Āmoos 3

¹ai israaeeliyo, vah kalaam suno jo rabb tumhaaray khilaaf farmaata hai, us pooree qaum kay khilaaf jisay main misr say nikaal laaya tha. ²“duniya kee tamaam qaumon men say main nay sirf tum hee ko jaan liya, is liyay main tum hee ko tumhaaray tamaam gunaahon kee saza doonga.”

nabee kee zimmaadaaree

³kya do afraad mil kar safar kar saktay hain agar vah muttafiq na hon? ⁴kya sherbabar dahaadata hai agar usay shikaar na mila ho? kya javaan sher apnee maand men garajta hai agar us nay kuchh pakda na ho? ⁵kya parinda phanday men phans jaata hai agar phanday ko lagaaya na gaya ho? ya phanda kuchh phansa sakta hai agar shikaar na ho? ⁶jab shaher men narsinga phoonka jaata hai taaki logon ko kisee khatray say aagaah karay to kya vah naheen ghabraatay? jab aafat shaher par aatee hai to kya rabb kee taraf say naheen hotee?

⁷yaqeenan jo bhee mansooba rabb qaadir-ay-mutlaq baandhay us par amal karnay say pahelay vah usay apnay khaadimon yaanee nabiyon par zaahir karta hai.

⁸sherbabar dahaad utha hai to kaun hai jo dar na jaaay? rabb qaadir-ay-mutlaq bol utha hai to kaun hai jo nubuvvat na karay?

saamriya ko rihaaee naheen milegee

⁹ashdood aur misr kay mahelon ko ittila do, “saamriya kay pahaadon par jama ho kar us par nazar daalo jo kuchh shaher men ho raha hai. kitnee badee halchal mach gaee hai, kitna zulm ho raha hai.” ¹⁰rabb farmaata hai, “yah log saheeh kaam karna jaantay hee naheen balki zaalim aur tabaahakun tareeqon say apnay mahelon men khazaanay jama kartay hain.”

¹¹chunaanchay rabb qaadir-ay-mutlaq farmaata hai, “dushman mulk ko gher kar teree qil’aabandiyon ko dha dega aur teray mahelon ko loot lega.” ¹²rabb farmaata hai, “agar charvaaha apnee bhed ko sherbabar kay munh say nikaalnay kee koshish karay to shaayad do pindaliyaan ya kaan ka tukda bach jaaay. saamriya kay israaeelee bhee isee tarah hee bach jaaengay, khwaah vah is vaqt apnay shaandaar sofon aur khoobsoorat gaddiyon par aaraam kyoon na karen.”

¹³rabb qaadir-ay-mutlaq jo aasmaanee lashkaron ka khuda hai farmaata hai, “suno, yaaqoob kay gharaanay kay khilaaf gavaahee do! ¹⁴jis din main israaeel ko us kay gunaahon kee saza doonga us din main bait-el kee qurbaanagaahon ko mismaar karoonga. tab qurbaangaah kay konon par lagay seeng toot kar zameen par gir jaaengay. ¹⁵main sardiyon aur garmiyon kay mausam kay liyay taameer kiay gaay gharon ko dha doonga. haatheedaant say aaraasta imaaraten khaak men milaaee jaaengee, aur jahaan is vaqt mut’addid makaan nazar aatay hain vahaan kuchh naheen rahega.” yah rabb ka farmaan hai.