Daanyaal 12

murday jee uthtay hain

¹us vaqt farishton ka azeem sardaar meekaael uth khada hoga, vah jo teree qaum kee shafaaat karta hai. museebat ka aisa vaqt hoga ki qaumon kay paida honay say lay kar us vaqt tak naheen hua hoga. lekin saath saath teree qaum ko najaat milegee. jis ka bhee naam allaah kee kitaab men darj hai vah najaat paaega. ²tab khaak men soay huay mut’addid log jaag uthengay, kuchh abdee zindagee paanay kay liyay aur kuchh abdee rusvaaee aur ghin ka nishaana bannay kay liyay. ³jo samajhdaar hain vah aasmaan kee aab-o-taab kee maanind chamkengay, aur jo bahuton ko raast raah par laaay hain vah hamesha tak sitaaron kee tarah jagmagaaengay.

⁴lekin too, ai daanyaal, in baaton ko chhupaaay rakh! is kitaab par aakhiree vaqt tak muhar laga day! bahut log idhar udhar ghoomtay phirengay, aur ilm men izaafa hota jaaega.”

aakhiree vaqt

⁵phir main, daanyaal nay darya kay paas do aadmiyon ko dekha. ek is kinaaray par khada tha jabki doosra doosray kinaaray par. ⁶kataan say mulabbas aadmee bahetay huay paanee kay oopar tha. kinaaron par khaday aadmiyon men say ek nay us say poochha, “in hairat’angez baaton kee takmeel tak mazeed kitnee der lagegee?”

⁷kataan say mulabbas aadmee nay donon haath aasmaan kee taraf uthaaay aur abad tak zinda khuda kee qasam kha kar bola, “pahelay ek arsa, phir do arsay, phir aadha arsa guzrega. pahelay muqaddas qaum kee taaqat ko paash paash karnay ka silsila ikhtitaam par pahunchna hai. is kay baad hee yah tamaam baaten takmeel tak pahunchengee.”

⁸go main nay us kee yah baat sunee, lekin vah meree samajh men na aaee. chunaanchay main nay poochha, “meray aaqa, in tamaam baaton ka kya anjaam hoga?”

⁹vah bola, “ai daanyaal, ab chala ja! kyoonki in baaton ko aakhiree vaqt tak chhupaaay rakhna hai. us vaqt tak in par muhar lagee rahegee. ¹⁰bahuton ko aazma kar paak-saaf aur khaalis kiya jaaega. lekin bedeen bedeen hee rahengay. koee bhee bedeen yah naheen samjhega, lekin samajhdaaron ko samajh aaegee. ¹¹jis vaqt say rozaana kee qurbaanee ka intizaam band kiya jaaega aur tabaahee kay makrooh but ko maqdis men khada kiya jaaega us vaqt say 1,290 din guzarengay. ¹²jo sabr karkay 1,335 dinon kay ikhtitaam tak qaaim rah sakay vah mubaarak hai!

¹³jahaan tak tera taalluq hai, aakhiree vaqt kee taraf badhta chala ja! too aaraam karega aur phir dinon kay ikhtitaam par jee uth kar apnee meeraas paaega.”