Azra 5

rabb kay ghar kee taameer dubaara shuroo hotee hai

¹ek din do nabee banaam hajjee aur zakariyaah bin iddoo uth kar israaeel kay khuda kay naam men jo un kay oopar tha yahoodaah aur yarooshalam kay yahoodiyon kay saamnay nubuvvat karnay lagay. ²un kay hausalaaafza alfaaz sun kar zarubbaabal bin siyaalteeel aur yashooa bin yoosdaq nay faisla kiya ki ham dubaara yarooshalam men allaah kay ghar kee taameer shuroo karengay. donon nabee is men un kay saath thay aur un kee madad kartay rahay.

³lekin joon hee kaam shuroo hua to darya-ay-furaat kay maghribee ilaaqay kay gavarnar tattnee aur shatar-boznee apnay hamkhidmat afsaron samet yarooshalam pahunchay. unhon nay poochha, “kis nay aap ko yah ghar banaanay aur is ka dhaancha takmeel tak pahunchaanay kee ijaazat dee? ⁴is kaam kay liyay zimmaadaar aadmiyon kay naam hamen bataaen!” ⁵lekin un ka khuda yahoodaah kay buzurgon kee nigraanee kar raha tha, is liyay unhen roka na gaya. kyoonki logon nay socha ki pahelay daara baadshaah ko ittila dee jaaay. jab tak vah faisla na karay us vaqt tak kaam roka na jaaay.

⁶phir darya-ay-furaat kay maghribee ilaaqay kay gavarnar tattnee, shatar-boznee aur un kay hamkhidmat afsaron nay daara baadshaah ko zail ka khat bheja,

⁷“daara baadshaah ko dil kee gaheraaiyon say salaam kahetay hain! ⁸shahenshaah ko ilm ho ki sooba yahoodaah men ja kar ham nay dekha ki vahaan azeem khuda ka ghar banaaya ja raha hai. us kay liyay baday taraashay huay patthar istemaal ho rahay hain aur deevaaron men shaheteer lagaaay ja rahay hain. log badee jaanfishaanee say kaam kar rahay hain, aur makaan un kee mehanat kay baais tezee say ban raha hai. ⁹ham nay buzurgon say poochha, ‘kis nay aap ko yah ghar banaanay aur is ka dhaancha takmeel tak pahunchaanay kee ijaazat dee hai?’ ¹⁰ham nay un kay naam bhee maaloom kiay taaki likh kar aap ko bhej saken. ¹¹unhon nay hamen javaab diya,

‘ham aasmaan-o-zameen kay khuda kay khaadim hain, aur ham us ghar ko az sar-ay-nau taameer kar rahay hain jo bahut saal pahelay yahaan qaaim tha. israaeel kay ek azeem baadshaah nay usay qadeem zamaanay men bana kar takmeel tak pahunchaaya tha. ¹²lekin hamaaray baapdaada nay aasmaan kay khuda ko taish dilaaya, aur nateejay men us nay unhen baabal kay baadshaah nabookadnazzar kay havaalay kar diya jis nay rabb kay ghar ko tabaah kar diya aur qaum ko qaid karkay baabal men basa diya. ¹³lekin baad men jab khoras baadshaah ban gaya to us nay apnee hukoomat kay pahelay saal men hukm diya ki allaah kay is ghar ko dubaara taameer kiya jaaay. ¹⁴saath saath us nay sonay-chaandee kee vah cheezen vaapas kar deen jo nabookadnazzar nay yarooshalam men allaah kay ghar say loot kar baabal kay mandir men rakh dee theen. khoras nay yah cheezen ek aadmee kay sapurd kar deen jis ka naam shesbazzar tha aur jisay us nay yahoodaah ka gavarnar muqarrar kiya tha. ¹⁵us nay usay hukm diya ki saamaan ko yarooshalam lay jaao aur rabb kay ghar ko puraanee jagah par az sar-ay-nau taameer karkay yah cheezen us men mahfooz rakho. ¹⁶tab shesbazzar nay yarooshalam a kar allaah kay ghar kee bunyaad rakhee. usee vaqt say yah imaarat zer-ay-taameer hai, agarchi yah aaj tak mukammal naheen huee.’

¹⁷chunaanchay agar shahenshaah ko manzoor ho to vah tafteesh karen ki kya baabal kay shaahee daftar men koee aisee dastaavez maujood hai jo is baat kee tasdeeq karay ki khoras baadshaah nay yarooshalam men rabb kay ghar ko az sar-ay-nau taameer karnay ka hukm diya. guzaarish hai ki shahenshaah hamen apna faisla pahuncha den.”