2 Samooel 23

daaood kay aakhiree alfaaz

¹darj-ay-zail daaood kay aakhiree alfaaz hain :

“daaood bin yassee ka farmaan jisay allaah nay sarfaraaz kiya, jisay yaaqoob kay khuda nay masah karkay baadshaah bana diya tha, aur jis kee taareef israaeel kay geet kartay hain,

²rabb kay rooh nay meree maarifat baat kee, us ka farmaan meree zabaan par tha.

³israaeel kay khuda nay farmaaya, israaeel kee chataan mujh say hamkalaam huee, ‘jo insaaf say hukoomat karta hai, jo allaah ka khauf maan kar hukmraanee karta hai,

⁴vah subah kee raushnee kee maanind hai, us tuloo-ay-aaftaab kee maanind jab baadal chhaaay naheen hotay. jab us kee kirnen baarish kay baad zameen par padtee hain to pauday phoot nikaltay hain.’

⁵yaqeenan mera gharaana mazbootee say allaah kay saath hai, kyoonki us nay meray saath abdee ahd baandha hai, aisa ahd jis ka har paheloo munazzam aur mahfooz hai. vah meree najaat takmeel tak pahunchaaega aur meree har aarzoo pooree karega.

⁶lekin bedeen khaardaar jhaadiyon kee maanind hain jo hava kay jhonkon say idhar udhar bikhar gaee hain. kaanton kee vajah say koee bhee haath naheen lagaata.

⁷log unhen lohay kay auzaar ya nezay kay dastay say jama karkay vaheen kay vaheen jala detay hain.”

daaood kay soormaa

⁸darj-ay-zail daaood kay soormaaon kee faherist hai. jo teen afsar yoaab kay bhaaee abeeshai kay ain baad aatay thay un men yosheb-bashebat tahkamoonee pahelay nambar par aata tha. ek baar us nay apnay nezay say 800 aadmiyon ko maar diya.

⁹in teen afsaron men say doosree jagah par ileeazar bin dodo bin akhoohee aata tha. ek jang men jab unhon nay filistiyon ko chailenj diya tha aur israaeelee baad men peechhay hat gaay to ileeazar daaood kay saath ¹⁰filistiyon ka muqaabla karta raha. us din vah filistiyon ko maartay maartay itna thak gaya ki aakhirkaar talvaar utha na saka balki haath talvaar kay saath jam gaya. rabb nay us kee maarifat badee fatah bakhshee. baaqee dastay sirf laashon ko lootnay kay liyay laut aaay.

¹¹us kay baad teesree jagah par samma bin ajee-haraaree aata tha. ek martaba filistee lahee kay qareeb masoor kay khet men israaeel kay khilaaf lad rahay thay. israaeelee faujee un kay saamnay bhaagnay lagay, ¹²lekin samma khet kay darmiyaan tak badh gaya aur vahaan ladtay ladtay filistiyon ko shikast dee. rabb nay us kee maarifat badee fatah bakhshee.

^13-14 ek aur jang kay dauraan daaood adullaam kay ghaar kay pahaadee qilaay men tha jabki filistee fauj nay vaadee-ay-rafaaeem men apnee lashkargaah lagaaee thee. un kay daston nay bait-lahem par bhee qabza kar liya tha. fasal ka mausam tha. daaood kay tees aala afsaron men say teen us say milnay aaay. ¹⁵daaood ko shadeed piyaas lagee, aur vah kahenay laga, “kaun meray liyay bait-lahem kay darvaazay par kay hauz say kuchh paanee laaega?” ¹⁶yah sun kar teenon afsar filistiyon kee lashkargaah par hamla karkay us men ghus gaay aur ladtay ladtay bait-lahem kay hauz tak pahunch gaay. us say kuchh paanee bhar kar vah usay daaood kay paas lay aaay. lekin us nay peenay say inkaar kar diya balki usay qurbaanee kay taur par undel kar rabb ko pesh kiyaa ¹⁷aur bola, “rabb na karay ki main yah paanee piyoon. agar aisa karta to un aadmiyon ka khoon peeta jo apnee jaan par khel kar paanee laaay hain.” is liyay vah usay peena naheen chaahata tha. yah in teen soormaaon kay zabardast kaamon kee ek misaal hai.

^18-19 yoaab bin zarooyaah ka bhaaee abeeshai mazkoora teen soormaaon par muqarrar tha. ek dafa us nay apnay nezay say 300 aadmiyon ko maar daala. teenon kee nisbat us kee dugnee izzat kee jaatee thee, lekin vah khud un men gina naheen jaata tha.

²⁰binaayaah bin yahoyada bhee zabardast faujee tha. vah qabziel ka rahenay vaala tha, aur us nay bahut dafa apnee mardaangee dikhaaee. moaab kay do baday soorma us kay haathon halaak huay. ek baar jab bahut barf pad gaee to us nay ek hauz men utar kar ek sherbabar ko maar daala jo us men gir gaya tha. ²¹ek aur mauqay par us ka vaasta ek deo jaisay misree say pada. misree kay haath men neza tha jabki us kay paas sirf laathee thee. lekin binaayaah nay us par hamla karkay us kay haath say neza chheen liya aur usay us kay apnay hathiyaar say maar daala. ²²aisee bahaaduree dikhaanay kee bina par binaayaah bin yahoyada mazkoora teen aadmiyon kay baraabar mashhoor hua. ²³tees afsaron kay deegar mardon kee nisbat us kee ziyaada izzat kee jaatee thee, lekin vah mazkoora teen aadmiyon men gina naheen jaata tha. daaood nay usay apnay muhaafizon par muqarrar kiya.

²⁴zail kay aadmee baadshaah kay 30 soormaaon men shaamil thay.

yoaab ka bhaaee asaahel, bait-lahem ka ilhanaan bin dodo, ²⁵samma harodee, ileeqa harodee, ²⁶khalis faltee, taqooa ka eera bin aqqees, ²⁷antot ka abeeazar, maboonnee hoosaatee, ²⁸zalmon akhoohee, maheree natoofaatee, ²⁹halib bin baana natoofaatee, binymeenee shaher jibia ka ittee bin reebee, ³⁰binaayaah fir’aatonee, nahelay-jaas ka hiddee, ³¹abee-albon arbaatee, azmaavat barhoomee, ^32-33 iliyahba saalboonee, banee yaseen, yoontan bin samma haraaree, akheeaam bin saraar-haraaree, ³⁴ileefalat bin ahesbee maakaatee, ileeaam bin akheetufal jilonee, ³⁵hasro karmilee, faaree arbee, ³⁶zobaah ka ijaal bin naatan, baanee jaadee, ³⁷silaq ammonee, yoaab bin zarooyaah ka silaahabardaar naheree bairotee, ³⁸eera itree, jareeb itree ³⁹aur ooriyaah hittee. aadmiyon kee kul taadaad 37 thee.