2 Samooel 5

daaood pooray israaeel ka baadshaah ban jaata hai

¹us vaqt israaeel kay tamaam qabeelay habroon men daaood kay paas aaay aur kaha, “ham aap hee kee qaum aur aap hee kay rishtedaar hain. ²maazee men bhee jab saaool baadshaah tha to aap hee faujee muhimmon men israaeel kee qiyaadat kartay rahay. aur rabb nay aap say vaada bhee kiya hai ki too meree qaum israaeel ka charvaaha ban kar us par hukoomat karega.” ³jab israaeel kay tamaam buzurg habroon pahunchay to daaood baadshaah nay rabb kay huzoor un kay saath ahd baandha, aur unhon nay usay masah karkay israaeel ka baadshaah bana diya.

⁴daaood 30 saal kee umr men baadshaah ban gaya. us kee hukoomat 40 saal tak jaaree rahee. ⁵pahelay saadhay saat saal vah sirf yahoodaah ka baadshaah tha aur us ka daar-ul-hakoomat habroon raha. baaqee 33 saal vah yarooshalam men rah kar yahoodaah aur israaeel donon par hukoomat karta raha.

daaood yarooshalam par qabza karta hai

⁶baadshaah bannay kay baad daaood apnay faujiyon kay saath yarooshalam gaya taaki us par hamla karay. vahaan ab tak yaboosee aabaad thay. daaood ko dekh kar yaboosiyon nay us ka mazaaq udaaya, “aap hamaaray shaher men kabhee daakhil naheen ho paaengay! aap ko roknay kay liyay hamaaray langday aur andhay kaafee hain.” unhen poora yaqeen tha ki daaood shaher men kisee bhee tareeqay say naheen a sakega.

⁷to bhee daaood nay siyyoon kay qilaay par qabza kar liya jo aajkal ‘daaood ka shaher’ kahelaata hai. ⁸jis din unhon nay shaher par hamla kiya us nay elaan kiya, “jo bhee yaboosiyon par fatah paana chaahay usay paanee kee surang men say guzar kar shaher men ghusna padega taaki un langadon aur andhon ko maaray jin say meree jaan nafrat kartee hai.” is liyay aaj tak kaha jaata hai, “langadon aur andhon ko ghar men jaanay kee ijaazat naheen.”

⁹yarooshalam par fatah paanay kay baad daaood qilaay men rahenay laga. us nay usay ‘daaood ka shaher’ qaraar diya aur us kay ird-gird shaher ko badhaanay laga. yah taameeree kaam ird-gird kay chabootaron say shuroo hua aur hotay hotay qilaay tak pahunch gaya.

¹⁰yoon daaood zor pakadta gaya, kyoonki rabb-ul-afwaaj us kay saath tha.

daaood kee taraqqee

¹¹ek din soor kay baadshaah heeraam nay daaood kay paas vafad bheja. badhaee aur raaj bhee saath thay. un kay paas deodaar kee lakdee thee, aur unhon nay daaood kay liyay mahel bana diya. ¹²yoon daaood nay jaan liya ki rabb nay mujhay israaeel ka baadshaah bana kar meree baadshaahee apnee qaum israaeel kee khaatir sarfaraaz kar dee hai.

¹³habroon say yarooshalam men muntaqil honay kay baad daaood nay mazeed beeviyon aur daashtaaon say shaadee kee. nateejay men yarooshalam men us kay kaee betay-betiyaan paida huay. ¹⁴jo betay vahaan paida huay vah yah thay : sammooa, sobaab, naatan, sulemaan, ¹⁵ibhaar, ileesooa, nafaj, yafeea, ¹⁶ileesma, ilyada aur ileefalat.

filistiyon par fatah

¹⁷jab filistiyon ko ittila milee ki daaood ko masah karkay israaeel ka baadshaah banaaya gaya hai to unhon nay apnay faujiyon ko israaeel men bhej diya taaki usay pakad len. lekin daaood ko pata chal gaya, aur us nay ek pahaadee qilaay men panaah lay lee.

¹⁸jab filistee israaeel men pahunch kar vaadee-ay-rafaaeem men phail gae ¹⁹to daaood nay rabb say darayaaft kiya, “kya main filistiyon par hamla karoon? kya too mujhay un par fatah bakhshega?” rabb nay javaab diya, “haan, un par hamla kar! main unhen zaroor teray qabzay men kar doonga.” ²⁰chunaanchay daaood apnay faujiyon ko lay kar baal-paraazeem gaya. vahaan us nay filistiyon ko shikast dee. baad men us nay gavaahee dee, “jitnay zor say band kay toot jaanay par paanee us say phoot nikalta hai utnay zor say aaj rabb meray dekhtay dekhtay dushman kee safon men say phoot nikla hai.” chunaanchay us jagah ka naam baal-paraazeem yaanee ‘phoot nikalnay ka maalik’ pad gaya. ²¹filistee apnay but chhod kar bhaag gaay, aur vah daaood aur us kay aadmiyon kay qabzay men a gaay.

²²ek baar phir filistee a kar vaadee-ay-rafaaeem men phail gaay. ²³jab daaood nay rabb say darayaaft kiya to us nay javaab diya, “is martaba un ka saamna mat karna balki un kay peechhay ja kar baka kay darakhton kay saamnay un par hamla kar. ²⁴jab un darakhton kee chotiyon say qadmon kee chaap sunaaee day to khabardaar! yah is ka ishaara hoga ki rabb khud teray aagay aagay chal kar filistiyon ko maarnay kay liyay nikal aaya hai.”

²⁵daaood nay aisa hee kiya aur nateejay men filistiyon ko shikast day kar jibaoon say lay kar jazar tak un ka taaqqub kiya.