Azra 4

rabb kay ghar kee taameer kee mukhaalafat

¹yahoodaah aur binyameen kay dushmanon ko pata chala ki vatan men vaapas aaay huay israaeelee rabb israaeel kay khuda kay liyay ghar taameer kar rahay hain. ²zarubbaabal aur khaandaanee sarparaston kay paas a kar unhon nay darakhwaast kee, “ham bhee aap kay saath mil kar rabb kay ghar ko taameer karna chaahatay hain. kyoonki jab say asoor kay baadshaah asarhaddoon nay hamen yahaan la kar basaaya hai us vaqt say ham aap kay khuda kay taalib rahay aur usay qurbaaniyaan pesh kartay aaay hain.” ³lekin zarubbaabal, yashooa aur israaeel kay baaqee khaandaanee sarparaston nay inkaar kiya, “naheen, is men aap ka hamaaray saath koee vaasta naheen. ham akelay hee rabb israaeel kay khuda kay liyay ghar banaaengay, jis tarah faars kay baadshaah khoras nay hamen hukm diya hai.”

⁴yah sun kar mulk kee doosree qaumen yahoodaah kay logon kee hausalaashikanee aur unhen daraanay kee koshish karnay lageen taaki vah imaarat banaanay say baaz aaen. ⁵yahaan tak ki vah faars kay baadshaah khoras kay kuchh musheeron ko rishvat day kar kaam roknay men kaamyaab ho gaay. yoon rabb kay ghar kee taameer khoras baadshaah kay daur-ay-hukoomat say lay kar daara baadshaah kee hukoomat tak rukee rahee.

⁶baad men jab akhasverus baadshaah kee hukoomat shuroo huee to israaeel kay dushmanon nay yahoodaah aur yarooshalam kay baashindon par ilzaam laga kar shikaaytee khat likha.

⁷phir artakhshasta baadshaah kay daur-ay-hukoomat men usay yahoodaah kay dushmanon kee taraf say shikaaytee khat bheja gaya. khat kay peechhay khaaskar bishlaam, mitradaat aur taabiel thay. pahelay usay araamee zabaan men likha gaya, aur baad men us ka tarjuma hua. ⁸saamriya kay gavarnar rahoom aur us kay meeramunshee shamsee nay shahenshaah ko khat likh diya jis men unhon nay yarooshalam par ilzaamaat lagaaay. patay men likha tha,

⁹az : rahoom gavarnar aur meeramunshee shamsee, neez un kay hamkhidmat qaazee, safeer aur tarpal, sippar, arak, baabal aur sosan yaanee ailaam kay mard, ¹⁰neez baaqee tamaam qaumen jin ko azeem aur azeez baadshaah ashoorbaneepaal nay utha kar saamriya aur darya-ay-furaat kay baaqeemaanda maghribee ilaaqay men basa diya tha.

¹¹khat men likha tha,

“shahenshaah artakhshasta kay naam,

az : aap kay khaadim jo darya-ay-furaat kay maghrib men rahetay hain.

¹²shahenshaah ko ilm ho ki jo yahoodee aap kay huzoor say hamaaray paas yarooshalam pahunchay hain vah is vaqt us baaghee aur shareer shaher ko naay siray say taameer kar rahay hain. vah faseel ko bahaal karkay bunyaadon kee marammat kar rahay hain. ¹³shahenshaah ko ilm ho ki agar shaher naay siray say taameer ho jaaay aur us kee faseel takmeel tak pahunchay to yah log taiks, kharaaj aur mahesool ada karnay say inkaar kar dengay. tab baadshaah ko nuqsaan pahunchega. ¹⁴ham to namakaheraam naheen hain, na shahenshaah kee tauheen bardaasht kar saktay hain. is liyay ham guzaarish kartay hain ¹⁵ki aap apnay baapdaada kee taareekhee dastaavezaat say yarooshalam kay baaray men maaloomaat haasil karen, kyoonki un men is baat kee tasdeeq milegee ki yah shaher maazee men sarkash raha. haqeeqat men shaher ko isee liyay tabaah kiya gaya ki vah baadshaahon aur soobon ko tang karta raha aur qadeem zamaanay say hee baghaavat ka mamba raha hai. ¹⁶gharaz ham shahenshaah ko ittila detay hain ki agar yarooshalam ko dubaara taameer kiya jaaay aur us kee faseel takmeel tak pahunchay to darya-ay-furaat kay maghribee ilaaqay par aap ka qaaboo jaata rahega.”

¹⁷shahenshaah nay javaab men likha,

“main yah khat rahoom gavarnar, shamsee meeramunshee aur saamriya aur darya-ay-furaat kay maghrib men rahenay vaalay un kay hamkhidmat afsaron ko likh raha hoon.

aap ko salaam! ¹⁸aap kay khat ka tarjuma meree maujoodgee men hua hai aur usay meray saamnay padha gaya hai. ¹⁹meray hukm par yarooshalam kay baaray men maaloomaat haasil kee gaee hain. maaloom hua ki vaaqaee yah shaher qadeem zamaanay say baadshaahon kee mukhaalafat karkay sarkashee aur baghaavat ka mamba raha hai. ²⁰neez, yarooshalam taaqatvar baadshaahon ka daar-ul-hakoomat raha hai. un kee itnee taaqat thee ki darya-ay-furaat kay pooray maghribee ilaaqay ko unhen mukhtalif qism kay taiks aur kharaaj ada karna pada. ²¹chunaanchay ab hukm den ki yah aadmee shaher kee taameer karnay say baaz aaen. jab tak main khud hukm na doon us vaqt tak shaher ko naay siray say taameer karnay kee ijaazat naheen hai. ²²dhyaan den ki is hukm kee takmeel men sustee na kee jaaay, aisa na ho ki shahenshaah ko bada nuqsaan pahunchay.”

²³joon hee khat kee kaapee rahoom, shamsee aur un kay hamkhidmat afsaron ko padh kar sunaaee gaee to vah yarooshalam kay liyay ravaana huay aur yahoodiyon ko zabardastee kaam jaaree rakhnay say rok diya.

²⁴chunaanchay yarooshalam men allaah kay ghar ka taameeree kaam ruk gaya, aur vah faars kay baadshaah daara kee hukoomat kay doosray saal tak ruka raha.