2 Samooel 21

saaool kay jurm ka kaffaaraa

¹daaood kee hukoomat kay dauraan kaal pad gaya jo teen saal tak jaaree raha. jab daaood nay is kee vajah darayaaft kee to rabb nay javaab diya, “kaal is liyay khatm naheen ho raha ki saaool nay jibaooniyon ko qatl kiya tha.”

²tab baadshaah nay jibaooniyon ko bula liya taaki un say baat karay. asal men vah israaeelee naheen balki amoriyon ka bacha khacha hissa thay. mulk-ay-kan’aan par qabza kartay vaqt israaeeliyon nay qasam kha kar vaada kiya tha ki ham aap ko halaak naheen karengay. lekin saaool nay israaeel aur yahoodaah kay liyay josh men a kar unhen halaak karnay kee koshish kee thee.

³daaood nay jibaooniyon say poochha, “main us ziyaadtee ka kaffaara kis tarah day sakta hoon jo aap say huee hai? main aap kay liyay kya karoon taaki aap dubaara us zameen ko barkat den jo rabb nay hamen meeraas men dee hai?” ⁴unhon nay javaab diya, “jo saaool nay hamaaray aur hamaaray khaandaanon kay saath kiya hai us ka izaala sonay-chaandee say naheen kiya ja sakta. yah bhee munaasib naheen ki ham is kay ivz kisee israaeelee ko maar den.” daaood nay savaal kiya, “to phir main aap kay liyay kya karoon?” ⁵jibaooniyon nay kaha, “saaool hee nay hamen halaak karnay ka mansooba banaaya tha, vahee hamen tabaah karna chaahata tha taaki ham israaeel kee kisee bhee jagah qaaim na rah saken. ⁶is liyay saaool kee aulaad men say saat mardon ko hamaaray havaalay kar den. ham unhen rabb kay chunay huay baadshaah saaool kay vatnee shaher jibia men rabb kay pahaad par maut kay ghaat utaar kar us kay huzoor latka den.”

baadshaah nay javaab diya, “main unhen aap kay havaalay kar doonga.” ⁷yoontan ka beta mifeebosat saaool ka pota to tha, lekin baadshaah nay usay na chheda, kyoonki us nay rabb kee qasam kha kar yoontan say vaada kiya tha ki main aap kee aulaad ko kabhee nuqsaan naheen pahunchaaoonga. ⁸chunaanchay us nay saaool kee daashta risfa bint ayyaah kay do beton armonee aur mifeebosat ko aur is kay ilaava saaool kee betee meerab kay paanch beton ko chun liya. meerab barzillee mahoolaatee kay betay adreeel kee beevee thee. ⁹in saat aadmiyon ko daaood nay jibaooniyon kay havaalay kar diya.

saaton aadmiyon ko mazkoora pahaad par laaya gaya. vahaan jibaooniyon nay unhen qatl karkay rabb kay huzoor latka diya. vah sab ek hee din mar gaay. us vaqt jau kee fasal kee kataaee shuroo huee thee.

¹⁰tab risfa bint ayyaah saaton laashon kay paas gaee aur patthar par apnay liyay taat ka kapda bichha kar laashon kee hifaazat karnay lagee. din kay vaqt vah parindon ko bhagaatee aur raat kay vaqt janglee jaanvaron ko laashon say door rakhtee rahee. vah bahaar kay mausam men fasal kee kataaee kay pahelay dinon say lay kar us vaqt tak vahaan thaheree rahee jab tak baarish na huee.

¹¹jab daaood ko maaloom hua ki saaool kee daashta risfa nay kya kiya hai ^12-14 to vah yabees-jiliaad kay baashindon kay paas gaya aur un say saaool aur us kay betay yoontan kee haddiyon ko lay kar saaool kay baap qees kee qabr men dafnaaya. (jab filistiyon nay jilbooa kay pahaadee ilaaqay men israaeeliyon ko shikast dee thee to unhon nay saaool aur yoontan kee laashon ko bait-shaan kay chauk men latka diya tha. tab yabees-jiliaad kay aadmee choree choree vahaan a kar laashon ko apnay paas lay gaay thay.) daaood nay jibia men ab tak latkee saat laashon ko bhee utaar kar zila men qees kee qabr men dafnaaya. zila binyameen kay qabeelay kee aabaadee hai.

jab sab kuchh daaood kay hukm kay mutaabiq kiya gaya tha to rabb nay mulk kay liyay duaaen sun leen.

filistiyon say jangen

¹⁵ek aur baar filistiyon aur israaeeliyon kay darmiyaan jang chhid gaee. daaood apnee fauj samet filistiyon say ladnay kay liyay nikla. jab vah ladta ladta nidhaal ho gaya thaa ¹⁶to ek filistee nay us par hamla kiya jis ka naam ishbee-banob tha. yah aadmee rafa deo kee nasal say tha. us kay paas naee talvaar aur itna lamba neza tha ki sirf us kee peetal kee nok ka vazan taqreeban saadhay 3 kilograam tha. ¹⁷lekin abeeshai bin zarooyaah daud kar daaood kee madad karnay aaya aur deo ko maar daala. is kay baad daaood kay faujiyon nay qasam khaaee, “aainda aap ladnay kay liyay hamaaray saath naheen nikalengay. aisa na ho ki israaeel ka charaagh bujh jaaay.”

¹⁸is kay baad israaeeliyon ko joob kay qareeb bhee filistiyon say ladna pada. vahaan sibbakee hoosaatee nay rafa deo kee aulaad men say ek aadmee ko maar daala jis ka naam saf tha.

¹⁹joob kay qareeb ek aur ladaaee chhid gaee. is kay dauraan bait-lahem kay ilhanaan bin yaaray-urjeem nay jaatee jaaloot ko maut kay ghaat utaar diya. jaaloot ka neza khaddee kay shaheteer jaisa bada tha. ²⁰ek aur dafa jaat kay paas ladaaee huee. filistiyon ka ek faujee jo rafa kee nasal ka tha bahut lamba tha. us kay haathon aur pairon kee chhah chhah ungaliyaan yaanee mil kar 24 ungaliyaan theen. ²¹jab vah israaeeliyon ka mazaaq udaanay laga to daaood kay bhaaee sim’a kay betay yoontan nay usay maar daala. ²²jaat kay yah deo rafa kee aulaad thay, aur vah daaood aur us kay faujiyon kay haathon halaak huay.