2 Samooel 7

rabb daaood say abdee baadshaahee ka vaada karta hai

¹daaood baadshaah sukoon say apnay mahel men rahenay laga, kyoonki rabb nay ird-gird kay dushmanon ko us par hamla karnay say rok diya tha. ²ek din daaood nay naatan nabee say baat kee, “dekhen, main yahaan deodaar kay mahel men raheta hoon jabki allaah ka sandooq ab tak tamboo men pada hai. yah munaasib naheen hai!”

³naatan nay baadshaah kee hausalaaafzaaee kee, “jo kuchh bhee aap karna chaahatay hain vah karen. rabb aap kay saath hai.”

⁴lekin usee raat rabb naatan say hamkalaam hua, ⁵“meray khaadim daaood kay paas ja kar usay bata day ki rabb farmaata hai, ‘kya too meree rihaaish kay liyay makaan taameer karega? hargiz naheen! ⁶aaj tak main kisee makaan men naheen raha. jab say main israaeeliyon ko misr say nikaal laaya us vaqt say main khaimay men rah kar jagah-ba-jagah phirta raha hoon. ⁷jis dauraan main tamaam israaeeliyon kay saath idhar udhar phirta raha kya main nay israaeel kay un raahanumaaon say kabhee is naatay say shikaayat kee jinhen main nay apnee qaum kee gallaabaanee karnay ka hukm diya tha? kya main nay un men say kisee say kaha ki tum nay meray liyay deodaar ka ghar kyoon naheen banaaya?’

⁸chunaanchay meray khaadim daaood ko bata day, ‘rab-ul-afwaaj farmaata hai ki main hee nay tujhay charaagaah men bhedon kee gallaabaanee karnay say faarigh karkay apnee qaum israaeel ka baadshaah bana diya hai. ⁹jahaan bhee too nay qadam rakha vahaan main teray saath raha hoon. teray dekhtay dekhtay main nay teray tamaam dushmanon ko halaak kar diya hai. ab main tera naam sarfaraaz kar doonga, vah duniya kay sab say azeem aadmiyon kay naamon kay baraabar hee hoga. ¹⁰aur main apnee qaum israaeel kay liyay ek vatan muhayya karoonga, pauday kee tarah unhen yoon laga doonga ki vah jad pakad kar mahfooz rahengay aur kabhee bechain naheen hongay. bedeen qaumen unhen us tarah naheen dabaaengee jis tarah maazee men kiya kartee theen, ¹¹us vaqt say jab main qaum par qaazee muqarrar karta tha. main teray dushmanon ko tujh say door rakh kar tujhay amn-o-amaan ata karoonga. aaj rabb farmaata hai ki main hee teray liyay ghar banaaoonga.

¹²jab too boodha ho kar kooch kar jaaega aur apnay baapdaada kay saath aaraam karega to main teree jagah teray beton men say ek ko takht par bitha doonga. us kee baadshaahee ko main mazboot bana doonga. ¹³vahee meray naam kay liyay ghar taameer karega, aur main us kee baadshaahee ka takht abad tak qaaim rakhoonga. ¹⁴main us ka baap hoonga, aur vah mera beta hoga. jab kabhee us say ghaltee hogee to main usay yoon chhadee say saza doonga jis tarah insaanee baap apnay betay kee tarbiyat karta hai. ¹⁵lekin meree nazar-ay-karam kabhee us say naheen hategee. us kay saath main vah sulook naheen karoonga jo main nay saaool kay saath kiya jab usay teray saamnay say hata diya. ¹⁶tera gharaana aur teree baadshaahee hamesha meray huzoor qaaim rahegee, tera takht hamesha mazboot rahega’.”

daaood kee shukrguzaaree

¹⁷naatan nay daaood kay paas ja kar usay sab kuchh sunaaya jo rabb nay usay roya men bataaya tha. ¹⁸tab daaood ahd kay sandooq kay paas gaya aur rabb kay huzoor baith kar dua karnay laga,

“ai rabb qaadir-ay-mutlaq, main kaun hoon aur mera khaandaan kya haisiyat rakhta hai ki too nay mujhay yahaan tak pahunchaaya hai? ¹⁹aur ab ai rabb qaadir-ay-mutlaq, too mujhay aur bhee ziyaada ata karnay ko hai, kyoonki too nay apnay khaadim kay gharaanay kay mustaqbil kay baaray men bhee vaada kiya hai. kya too aam taur par insaan kay saath aisa sulook karta hai? hargiz naheen! ²⁰lekin main mazeed kya kahoon? ai rabb qaadir-ay-mutlaq, too to apnay khaadim ko jaanta hai. ²¹too nay apnay farmaan kee khaatir aur apnee marzee kay mutaabiq yah azeem kaam karkay apnay khaadim ko ittila dee hai.

²²ai rabb qaadir-ay-mutlaq, too kitna azeem hai! tujh jaisa koee naheen hai. ham nay apnay kaanon say sun liya hai ki teray siva koee aur khuda naheen hai. ²³duniya men kaun see qaum teree ummat israaeel kee maanind hai? too nay isee ek qaum ka fidya day kar usay ghulaamee say chhudaaya aur apnee qaum bana liya. too nay israaeel kay vaastay baday aur haibtanaak kaam karkay apnay naam kee shuharat phaila dee. hamen misr say riha karkay too nay qaumon aur un kay devtaaon ko hamaaray aagay say nikaal diya. ²⁴ai rabb, too israaeel ko hamesha kay liyay apnee qaum bana kar un ka khuda ban gaya hai. ²⁵chunaanchay ai rabb qaadir-ay-mutlaq, jo baat too nay apnay khaadim aur us kay gharaanay kay baaray men kee hai usay abad tak qaaim rakh aur apna vaada poora kar. ²⁶tab tera naam abad tak mashhoor rahega aur log tasleem karengay ki rabb-ul-afwaaj israaeel ka khuda hai. phir teray khaadim daaood ka gharaana bhee teray huzoor qaaim rahega.

²⁷ai rabb-ul-afwaaj, israaeel kay khuda, too nay apnay khaadim kay kaan ko is baat kay liyay khol diya hai. too hee nay farmaaya, ‘main teray liyay ghar taameer karoonga.’ sirf isee liyay teray khaadim nay yoon tujh say dua karnay kee jur’at kee hai. ²⁸ai rabb qaadir-ay-mutlaq, too hee khuda hai, aur teree hee baaton par etimaad kiya ja sakta hai. too nay apnay khaadim say in achchhee cheezon ka vaada kiya hai. ²⁹ab apnay khaadim kay gharaanay ko barkat denay par raazee ho taaki vah hamesha tak teray huzoor qaaim rahay. kyoonki too hee nay yah farmaaya hai, aur choonki too ai rabb qaadir-ay-mutlaq nay barkat dee hai is liyay teray khaadim ka gharaana abad tak mubaarak rahega.”