Āmoos 2

¹rabb farmaata hai, “moaab kay baashindon nay baar baar gunaah kiya hai, is liyay main unhen saza diay baghair naheen chhodoonga. kyoonki unhon nay adom kay baadshaah kee haddiyon ko jala kar raakh kar diya hai. ²chunaanchay main mulk-ay-moaab par aag naazil karoonga, aur qariyot kay mahel nazar-ay-aatish ho jaaengay. jang ka shor-sharaaba machega, faujiyon kay naaray buland ho jaaengay, narsinga phoonka jaaega. tab moaab halaak ho jaaega. ³main us kay hukmaraan ko us kay tamaam afsaron samet halaak kar doonga.” yah rabb ka farmaan hai.

yahoodaah kee adaalat

⁴rabb farmaata hai, “yahoodaah kay baashindon nay baar baar gunaah kiya hai, is liyay main unhen saza diay baghair naheen chhodoonga. kyoonki unhon nay rabb kee shareeat ko radd karkay us kay ahkaam par amal naheen kiya. un kay jhootay devta unhen ghalat raah par lay gaay hain, vah devta jin kee pairvee un kay baapdaada bhee kartay rahay. ⁵chunaanchay main yahoodaah par aag naazil karoonga, aur yarooshalam kay mahel nazar-ay-aatish ho jaaengay.”

israaeel kee adaalat

⁶rabb farmaata hai, “israaeel kay baashindon nay baar baar gunaah kiya hai, is liyay main unhen saza diay baghair naheen chhodoonga. kyoonki vah shareef logon ko paisay kay liyay bechatay aur zarooratmandon ko farokht kartay hain taaki ek jodee jootay mil jaaay. ⁷vah ghareebon kay sar ko zameen par kuchal detay, museebatazadon ko insaaf milnay say roktay hain. baap aur beta donon ek hee kasbee kay paas ja kar meray naam kee behuramtee kartay hain. ⁸jab kabhee kisee qurbaangaah kay paas pooja karnay jaatay hain to aisay kapdon par aaraam kartay hain jo qarzdaaron nay zamaanat kay taur par diay thay. jab kabhee apnay devta kay mandir men jaatay to aisay paison say mai khareed kar peetay hain jo jurmaana kay taur par zarooratmandon say mil gaay thay.

⁹yah kaisee baat hai? main hee nay amoriyon ko un kay aagay aagay nest kar diya tha, haalaanki vah deodaar kay darakhton jaisay lambay aur baloot kay darakhton jaisay taaqatvar thay. main hee nay amoriyon ko jadon aur phal samet mita diya tha. ¹⁰is say pahelay main hee tumhen misr say nikaal laaya, main hee nay chaalees saal tak registaan men tumhaaree raahanumaaee kartay kartay tumhen amoriyon kay mulk tak pahunchaaya taaki us par qabza karo. ¹¹main hee nay tumhaaray beton men say nabee barpa kiay, aur main hee nay tumhaaray naujvaanon men say kuchh chun liyay taaki apnee khidmat kay liyay makhsoos karoon.” rabb farmaata hai, “ai israaeeliyo, kya aisa naheen tha? ¹²lekin tum nay meray liyay makhsoos aadmiyon ko mai pilaaee aur nabiyon ko hukm diya ki nubuvvat mat karo.

¹³ab main honay doonga ki tum anaaj say khoob ladee huee bailgaadee kee tarah jhoolnay lagogay. ¹⁴na tezrau shakhs bhaag kar bachega, na taaqatvar aadmee kuchh kar paaega. na soorma apnee jaan bachaaega, ¹⁵na teer chalaanay vaala qaaim rahega. koee naheen bachega, khwaah paidal daudnay vaala ho ya ghoday par savaar. ¹⁶us din sab say bahaadur soorma bhee hathiyaar daal kar nangee haalat men bhaag jaaega.” yah rabb ka farmaan hai.