Ḵẖurooj 10

tiddiyaan

¹phir rabb nay moosa say kaha, “firaaun kay paas ja, kyoonki main nay us ka aur us kay darbaariyon ka dil sakht kar diya hai taaki un kay darmiyaan apnay mojizon aur apnee qudrat ka izhaar kar sakoon ²aur tum apnay betay-betiyon aur potay-potiyon ko suna sako ki main nay misriyon kay saath kya sulook kiya hai aur un kay darmiyaan kis tarah kay mojizay karkay apnee qudrat ka izhaar kiya hai. yoon tum jaan logay ki main rabb hoon.”

³moosa aur haaroon firaaun kay paas gaay. unhon nay us say kaha, “rabb ibraaniyon kay khuda ka farmaan hai, ‘too kab tak meray saamnay hathiyaar daalnay say inkaar karega? meree qaum ko meree ibaadat karnay kay liyay jaanay day, ⁴varna main kal teray mulk men tiddiyaan laaoonga. ⁵un kay ghol zameen par yoon chha jaaengay ki zameen nazar hee naheen aaegee. jo kuchh olon nay tabaah naheen kiya usay vah chat kar jaaengee. bachay huay darakhton kay pattay bhee khatm ho jaaengay. ⁶teray mahel, teray uhdedaaron aur baaqee logon kay ghar un say bhar jaaengay. jab say misree is mulk men aabaad huay hain tum nay kabhee tiddiyon ka aisa sakht hamla naheen dekha hoga’.” yah kah kar moosa palat kar vahaan say chala gaya.

⁷is par darbaariyon nay firaaun say baat kee, “ham kab tak is mard kay jaal men phansay rahen? israaeeliyon ko rabb apnay khuda kee ibaadat karnay kay liyay jaanay den. kya aap ko abhee tak maaloom naheen ki misr barbaad ho gaya hai?”

⁸tab moosa aur haaroon ko firaaun kay paas bulaaya gaya. us nay un say kaha, “jaao, apnay khuda kee ibaadat karo. lekin yah bataao ki kaun kaun saath jaaega?” ⁹moosa nay javaab diya, “hamaaray javaan aur boodhay saath jaaengay. ham apnay betay-betiyon, bhed-bakriyon aur gaay-bailon ko bhee saath lay kar jaaengay. ham sab kay sab jaaengay, kyoonki hamen rabb kee eed manaanee hai.”

¹⁰firaaun nay tanzan kaha, “theek hai, jaao aur rabb tumhaaray saath ho. naheen, main kis tarah tum sab ko baal-bachchon samet jaanay day sakta hoon? tum nay koee bura mansooba banaaya hai. ¹¹naheen, sirf mard ja kar rabb kee ibaadat kar saktay hain. tum nay to yahee darakhwaast kee thee.” tab moosa aur haaroon ko firaaun kay saamnay say nikaal diya gaya.

¹²phir rabb nay moosa say kaha, “misr par apna haath utha taaki tiddiyaan a kar misr kee sarzameen par phail jaaen. jo kuchh bhee kheton men olon say bach gaya hai usay vah kha jaaengee.”

¹³moosa nay apnee laathee misr par uthaaee to rabb nay mashriq say aandhee chalaaee jo saara din aur saaree raat chaltee rahee aur aglee subah tak misr men tiddiyaan pahunchaaeen. ¹⁴beshumaar tiddiyaan pooray mulk par hamla karkay har jagah baith gaeen. is say pahelay ya baad men kabhee bhee tiddiyon ka itna sakht hamla na hua tha. ¹⁵unhon nay zameen ko yoon dhaank liya ki vah kaalee nazar aanay lagee. jo kuchh bhee olon say bach gaya tha chaahay kheton kay pauday ya darakhton kay phal thay unhon nay kha liya. misr men ek bhee darakht ya pauda na raha jis kay pattay bach gaay hon.

¹⁶tab firaaun nay moosa aur haaroon ko jaldee say bulvaaya. us nay kaha, “main nay tumhaaray khuda ka aur tumhaara gunaah kiya hai. ¹⁷ab ek aur martaba mera gunaah muaaf karo aur rabb apnay khuda say dua karo taaki maut kee yah haalat mujh say door ho jaaay.”

¹⁸moosa nay mahel say nikal kar rabb say dua kee. ¹⁹javaab men rabb nay hava ka rukh badal diya. us nay maghrib say tez aandhee chalaaee jis nay tiddiyon ko uda kar baher-ay-qulzum men daal diya. misr men ek bhee tiddee na rahee. ²⁰lekin rabb nay honay diya ki firaaun phir ad gaya. us nay israaeeliyon ko jaanay na diya.

andheraa

²¹is kay baad rabb nay moosa say kaha, “apna haath aasmaan kee taraf utha to misr par andhera chha jaaega. itna andhera hoga ki banda usay chhoo sakega.” ²²moosa nay apna haath aasmaan kee taraf uthaaya to teen din tak misr par gahera andhera chhaaya raha. ²³teen din tak log na ek doosray ko dekh sakay, na kaheen ja sakay. lekin jahaan israaeelee rahetay thay vahaan raushnee thee.

²⁴tab firaaun nay moosa ko phir bulvaaya aur kaha, “jaao, rabb kee ibaadat karo! tum apnay saath baal-bachchon ko bhee lay ja saktay ho. sirf apnee bhed-bakriyaan aur gaay-bail peechhay chhod dena.” ²⁵moosa nay javaab diya, “kya aap hee hamen qurbaaniyon kay liyay jaanvar dengay taaki unhen rabb apnay khuda ko pesh karen? ²⁶yaqeenan naheen. is liyay laazim hai ki ham apnay jaanvaron ko saath lay kar jaaen. ek khur bhee peechhay naheen chhoda jaaega, kyoonki abhee tak hamen maaloom naheen ki rabb kee ibaadat kay liyay kin kin jaanvaron kee zaroorat hogee. yah us vaqt hee pata chalega jab ham manzil-ay-maqsood par pahunchengay. is liyay zarooree hai ki ham sab ko apnay saath lay kar jaaen.”

²⁷lekin rabb kee marzee kay mutaabiq firaaun ad gaya. us nay unhen jaanay na diya. ²⁸us nay moosa say kaha, “dafa ho ja. khabardaar! phir kabhee apnee shakl na dikhaana, varna tujhay maut kay havaalay kar diya jaaega.” ²⁹moosa nay kaha, “theek hai, aap kee marzee. main phir kabhee aap kay saamnay naheen aaoonga.”