Āstar 1
akhasverus jashn manaata hai
1akhasverus baadshaah kee saltanat bhaarat say lay kar ethopiya tak 127 soobon par mushtamil thee. 2jin vaaqiaat ka zikr hai vah us vaqt huay jab vah sosan shaher kay qilaay say hukoomat karta tha. 3apnee hukoomat kay teesray saal men us nay apnay tamaam buzurgon aur afsaron kee ziyaafat kee. faars aur maadee kay faujee afsar aur soobon kay shurfa aur raees sab shareek huay. 4shahenshaah nay pooray 180 din tak apnee saltanat kee zabardast daulat aur apnee quvvat kee shaan-o-shaukat ka muzaahara kiya.
5is kay baad us nay sosan kay qilaay men rahenay vaalay tamaam logon kee chhotay say lay kar baday tak ziyaafat kee. yah jashn saat din tak shaahee baagh kay sahen men manaaya gaya. 6marmar [a] lafzee tarjuma : sang-ay-jarraahat, alabasater. kay satoonon kay darmiyaan kataan kay safed aur qirmizee rang kay qeemtee parday latkaaay gaay thay, aur vah safed aur arghvaanee rang kee doriyon kay zareeay satoonon men lagay chaandee kay chhallon kay saath bandhay huay thay. mehamaanon kay liyay sonay aur chaandee kay sofay pachcheekaaree kay aisay farsh par rakhay huay thay jis men marmar kay ilaava mazeed teen qeemtee patthar istemaal huay thay. 7mai sonay kay piyaalon men pilaaee gaee. har piyaala farq aur laasaanee tha, aur baadshaah kee fayyaazee kay mutaabiq shaahee mai kee kasrat thee. 8har koee jitnee jee chaahay pee sakta tha, kyoonki baadshaah nay hukm diya tha ki saaqee mehamaanon kee har khwaahish pooree karen.
vashtee malika kee bartarafee
9is dauraan vashtee malika nay mahel kay andar khavaateen kee ziyaafat kee. 10saatven din jab baadshaah ka dil mai pee pee kar bahel gaya tha to us nay un saat khwaajaasaraaon ko bulaaya jo khaas us kee khidmat kartay thay. un kay naam mahoomaan, bizzata, kharboona,bigta, abagta, zitaar aur karkas thay. 11us nay hukm diya, “vashtee malika ko shaahee taaj pahena kar meray huzoor lay aao taaki shurfa aur baaqee mehamaanon ko us kee khoobsoortee maaloom ho jaaay.” kyoonki vashtee nihaayat khoobsoorat thee. 12lekin jab khwaajaasara malika kay paas gaay to us nay aanay say inkaar kar diya.
yah sun kar baadshaah aag-bagoola ho gayaa 13aur daanaaon say baat kee jo auqaat kay aalim thay, kyoonki dastoor yah tha ki baadshaah qaanoonee muaamlon men ulma say mashvra karay. 14aalimon kay naam ka kaarsheena, sitaar, admaata, tarsees, maras, marsina aur mamookaan thay. faars aur maadee kay yah saat shurfa aazaadee say baadshaah kay huzoor a saktay thay aur saltanat men sab say aala uhda rakhtay thay.
15akhasverus nay poochha, “qaanoon kay lihaaz say vashtee malika kay saath kya sulook kiya jaaay? kyoonki us nay khwaajaasaraaon kay haath bhejay huay shaahee hukm ko naheen maana.”
16mamookaan nay baadshaah aur deegar shurfa kee maujoodgee men javaab diya, “vashtee malika nay is say na sirf baadshaah ka balki us kay tamaam shurfa aur saltanat kay tamaam soobon men rahenay vaalee qaumon ka bhee gunaah kiya hai. 17kyoonki jo kuchh us nay kiya hai vah tamaam khavaateen ko maaloom ho jaaega. phir vah apnay shauharon ko haqeer jaan kar kahengee, ‘go baadshaah nay vashtee malika ko apnay huzoor aanay ka hukm diya to bhee us nay us kay huzoor aanay say inkaar kiya.’ 18aaj hee faars aur maadee kay shurfa kee beeviyaan malika kee yah baat sun kar apnay shauharon say aisa hee sulook karengee. tab ham zillat aur ghussay kay jaal men ulajh jaaengay. 19agar baadshaah ko manzoor ho to vah elaan karen ki vashtee malika ko phir kabhee akhasverus baadshaah kay huzoor aanay kee ijaazat naheen. aur laazim hai ki yah elaan faars aur maadee kay qavaaneen men darj kiya jaaay taaki usay mansookh na kiya ja sakay. phir baadshaah kisee aur ko malika ka uhda den, aisee aurat ko jo ziyaada laaiq ho. 20jab elaan pooree saltanat men kiya jaaega to tamaam aurten apnay shauharon kee izzat karengee, khwaah vah chhotay hon ya baday.”
21yah baat baadshaah aur us kay shurfa ko pasand aaee. mamookaan kay mashvray kay mutaabiq 22akhasverus nay saltanat kay tamaam soobon men khat bhejay. har soobay ko us kay apnay tarz-ay-tahereer men aur har qaum ko us kee apnee zabaan men khat mil gaya ki har mard apnay ghar ka sarparast hai aur ki har khaandaan men shauhar kee zabaan bolee jaaay.