2 Samooel 4

ishbosat ko qatl kiya jaata hai

¹jab saaool kay betay ishbosat ko ittila milee ki abinair ko habroon men qatl kiya gaya hai to vah himmat haar gaya, aur tamaam israaeel sakht ghabra gaya. ²ishbosat kay do aadmee thay jin kay naam baana aur raikaab thay. jab kabhee ishbosat kay faujee chhaapa maarnay kay liyay nikaltay to yah do bhaaee un par muqarrar thay. un ka baap rimmon binyameen kay qabaailee ilaaqay kay shaher bairot ka rahenay vaala tha. bairot bhee binyameen men shumaar kiya jaata hai, ³agarchi us kay baashindon ko hijrat karkay jittaim men basna pada jahaan vah aaj tak pardesee kee haisiyat say rahetay hain.

⁴yoontan ka ek beta zinda rah gaya tha jis ka naam mifeebosat tha. paanch saal kee umr men yazrael say khabar aaee thee ki saaool aur yoontan maaray gaay hain. tab us kee aaya usay lay kar kaheen panaah lenay kay liyay bhaag gaee thee. lekin jaldee kee vajah say mifeebosat gir kar langda ho gaya tha. us vaqt say us kee donon taangen maflooj theen.

⁵ek din rimmon bairotee kay betay raikaab aur baana dopaher kay vaqt ishbosat kay ghar gaay. garmee urooj par thee, is liyay ishbosat aaraam kar raha tha. ^6-7 donon aadmee yah bahaana pesh karkay ghar kay androonee kamray men gaay ki ham kuchh anaaj lay jaanay kay liyay aaay hain. jab ishbosat kay kamray men pahunchay to vah chaarpaaee par leta so raha tha. yah dekh kar unhon nay us kay pet men talvaar ghomp dee aur phir us ka sar kaat kar vahaan say salaamatee say nikal aaay.

pooree raat safar kartay kartay vah darya-ay-yardan kee vaadee men say guzar kar ⁸habroon pahunch gaay. vahaan unhon nay daaood ko ishbosat ka sar dikha kar kaha, “yah dekhen, saaool kay betay ishbosat ka sar. aap ka dushman saaool baar baar aap ko maar denay kee koshish karta raha, lekin aaj rabb nay us say aur us kee aulaad say aap ka badla liya hai.”

daaood qaatilon ko saza deta hai

⁹lekin daaood nay javaab diya, “rabb kee hayaat kee qasam jis nay fidya day kar mujhay har museebat say bachaaya hai, ¹⁰jis aadmee nay mujhay us vaqt siqlaaj men saaool kee maut kee ittila dee vah bhee samajhta tha ki main daaood ko achchhee khabar pahuncha raha hoon. lekin main nay usay pakad kar saza-ay-maut day dee. yahee tha vah ajr jo usay aisee khabar pahunchaanay kay ivz mila! ¹¹ab tum shareer logon nay is say badh kar kiya. tum nay bequsoor aadmee ko us kay apnay ghar men us kee apnee chaarpaaee par qatl kar diya hai. to kya mera farz naheen ki tum ko is qatl kee saza day kar tumhen mulk men say mita doon?”

¹²daaood nay donon ko maar denay ka hukm diya. us kay mulaazimon nay unhen maar kar un kay haathon aur pairon ko kaat daala aur un kee laashon ko habroon kay taalaab kay qareeb kaheen latka diya. ishbosat kay sar ko unhon nay abinair kee qabr men dafnaaya.