Āmoos 8

pakay phal say bharee tokree

¹ek baar phir rabb qaadir-ay-mutlaq nay mujhay roya dikhaaee. main nay pakay huay phal say bharee huee tokree dekhee. ²rabb nay poochha, “ai aamoos, tujhay kya nazar aata hai?” main nay javaab diya, “pakay huay phal say bharee huee tokree.” tab rabb nay mujh say farmaaya, “meree qaum ka anjaam pak gaya hai. ab say main unhen saza diay baghair naheen chhodoonga. ³rabb qaadir-ay-mutlaq farmaata hai ki us din mahel men geet naheen sunaaee dengay balki aah-o-zaaree. chaaron taraf naashen nazar aaengee, kyoonki dushman unhen har jagah phainkega. khaamosh!”

avaam ka istihsaal

⁴ai ghareebon ko kuchalnay vaalo, ai zarooratmandon ko tabaah karnay vaalo, suno! ^5-6 tum kahetay ho, “naay chaand kee eed kab guzar jaaegee, sabat ka din kab khatm hai taaki ham anaaj kay godaam khol kar ghalla bech saken? tab ham paimaaish karnay kay bartan chhotay aur taraazoo kay baat halkay banaaengay, saath saath sauday ka bhaao badhaaengay. ham farokht kartay vaqt anaaj kay saath us ka bhoosa bhee milaaengay.” apnay naajaaiz tareeqon say tum thoday paison men balki ek jodee jooton kay ivz ghareebon ko khareedtay ho.

⁷rabb nay yaaqoob kay fakhar kee qasam kha kar vaada kiya hai, “jo kuchh un say sarzad hua hai usay main kabhee naheen bhooloonga. ⁸un hee kee vajah say zameen laraz uthegee aur us kay tamaam baashinday maatam karengay. jis tarah misr men darya-ay-neel barsaat kay mausam men sailaabee soorat ikhtiyaar kar leta hai usee tarah pooree zameen uthegee. vah neel kee tarah josh men aaegee, phir dubaara utar jaaegee.”

⁹rabb qaadir-ay-mutlaq farmaata hai, “us din main honay doonga ki sooraj dopaher kay vaqt ghuroob ho jaaay. din urooj par hee hoga to zameen par andhera chha jaaega. ¹⁰main tumhaaray tahevaaron ko maatam men aur tumhaaray geeton ko aah-o-buka men badal doonga. main sab ko taat kay maatmee libaas pahena kar har ek ka sar mundavaaoonga. log yoon maatam karengay jaisa un ka vaahid beta kooch kar gaya ho. anjaam ka vah din kitna talkh hoga.”

allaah aainda javaab naheen degaa

¹¹qaadir-ay-mutlaq farmaata hai, “aisay din aanay vaalay hain jab main mulk men kaal bhejoonga. lekin log na rotee aur na paanee say balki allaah ka kalaam sunnay say maheroom rahengay. ¹²log ladkhadaatay huay ek samundar say doosray tak aur shimaal say mashriq tak phirengay taaki rabb ka kalaam mil jaaay, lekin besood.

¹³us din khoobsoorat kunvaariyaan aur javaan mard piyaas kay maaray behosh ho jaaengay. ¹⁴jo is vaqt saamriya kay makrooh but kee qasam khaatay aur kahetay hain, ‘ai daan, teray devta kee hayaat kee qasam’ ya ‘ai bair-saba, teray devta kee qasam!’ vah us vaqt gir jaaengay aur dubaara kabhee naheen uthengay.”