2 Samooel 22
daaood ka geet
1jis din rabb nay daaood ko tamaam dushmanon aur saaool kay haath say bachaaya us din baadshaah nay geet gaaya,
2“rabb meree chataan, mera qil’a aur mera najaatadihanda hai.
3mera khuda meree chataan hai jis men main panaah leta hoon. vah meree dhaal, meree najaat ka pahaad, mera buland hisaar aur meree panaahgaah hai. too mera najaatadihanda hai jo mujhay zulm-o-tashaddud say bachaata hai.
4main rabb ko pukaarta hoon, us kee tamjeed ho! tab vah mujhay dushmanon say chhutkaara deta hai.
5maut kee maujon nay mujhay gher liya, halaakat kay sailaab nay meray dil par dahshat taaree kee.
6paataal kay rasson nay mujhay jakad liya, maut nay meray raastay men apnay phanday daal diay.
7jab main museebat men phans gaya to main nay rabb ko pukaara. main nay madad kay liyay apnay khuda say faryaad kee to us nay apnee sukoonatgaah say meree aavaaz sunee, meree cheekhen us kay kaan tak pahunch gaeen.
8tab zameen laraz uthee aur thartharaanay lagee, aasmaan kee bunyaaden rabb kay ghazab kay saamnay kaampnay aur jhoolnay lageen.
9us kee naak say dhuaan nikal aaya, us kay munh say bhasm karnay vaalay sholay aur dahektay koilay bhadak uthay.
10aasmaan ko jhuka kar vah naazil hua. jab utar aaya to us kay paaon kay neechay andhera hee andhera tha.
11vah karoobee farishtay par savaar hua aur ud kar hava kay paron par mandalaanay laga.
12us nay andheray ko apnee chhupnay kee jagah banaaya, baarish kay kaalay aur ghanay baadal khaimay kee tarah apnay ird-gird lagaaay.
13us kay huzoor kee tez raushnee say sholaazan koilay phoot niklay.
14rabb aasmaan say kadaknay laga, allaah t’aala kee aavaaz goonj uthee.
15us nay apnay teer chala diay to dushman tittar-bittar ho gaay. us kee bijlee idhar udhar girtee gaee to un men halchal mach gaee.
16rabb nay daanta to samundar kee vaadiyaan zaahir hueen, jab vah ghussay men garja to us kay dam kay jhonkon say zameen kee bunyaaden nazar aaeen.
17bulandiyon par say apna haath badha kar us nay mujhay pakad liya, gaheray paanee men say khainch kar mujhay nikaal laaya.
18us nay mujhay meray zabardast dushman say bachaaya, un say jo mujh say nafrat kartay hain, jin par main ghaalib na a saka.
19jis din main museebat men phans gaya us din unhon nay mujh par hamla kiya, lekin rabb mera sahaara bana raha.
20us nay mujhay tang jagah say nikaal kar chhutkaara diya, kyoonki vah mujh say khush tha.
21rabb mujhay meree raastbaazee ka ajr deta hai. meray haath saaf hain, is liyay vah mujhay barkat deta hai.
22kyoonki main rabb kee raahon par chalta raha hoon, main badee karnay say apnay khuda say door naheen hua.
23us kay tamaam ahkaam meray saamnay rahay hain, main us kay farmaanon say naheen hata.
24us kay saamnay hee main beilzaam raha, gunaah karnay say baaz raha hoon.
25is liyay rabb nay mujhay meree raastbaazee ka ajr diya, kyoonki us kee aankhon kay saamnay hee main paak-saaf saabit hua.
26ai allaah, jo vafaadaar hai us kay saath tera sulook vafaadaaree ka hai, jo beilzaam hai us kay saath tera sulook beilzaam hai.
27jo paak hai us kay saath tera sulook paak hai. lekin jo kajrau hai us kay saath tera sulook bhee kajarvee ka hai.
28too pastahaalon ko najaat deta hai, aur teree aankhen maghrooron par lagee rahetee hain taaki unhen past karen.
29ai rabb, too hee mera charaagh hai, rabb hee meray andheray ko raushan karta hai.
30kyoonki teray saath main faujee dastay par hamla kar sakta, apnay khuda kay saath deevaar ko phalaang sakta hoon.
31allaah kee raah kaamil hai, rabb ka farmaan khaalis hai. jo bhee us men panaah lay us kee vah dhaal hai.
32kyoonki rabb kay siva kaun khuda hai? hamaaray khuda kay siva kaun chataan hai?
33allaah mujhay quvvat say kamarbasta karta, vah meree raah ko kaamil kar deta hai.
34vah meray paaon ko hiran kee see phurtee ata karta, mujhay mazbootee say meree bulandiyon par khada karta hai.
35vah meray haathon ko jang karnay kee tarbiyat deta hai. ab meray baazoo peetal kee kamaan ko bhee taan letay hain.
36ai rabb, too nay mujhay apnee najaat kee dhaal bakhsh dee hai, teree narmee nay mujhay bada bana diya hai.
37too meray qadmon kay liyay raasta bana deta hai, is liyay meray takhnay naheen dagmagaatay.
38main nay apnay dushmanon ka taaqqub karkay unhen kuchal diya, main baaz na aaya jab tak vah khatm na ho gaay.
39main nay unhen tabaah karkay yoon paash paash kar diya ki dubaara uth na sakay balki gir kar meray paaon talay paday rahay.
40kyoonki too nay mujhay jang karnay kay liyay quvvat say kamarbasta kar diya, too nay meray mukhaalifon ko meray saamnay jhuka diya.
41too nay meray dushmanon ko meray saamnay say bhaga diya, aur main nay nafrat karnay vaalon ko tabaah kar diya.
42vah madad kay liyay cheekhtay chillaatay rahay, lekin bachaanay vaala koee naheen tha. vah rabb ko pukaartay rahay, lekin us nay javaab na diya.
43main nay unhen choor choor karkay gard kee tarah hava men uda diya. main nay unhen galee men mittee kee tarah paaon talay raund kar reza reza kar diya.
44too nay mujhay meree qaum kay jhagdon say bacha kar aqvaam par meree hukoomat qaaim rakhee hai. jis qaum say main naavaaqif tha vah meree khidmat kartee hai.
45pardesee dabak kar meree khushaamad kartay hain. joon hee main baat karta hoon to vah meree suntay hain.
46vah himmat haar kar kaamptay huay apnay qilaon say nikal aatay hain.
47rabb zinda hai! meree chataan kee tamjeed ho! meray khuda kee taazeem ho jo meree najaat kee chataan hai.
48vahee khuda hai jo mera intiqaam leta, aqvaam ko meray taabay kar detaa
49aur mujhay meray dushmanon say chhutkaara deta hai. yaqeenan too mujhay meray mukhaalifon par sarfaraaz karta, mujhay zaalimon say bachaaay rakhta hai.
50ai rabb, is liyay main aqvaam men teree hamd-o-sana karoonga, teray naam kee taareef men geet gaaoonga.
51kyoonki rabb apnay baadshaah ko badee najaat deta hai, vah apnay masah kiay huay baadshaah daaood aur us kee aulaad par hamesha tak meharbaan rahega.”