Āstar 3
haamaan yahoodee qaum ko halaak karna chaahata hai
1kuchh der kay baad baadshaah nay haamaan bin hammadaata ajaajee ko sarfaraaz karkay darbaar men sab say aala uhda diya. 2jab kabhee haamaan a maujood hota to shaahee sahen kay darvaazay kay tamaam shaahee afsar munh kay bal jhuk jaatay, kyoonki baadshaah nay aisa karnay ka hukm diya tha. lekin mardkee aisa naheen karta tha.
3yah dekh kar deegar shaahee mulaazimon nay us say poochha, “aap baadshaah kay hukm kee khilaafvarzee kyoon kar rahay hain?”
4us nay javaab diya, “main to yahoodee hoon.” roz-ba-roz doosray usay samjhaatay rahay, lekin vah na maana. aakhirkaar unhon nay haamaan ko ittila dee, kyoonki vah dekhna chaahatay thay ki kya vah mardkee ka javaab qabool karega ya naheen.
5jab haamaan nay khud dekha ki mardkee meray saamnay munh kay bal naheen jhukta to vah aag-bagoola ho gaya. 6vah fauran mardkee ko qatl karnay kay mansoobay banaanay laga. lekin yah us kay liyay kaafee naheen tha. choonki usay bataaya gaya tha ki mardkee yahoodee hai is liyay vah faarsee saltanat men rahenay vaalay tamaam yahoodiyon ko halaak karnay ka raasta dhoondnay laga.
7chunaanchay akhasverus baadshaah kee hukoomat kay 12ven saal kay pahelay maheenay neesaan [a] aprail ta maee. men haamaan kee maujoodgee men qur’a daala gaya. qur’a daalnay say haamaan yahoodiyon ko qatl karnay kee sab say mubaarak taareekh maaloom karna chaahata tha. (qur’a kay liyay ‘poor’ kaha jaata tha.) is tareeqay say 12ven maheenay adaar ka 13vaan din [b] 7 maarch, 473 q m. nikla. 8tab haamaan nay baadshaah say baat kee, “aap kee saltanat kay tamaam soobon men ek qaum bikhree huee hai jo apnay aap ko deegar qaumon say alag rakhtee hai. us kay qavaaneen doosree tamaam qaumon say mukhtalif hain, aur us kay afraad baadshaah kay qavaaneen ko naheen maantay. munaasib naheen ki baadshaah unhen bardaasht karen!
9agar baadshaah ko manzoor ho to elaan karen ki is qaum ko halaak kar diya jaaay. tab main shaahee khazaanon men 3,35,000 kilograam chaandee jama kara doonga.”
10baadshaah nay apnee unglee say vah angoothee utaaree jo shaahee muhar lagaanay kay liyay istemaal hotee thee aur usay yahoodiyon kay dushman haamaan bin hammadaata ajaajee ko day kar 11kaha, “chaandee aur qaum aap hee kee hain, us kay saath vah kuchh karen jo aap ko achchha lagay.”
12pahelay maheenay kay 13ven din [c] 17 aprail. haamaan nay shaahee muharriron ko bulaaya taaki vah us kee tamaam hidaayaat kay mutaabiq khat likh kar baadshaah kay gavarnaron, soobon kay deegar haakimon aur tamaam qaumon kay buzurgon ko bhejen. yah khat har qaum kay apnay tarz-ay-tahereer aur apnee zabaan men qalamband huay. unhen baadshaah ka naam lay kar likha gaya, phir shaahee angoothee kee muhar un par lagaaee gaee. un men zail ka elaan kiya gaya.
13“ek hee din men tamaam yahoodiyon ko halaak aur pooray taur par tabaah karna hai, khwaah chhotay hon ya baday, bachchay hon ya aurten. saath saath un kee milkiyat bhee zabt kar lee jaaay.” is kay liyay 12ven maheenay adaar ka 13vaan din [d] 7 maarch. muqarrar kiya gaya.
yah elaan tezrau qaasidon kay zareeay saltanat kay tamaam soobon men pahunchaaya gayaa 14taaki us kee tasdeeq qaanoonee taur par kee jaaay aur tamaam qaumen muqarrara din kay liyay tayyaar hon.
15baadshaah kay hukm par qaasid chal niklay. yah elaan sosan kay qilaay men bhee kiya gaya. phir baadshaah aur haamaan khaanay-peenay kay liyay baith gaay. lekin pooray shaher men halchal mach gaee.