2 Samooel 9

daaood yoontan kay betay par meharbaanee karta hai

¹ek din daaood poochhnay laga, “kya saaool kay khaandaan ka koee fard bach gaya hai? main yoontan kee khaatir us par apnee meharbaanee ka izhaar karna chaahata hoon.”

²ek aadmee ko bulaaya gaya jo saaool kay gharaanay ka mulaazim tha. us ka naam zeeba tha. daaood nay savaal kiya, “kya aap zeeba hain?” zeeba nay javaab diya, “jee, aap ka khaadim haazir hai.” ³baadshaah nay darayaaft kiya, “kya saaool kay khaandaan ka koee fard zinda rah gaya hai? main us par allaah kee meharbaanee ka izhaar karna chaahata hoon.” zeeba nay kaha, “yoontan ka ek beta ab tak zinda hai. vah donon taangon say maflooj hai.” ⁴daaood nay poochha, “vah kahaan hai?” zeeba nay javaab diya, “vah lo-dibaar men makeer bin ammeeel kay haan raheta hai.” ⁵daaood nay usay fauran darbaar men bula liya.

⁶yoontan kay jis betay ka zikr zeeba nay kiya vah mifeebosat tha. jab usay daaood kay saamnay laaya gaya to us nay munh kay bal jhuk kar us kee izzat kee. daaood nay kaha, “mifeebosat!” us nay javaab diya, “jee, aap ka khaadim haazir hai.” ⁷daaood bola, “daren mat. aaj main aap kay baap yoontan kay saath kiya hua vaada poora karkay aap par apnee meharbaanee ka izhaar karna chaahata hoon. ab sunen! main aap ko aap kay daada saaool kee tamaam zameenen vaapas kar deta hoon. is kay ilaava main chaahata hoon ki aap rozaana meray saath khaana khaaya karen.”

⁸mifeebosat nay dubaara jhuk kar baadshaah kee taazeem kee, “main kaun hoon ki aap mujh jaisay murda kuttay par dhyaan day kar aisee meharbaanee farmaaen!” ⁹daaood nay saaool kay puraanay mulaazim zeeba ko bula kar usay hidaayat dee, “main nay aap kay maalik kay potay ko saaool aur us kay khaandaan kee tamaam milkiyat day dee hai. ¹⁰ab aap kee zimmaadaaree yah hai ki aap apnay beton aur naukron kay saath us kay kheton ko sambhaalen taaki us ka khaandaan zameenon kee paidaavaar say guzaara kar sakay. lekin mifeebosat khud yahaan rah kar meray beton kee tarah meray saath khaana khaaya karega.” (zeeba kay 15 betay aur 20 naukar thay).

¹¹zeeba nay javaab diya, “main aap kee khidmat men haazir hoon. jo bhee hukm aap dengay main karnay kay liyay tayyaar hoon.” ^12-13 us din say zeeba kay gharaanay kay tamaam afraad mifeebosat kay mulaazim ho gaay. mifeebosat khud jo donon taangon say maflooj tha yarooshalam men rihaaishpazeer hua aur rozaana daaood baadshaah kay saath khaana khaata raha. us ka ek chhota beta tha jis ka naam meeka tha.