2 Samooel 3
1saaool kay betay ishbosat aur daaood kay darmiyaan yah jang badee der tak jaaree rahee. lekin aahista aahista daaood zor pakadta gaya jabki ishbosat kee taaqat kam hotee gaee.
daaood ka khaandaan habroon men
2habroon men daaood kay baaz betay paida huay. pahelay ka naam amnon tha. us kee maan akheenooam yazraelee thee. 3phir kiliyaab paida hua jis kee maan naabaal kee beva abeejel karmilee thee. teesra beta abeesloom tha. us kee maan maaka thee jo jasoor kay baadshaah talmee kee betee thee. 4chauthay ka naam adooniyaah tha. us kee maan hajjeet thee. paanchvaan beta safatiyaah tha. us kee maan abeetaal thee. 5chhatay ka naam itriaam tha. us kee maan ijla thee. yah chhah betay habroon men paida huay.
abinair ishbosat say jhagadta hai
6jitnee der tak ishbosat aur daaood kay darmiyaan jang rahee, utnee der tak abinair saaool kay gharaanay ka vafaadaar raha.
7lekin ek din ishbosat abinair say naaraaz hua, kyoonki vah saaool marhoom kee ek daashta say hambistar ho gaya tha. aurat ka naam risfa bint ayyaah tha. ishbosat nay shikaayat kee, “aap nay meray baap kee daashta say aisa sulook kyoon kiya?” 8abinair baday ghussay men a kar garja, “kya main yahoodaah ka kuttaa [a] lafzee tarjuma : kuttay ka sar hoon ki aap mujhay aisa ravayya dikhaatay hain? aaj tak main aap kay baap kay gharaanay aur us kay rishtedaaron aur doston kay liyay ladta raha hoon. meree hee vajah say aap ab tak daaood kay haath say bachay rahay hain. kya yah is ka muaavaza hai? kya ek aisee aurat kay sabab say aap mujhay mujrim thahera rahay hain? 9-10 allaah mujhay sakht saza day agar ab say har mumkin koshish na karoon ki daaood pooray israaeel aur yahoodaah par baadshaah ban jaaay, shimaal men daan say lay kar junoob men bair-saba tak. aakhir rabb nay khud qasam kha kar daaood say vaada kiya hai ki main baadshaahee saaool kay gharaanay say chheen kar tujhay doonga.”
11yah sun kar ishbosat abinair say itna dar gaya ki mazeed kuchh kahenay kee jur’at jaatee rahee.
abinair kay daaood say muzaakraat
12abinair nay daaood ko paighaam bheja, “mulk kis ka hai? meray saath muaahada kar len to main pooray israaeel ko aap kay saath mila doonga.”
13daaood nay javaab diya, “theek hai, main aap kay saath muaahada karta hoon. lekin ek hee shart par, aap saaool kee betee meekal ko jo meree beevee hai meray ghar pahunchaaen, varna main aap say naheen miloonga.” 14daaood nay ishbosat kay paas bhee qaasid bhej kar taqaaza kiya, “mujhay meree beevee meekal jis say shaadee karnay kay liyay main nay sau filistiyon ko maara vaapas kar den.” 15ishbosat maan gaya. us nay hukm diya ki meekal ko us kay maujooda shauhar falteeel bin lais say lay kar daaood ko bheja jaaay. 16lekin falteeel usay chhodna naheen chaahata tha. vah rotay rotay bahooreem tak apnee beevee kay peechhay chalta raha. tab abinair nay us say kaha, “ab jaao! vaapas chalay jaao!” tab vah vaapas chala.
17abinair nay israaeel kay buzurgon say bhee baat kee, “aap to kaafee der say chaahatay hain ki daaood aap ka baadshaah ban jaaay. 18ab qadam uthaanay ka vaqt a gaya hai! kyoonki rabb nay daaood say vaada kiya hai, ‘apnay khaadim daaood say main apnee qaum israaeel ko filistiyon aur baaqee tamaam dushmanon kay haath say bachaaoonga’.” 19yahee baat abinair nay binyameen kay buzurgon kay paas ja kar bhee kee. is kay baad vah habroon men daaood kay paas aaya taaki us kay saamnay israaeel aur binyameen kay buzurgon ka faisla pesh karay.
20bees aadmee abinair kay saath habroon pahunch gaay. un ka istiqbaal karkay daaood nay ziyaafat kee. 21phir abinair nay daaood say kaha, “ab mujhay ijaazat den. main apnay aaqa aur baadshaah kay liyay tamaam israaeel ko jama kar loonga taaki vah aap kay saath ahd baandh kar aap ko apna baadshaah bana len. phir aap us pooray mulk par hukoomat karengay jis tarah aap ka dil chaahata hai.” phir daaood nay abinair ko salaamatee say rukhsat kar diya.
abinair ko qatl kiya jaata hai
22thodee der kay baad yoaab daaood kay aadmiyon kay saath kisee ladaaee say vaapas aaya. un kay paas bahut sa loota hua maal tha. lekin abinair habroon men daaood kay paas naheen tha, kyoonki daaood nay usay salaamatee say rukhsat kar diya tha. 23jab yoaab apnay aadmiyon kay saath shaher men daakhil hua to usay ittila dee gaee, “abinair bin nair baadshaah kay paas tha, aur baadshaah nay usay salaamatee say rukhsat kar diya hai.” 24yoaab fauran baadshaah kay paas gaya aur bola, “aap nay yah kya kiya hai? jab abinair aap kay paas aaya to aap nay usay kyoon salaamatee say rukhsat kiya? ab usay pakadnay ka mauqa jaata raha hai. 25aap to usay jaantay hain. haqeeqat men vah is liyay aaya ki aap ko manva kar aap kay aanay jaanay aur baaqee kaamon kay baaray men maaloomaat haasil karay.”
26yoaab nay darbaar say nikal kar qaasidon ko abinair kay peechhay bhej diya. vah abhee safar kartay kartay seera kay hauz par say guzar raha tha ki qaasid us kay paas pahunch gaay. un kee daavat par vah un kay saath vaapas gaya. lekin baadshaah ko is ka ilm na tha. 27jab abinair dubaara habroon men daakhil honay laga to yoaab shaher kay darvaazay men us ka istiqbaal karkay usay ek taraf lay gaya jaisay vah us kay saath koee khufiya baat karna chaahata ho. lekin achaanak us nay apnee talvaar ko miyaan say khainch kar abinair kay pet men ghomp diya. is tarah yoaab nay apnay bhaaee asaahel ka badla lay kar abinair ko maar daala.
28jab daaood ko is kee ittila milee to us nay elaan kiya, “main rabb kay saamnay qasam khaata hoon ki bequsoor hoon. mera abinair kee maut men haath naheen tha. is naatay say mujh par aur meree baadshaahee par kabhee bhee ilzaam na lagaaya jaaay, 29kyoonki yoaab aur us kay baap ka gharaana qusoorvaar hain. rabb usay aur us kay baap kay gharaanay ko munaasib saza day. ab say abad tak us kee har nasal men koee na koee ho jisay aisay zakhm lag jaaen jo bhar na paaen, kisee ko kodh lag jaaay, kisee ko baisaakhiyon kee madad say chalna paday, koee ghairtabaee maut mar jaaay, ya kisee ko khuraak kee musalsal kamee rahay.” 30yoon yoaab aur us kay bhaaee abeeshai nay apnay bhaaee asaahel ka badla liya. unhon nay abinair ko is liyay qatl kiya ki us nay asaahel ko jibaoon kay qareeb ladtay vaqt maut kay ghaat utaar diya tha.
daaood abinair ka maatam karta hai
31-32 daaood nay yoaab aur us kay saathiyon ko hukm diya, “apnay kapday phaad do aur taat odh kar abinair ka maatam karo!” janaazay ka band-o-bast habroon men kiya gaya. daaood khud janaazay kay ain peechhay chala. qabr par baadshaah oonchee aavaaz say ro pada, aur baaqee sab log bhee ronay lagay. 33phir daaood nay abinair kay baaray men maatmee geet gaaya,
34“haay, abinair kyoon bedeen kee tarah maara gaya? teray haath bandhay huay na thay, teray paaon zanjeeron men jakday huay na thay. jis tarah koee shareeron kay haath men a kar mar jaata hai usee tarah too halaak hua.”
tab tamaam log mazeed roay. 35daaood nay janaazay kay din roza rakha. sab nay minnat kee ki vah kuchh khaaay, lekin us nay qasam kha kar kaha, “allaah mujhay sakht saza day agar main sooraj kay ghuroob honay say pahelay rotee ka ek tukda bhee kha loon.” 36baadshaah ka yah ravayya logon ko bahut pasand aaya. vaisay bhee daaood ka har amal logon ko pasand aata tha. 37yoon tamaam haazireen balki tamaam israaeeliyon nay jaan liya ki baadshaah ka abinair ko qatl karnay men haath na tha. 38daaood nay apnay darbaariyon say kaha, “kya aap ko samajh naheen aaee ki aaj israaeel ka bada soorma faut hua hai? 39mujhay abhee abhee masah karkay baadshaah banaaya gaya hai, is liyay meree itnee taaqat naheen ki zarooyaah kay in do beton yoaab aur abeeshai ko kantrol karoon. rabb unhen un kee is shareer harkat kee munaasib saza day!”