men shaamil kar liya jo rozaana aap kee mez par khaana khaatay hain. chunaanchay mera kya haq hai ki main baadshaah say mazeed apeel karoon.”
29baadshaah bola, “ab bas karen. main nay faisla kar liya hai ki aap kee zameenen aap aur zeeba men baraabar taqseem kee jaaen.” 30mifeebosat nay javaab diya, “vah sab kuchh lay lay. meray liyay yahee kaafee hai ki aaj meray aaqa aur baadshaah salaamatee say apnay mahel men vaapas a pahunchay hain.”
daaood aur barzillee
31barzillee jiliaadee raajileem say aaya tha taaki baadshaah kay saath darya-ay-yardan ko paar karkay usay rukhsat karay. 32barzillee 80 saal ka tha. mahenaaim men rahetay vaqt usee nay daaood kee mehamaan-navaazee kee thee, kyoonki vah bahut ameer tha. 33ab daaood nay barzillee ko daavat dee, “meray saath yarooshalam ja kar vahaan rahen! main aap ka har tarah say khayaal rakhoonga.”
34lekin barzillee nay inkaar kiya, “meree zindagee kay thoday din baaqee hain, main kyoon yarooshalam men ja basoon? 35meree umr 80 saal hai. na main achchhee aur buree cheezon men imtiyaaz kar sakta, na mujhay khaanay-peenay kee cheezon ka maza aata hai. geet gaanay vaalon kee aavaazen bhee mujh say sunee naheen jaateen. naheen meray aaqa aur baadshaah, agar main aap kay saath jaaoon to aap kay liyay sirf bojh ka baais hoonga. 36is kee zaroorat naheen ki aap mujhay is qism ka muaavaza den. main bas aap kay saath darya-ay-yardan ko paar karoongaa 37aur phir agar ijaazat ho to vaapas chala jaaoonga. main apnay hee shaher men marna chaahata hoon, jahaan meray maan-baap kee qabr hai. lekin mera beta kimhaam aap kee khidmat men haazir hai. vah aap kay saath chala jaaay to aap us kay liyay vah kuchh karen jo aap ko munaasib lagay.”
38daaood nay javaab diya, “theek hai, kimhaam meray saath jaaay. aur jo kuchh bhee aap chaahengay main us kay liyay karoonga. agar koee kaam hai jo main aap kay liyay kar sakta hoon to main haazir hoon.”
39phir daaood nay apnay saathiyon samet darya ko uboor kiya. barzillee ko bosa day kar us nay usay barkat dee. barzillee apnay shaher vaapas chal padaa 40jabki daaood jiljaal kee taraf badh gaya. kimhaam bhee saath gaya. is kay ilaava yahoodaah kay sab aur israaeel kay aadhay log us kay saath chalay.
israaeel aur yahoodaah aapas men jhagadtay hain
41raastay men israaeel kay mard baadshaah kay paas a kar shikaayat karnay lagay, “hamaaray bhaaiyon yahoodaah kay logon nay aap ko aap kay gharaanay aur faujiyon samet choree choree kyoon darya-ay-yardan kay maghribee kinaaray tak pahunchaaya? yah theek naheen hai.”
42yahoodaah kay mardon nay javaab diya, “baat yah hai ki ham baadshaah kay qareebee rishtedaar hain. aap ko yah dekh kar ghussa kyoon a gaya hai? na ham nay baadshaah ka khaana khaaya, na us say koee tuhfa paaya hai.”
43to bhee israaeel kay mardon nay etiraaz kiya, “hamaaray das qabeelay hain, is liyay hamaara baadshaah kee khidmat karnay ka das guna ziyaada haq hai. to phir aap hamen haqeer kyoon jaantay hain? ham nay to pahelay apnay baadshaah ko vaapas laanay kee baat kee thee.” yoon bahs-mubaahasa jaaree raha, lekin yahoodaah kay mardon kee baaten ziyaada sakht theen.