Ḵẖurooj 14

israaeel samundar men say guzarta hai

¹tab rabb nay moosa say kaha, ²“israaeeliyon ko kah dena ki vah peechhay mud kar mijdaal aur samundar kay beech yaanee fee-hakheerot kay nazdeek ruk jaaen. vah baal-safon kay muqaabil saahil par apnay khaimay lagaaen. ³yah dekh kar firaaun samjhega ki israaeelee raasta bhool kar aavaara phir rahay hain aur ki registaan nay chaaron taraf unhen gher rakha hai. ⁴phir main firaaun ko dubaara ad jaanay doonga, aur vah israaeeliyon ka peechha karega. lekin main firaaun aur us kee pooree fauj par apna jalaal zaahir karoonga. misree jaan lengay ki main hee rabb hoon.” israaeeliyon nay aisa hee kiya.

⁵jab misr kay baadshaah ko ittila dee gaee ki israaeelee hijrat kar gaay hain to us nay aur us kay darbaariyon nay apna khayaal badal kar kaha, “ham nay kya kiya hai? ham nay unhen jaanay diya hai, aur ab ham un kee khidmat say maheroom ho gaay hain.” ⁶chunaanchay baadshaah nay apna jangee rath tayyaar karvaaya aur apnee fauj ko lay kar nikla. ⁷vah 600 behtareen qism kay rath aur misr kay baaqee tamaam rathon ko saath lay gaya. tamaam rathon par afsaraan muqarrar thay. ⁸rabb nay misr kay baadshaah firaaun ko dubaara ad jaanay diya tha, is liyay jab israaeelee baday ikhtiyaar kay saath nikal rahay thay to vah un ka taaqqub karnay laga. ⁹israaeeliyon ka peechha kartay kartay firaaun kay tamaam ghoday, rath, savaar aur faujee un kay qareeb pahunchay. israaeelee baher-ay-qulzum kay saahil par baal-safon kay muqaabil fee-hakheerot kay nazdeek khaimay laga chukay thay.

¹⁰jab israaeeliyon nay firaaun aur us kee fauj ko apnee taraf badhtay dekha to vah sakht ghabra gaay aur madad kay liyay rabb kay saamnay cheekhnay-chillaanay lagay. ¹¹unhon nay moosa say kaha, “kya misr men qabron kee kamee thee ki aap hamen registaan men lay aaay hain? hamen misr say nikaal kar aap nay hamaaray saath kya kiya hai? ¹²kya ham nay misr men aap say darakhwaast naheen kee thee ki meharbaanee karkay hamen chhod den, hamen misriyon kee khidmat karnay den? yahaan a kar registaan men mar jaanay kee nisbat behatar hota ki ham misriyon kay ghulaam rahetay.”

¹³lekin moosa nay javaab diya, “mat ghabraao. aaraam say khaday raho aur dekho ki rabb tumhen aaj kis tarah bachaaega. aaj kay baad tum in misriyon ko phir kabhee naheen dekhogay. ¹⁴rabb tumhaaray liyay ladega. tumhen bas, chup rahena hai.”

¹⁵phir rabb nay moosa say kaha, “too meray saamnay kyoon cheekh raha hai? israaeeliyon ko aagay badhnay ka hukm day. ¹⁶apnee laathee ko pakad kar usay samundar kay oopar utha to vah do hisson men bat jaaega. israaeelee khushk zameen par samundar men say guzarengay. ¹⁷main misriyon ko aday rahenay doonga taaki vah israaeeliyon ka peechha karen. phir main firaaun, us kee saaree fauj, us kay rathon aur us kay savaaron par apna jalaal zaahir karoonga. ¹⁸jab main firaaun, us kay rathon aur us kay savaaron par apna jalaal zaahir karoonga to misree jaan lengay ki main hee rabb hoon.”

¹⁹allaah ka farishta israaeelee lashkar kay aagay aagay chal raha tha. ab vah vahaan say hat kar un kay peechhay khada ho gaya. baadal ka satoon bhee logon kay aagay say hat kar un kay peechhay ja khada hua. ²⁰is tarah baadal misriyon aur israaeeliyon kay lashkaron kay darmiyaan a gaya. pooree raat misriyon kee taraf andhera hee andhera tha jabki israaeeliyon kee taraf raushnee thee. is liyay misree pooree raat kay dauraan israaeeliyon kay qareeb na a sakay.

²¹moosa nay apna haath samundar kay oopar uthaaya to rabb nay mashriq say tez aandhee chalaaee. aandhee tamaam raat chaltee rahee. us nay samundar ko peechhay hata kar us kee tah khushk kar dee. samundar do hisson men bat gayaa ²²to israaeelee samundar men say khushk zameen par chaltay huay guzar gaay. un kay daaeen aur baaeen taraf paanee deevaar kee tarah khada raha.

²³jab misriyon ko pata chala to firaaun kay tamaam ghoday, rath aur ghudsavaar bhee un kay peechhay peechhay samundar men chalay gaay. ²⁴subah-saveray hee rabb nay baadal aur aag kay satoon say misr kee fauj par nigaah kee aur us men abtaree paida kar dee. ²⁵un kay rathon kay pahiay nikal gaay to un par qaaboo paana mushkil ho gaya. misriyon nay kaha, “aao, ham israaeeliyon say bhaag jaaen, kyoonki rabb un kay saath hai. vahee misr ka muqaabla kar raha hai.”

²⁶tab rabb nay moosa say kaha, “apna haath samundar kay oopar utha. phir paanee vaapas a kar misriyon, un kay rathon aur ghudasavaaron ko dubo dega.” ²⁷moosa nay apna haath samundar kay oopar uthaaya to din nikaltay vaqt paanee maamool kay mutaabiq bahenay laga, aur jis taraf misree bhaag rahay thay vahaan paanee hee paanee tha. yoon rabb nay unhen samundar men baha kar gharq kar diya. ²⁸paanee vaapas a gaya. us nay rathon aur ghudasavaaron ko dhaank liya. firaaun kee pooree fauj jo israaeeliyon ka taaqqub kar rahee thee doob kar tabaah ho gaee. un men say ek bhee na bacha. ²⁹lekin israaeelee khushk zameen par samundar men say guzray. un kay daaeen aur baaeen taraf paanee deevaar kee tarah khada raha.

³⁰us din rabb nay israaeeliyon ko misriyon say bachaaya. misriyon kee laashen unhen saahil par nazar aaeen. ³¹jab israaeeliyon nay rabb kee yah azeem qudrat dekhee jo us nay misriyon par zaahir kee thee to rabb ka khauf un par chha gaya. vah us par aur us kay khaadim moosa par etimaad karnay lagay.