2 Samooel 8

daaood kee jangen

¹phir aisa vaqt aaya ki daaood nay filistiyon ko shikast day kar unhen apnay taabay kar liya aur hukoomat kee baagdor un kay haathon say chheen lee.

²us nay moaabiyon par bhee fatah paaee. moaabee qaidiyon kee qataar bana kar us nay unhen zameen par lita diya. phir rassee ka tukda lay kar us nay qataar ka naap liya. jitnay log rassee kee lambaaee men a gaay vah ek guroh ban gaay. yoon daaood nay logon ko gurohon men taqseem kiya. phir us nay gurohon kay teen hissay bana kar do hisson kay sar qalam kiay aur ek hissay ko zinda chhod diya. lekin jitnay qaidee chhoot gaay vah daaood kay taabay rah kar usay kharaaj detay rahay.

³daaood nay shimaalee shaam kay shaher zobaah kay baadshaah hadad’azar bin rahob ko bhee hara diya jab hadad’azar darya-ay-furaat par dubaara qaaboo paanay kay liyay nikal aaya tha. ⁴daaood nay 1,700 ghudasavaaron aur 20,000 piyaada sipaahiyon ko giriftaar kar liya. rathon kay 100 ghodon ko us nay apnay liyay mahfooz rakha, jabki baaqiyon kee us nay konchen kaat deen taaki vah aainda jang kay liyay istemaal na ho saken.

⁵jab damishq kay araamee baashinday zobaah kay baadshaah hadad’azar kee madad karnay aaay to daaood nay un kay 22,000 afraad halaak kar diay. ⁶phir us nay damishq kay ilaaqay men apnee faujee chaukiyaan qaaim keen. araamee us kay taabay ho gaay aur usay kharaaj detay rahay. jahaan bhee daaood gaya vahaan rabb nay usay kaamyaabee bakhshee. ⁷sonay kee jo dhaalen hadad’azar kay afsaron kay paas theen unhen daaood yarooshalam lay gaya. ⁸hadad’azar kay do shaheron bataah aur berotee say us nay kasrat ka peetal chheen liya.

⁹jab hamaat kay baadshaah tooee ko ittila milee ki daaood nay hadad’azar kee pooree fauj par fatah paaee hai ¹⁰to us nay apnay betay yooraam ko daaood kay paas bheja taaki usay salaam kahay. yooraam nay daaood ko hadad’azar par fatah kay liyay mubaarakabaad dee, kyoonki hadad’azar tooee ka dushman tha, aur un kay darmiyaan jang rahee thee. yooraam nay daaood ko sonay, chaandee aur peetal kay tuhfay bhee pesh kiay. ¹¹daaood nay yah cheezen rabb kay liyay makhsoos kar deen. jahaan bhee vah doosree qaumon par ghaalib aaya vahaan kee sona-chaandee us nay rabb kay liyay makhsoos kar dee. ¹²yoon adom, moaab, ammon, philistiya, amaaleeq aur zobaah kay baadshaah hadad’azar bin rahob kee sona-chaandee rabb ko pesh kee gaee.

¹³jab daaood nay namak kee vaadee men adomiyon par fatah paaee to us kee shuharat mazeed phail gaee. us jang men dushman kay 18,000 afraad halaak huay. ¹⁴daaood nay adom kay pooray mulk men apnee faujee chaukiyaan qaaim keen, aur tamaam adomee daaood kay taabay ho gaay. daaood jahaan bhee jaata rabb us kee madad karkay usay fatah bakhshta.

daaood kay aala afsar

¹⁵jitnee der daaood pooray israaeel par hukoomat karta raha utnee der tak us nay dhyaan diya ki qaum kay har ek shakhs ko insaaf mil jaaay. ¹⁶yoaab bin zarooyaah fauj par muqarrar tha. yahoosafat bin akheelood baadshaah ka musheer-ay-khaas tha. ¹⁷sadoq bin akheetoob aur akheemlik bin abiyaatar imaam thay. siraayaah meeramunshee tha. ¹⁸binaayaah bin yahoyada daaood kay khaas dastay banaam karetee-o-faletee ka kaptaan tha. daaood kay betay imaam thay.