Āmoos 7

tiddiyon kee royaa

¹rabb qaadir-ay-mutlaq nay mujhay roya dikhaaee. main nay dekha ki allaah tiddiyon kay ghol paida kar raha hai. us vaqt pahelee ghaas kee kataaee ho chukee thee, vah ghaas jo baadshaah kay liyay muqarrar thee. ab ghaas dubaara ugnay lagee thee. ²tab tiddiyaan mulk kee pooree hariyaalee par toot padeen aur sab kuchh kha gaeen. main chilla utha, “ai rabb qaadir-ay-mutlaq, meharbaanee karkay muaaf kar, varna yaaqoob kis tarah qaaim rahega? vah pahelay say itnee chhotee qaum hai.” ³tab rabb pachhtaaya aur farmaaya, “jo kuchh too nay dekha vah pesh naheen aaega.”

aag kee royaa

⁴phir rabb qaadir-ay-mutlaq nay mujhay ek aur roya dikhaaee. main nay dekha ki rabb qaadir-ay-mutlaq aag kee baarish bula raha hai taaki mulk par barsay. aag nay samundar kee gaheraaiyon ko khushk kar diya, phir mulk men phailnay lagee. ⁵tab main chilla utha, “ai rabb qaadir-ay-mutlaq, meharbaanee karkay is say baaz a, varna yaaqoob kis tarah qaaim rahega? vah pahelay say itnee chhotee qaum hai.” ⁶tab rabb dubaara pachhtaaya aur farmaaya, “yah bhee pesh naheen aaega.”

saahool kee royaa

⁷is kay baad rabb nay mujhay ek teesree roya dikhaaee. main nay dekha ki qaadir-ay-mutlaq ek aisee deevaar par khada hai jo saahool say naap naap kar taameer kee gaee hai. us kay haath men saahool tha. ⁸rabb nay mujh say poochha, “ai aamoos, tujhay kya nazar aata hai?” main nay javaab diya, “saahool.” tab rabb nay farmaaya, “main apnee qaum israaeel kay darmiyaan saahool lagaanay vaala hoon. aainda main un kay gunaahon ko nazar’andaaz naheen karoonga balki naap naap kar un ko saza doonga. ⁹un bulandiyon kee qurbaangaahen tabaah ho jaaengee jahaan ishaaq kee aulaad apnee qurbaaniyaan pesh kartee hai. israaeel kay maqdis khaak men milaaay jaaengay, aur main apnee talvaar ko pakad kar yarubiaam kay khaandaan par toot padoonga.”

aamoos ko israaeel say nikalnay ka hukm diya jaata hai

¹⁰yah sun kar bait-el kay imaam amasiyaah nay israaeel kay baadshaah yarubiaam ko ittila dee, “aamoos israaeel kay darmiyaan hee aap kay khilaaf saazishen kar raha hai! mulk us kay paighaam bardaasht naheen kar sakta, ¹¹kyoonki vah kaheta hai, ‘yarubiaam talvaar kee zad men a kar mar jaaega, aur israaeelee qaum yaqeenan qaidee ban kar jilaavatan ho jaaegee’.”

¹²amasiyaah nay aamoos say kaha, “ai roya dekhnay vaalay, yahaan say nikal ja! mulk-ay-yahoodaah men bhaag kar vaheen rozee kama, vaheen nubuvvat kar. ¹³aainda bait-el men nubuvvat mat karna, kyoonki yah baadshaah ka maqdis aur baadshaahee kee markzee ibaadatgaah hai.”

¹⁴aamoos nay javaab diya, “pesha kay lihaaz say na main nabee hoon, na kisee nabee ka shaagird balki gallaabaan aur anjeer-toot ka baaghbaan. ¹⁵to bhee rabb nay mujhay bhed-bakriyon kee gallaabaanee karnay say hata kar hukm diya ki meree qaum israaeel kay paas ja aur nubuvvat karkay usay mera kalaam pesh kar. ¹⁶ab rabb ka kalaam sun! too kaheta hai, ‘israaeel kay khilaaf nubuvvat mat karna, ishaaq kee qaum kay khilaaf baat mat karna.’ ¹⁷javaab men rabb farmaata hai, ‘teree beevee shaher men kasbee banegee, teray betay-betiyaan sab talvaar say qatl ho jaaengay, teree zameen naap kar doosron men taqseem kee jaaegee, aur too khud ek naapaak mulk men vafaat paaega. yaqeenan israaeelee qaum qaidee ban kar jilaavatan ho jaaegee’.”