Azra 7
azra imaam ko yarooshalam bheja jaata hai
1in vaaqiaat kay kaafee arsay baad ek aadmee banaam azra baabal ko chhod kar yarooshalam aaya. us vaqt faars kay baadshaah artakhshasta kee hukoomat thee. aadmee ka poora naam azra bin siraayaah bin azariyaah bin khilaqiyaah 2bin salloom bin sadoq bin akheetoob 3bin amariyaah bin azariyaah bin miraayot 4bin zarakhiyaah bin uzzee bin buqqee 5bin abeesooa bin feenhaas bin ileeazar bin haaroon tha. (haaroon imaam-ay-aazam tha).
6azra paak navishton ka ustaad aur us shareeat ka aalim tha jo rabb israaeel kay khuda nay moosa kee maarifat dee thee. jab azra baabal say yarooshalam kay liyay ravaana hua to shahenshaah nay us kee har khwaahish pooree kee, kyoonki rabb us kay khuda ka shafeeq haath us par tha. 7kaee israaeelee us kay saath gaay. imaam, laavee, gulookaar aur rabb kay ghar kay darbaan aur khidmatgaar bhee un men shaamil thay. yah artakhshasta baadshaah kee hukoomat kay saatven saal men hua. 8-9 qaafila pahelay maheenay kay pahelay din [a] 8 aprail. baabal say ravaana hua aur paanchven maheenay kay pahelay din [b] 4 agast. saheeh-salaamat yarooshalam pahuncha, kyoonki allaah ka shafeeq haath azra par tha. 10vajah yah thee ki azra nay apnay aap ko rabb kee shareeat kee tafteesh karnay, us kay mutaabiq zindagee guzaarnay aur israaeeliyon ko us kay ahkaam aur hidaayaat kee taaleem denay kay liyay vaqf kiya tha.
shahenshaah azra ko mukhtaaranaama deta hai
11artakhshasta baadshaah nay azra imaam ko zail ka mukhtaaranaama day diya, usee azra ko jo paak navishton ka ustaad aur un ahkaam aur hidaayaat ka aalim tha jo rabb nay israaeel ko dee theen. mukhtaaranaamay men likha tha,
12“az : shahenshaah artakhshastaa
azra imaam ko jo aasmaan kay khuda kee shareeat ka aalim hai, salaam! 13main hukm deta hoon ki agar meree saltanat men maujood koee bhee israaeelee aap kay saath yarooshalam ja kar vahaan rahena chaahay to vah ja sakta hai. is men imaam aur laavee bhee shaamil hain, 14shahenshaah aur us kay saat musheer aap ko yahoodaah aur yarooshalam bhej rahay hain taaki aap allaah kee us shareeat kee raushnee men jo aap kay haath men hai yahoodaah aur yarooshalam ka haal jaanch len. 15jo sona-chaandee shahenshaah aur us kay musheeron nay apnee khushee say yarooshalam men sukoonat karnay vaalay israaeel kay khuda kay liyay qurbaan kee hai usay apnay saath lay jaaen. 16neez, jitnee bhee sona-chaandee aap ko sooba baabal say mil jaaegee aur jitnay bhee hadiay qaum aur imaam apnee khushee say apnay khuda kay ghar kay liyay jama karen unhen apnay saath lay jaaen. 17un paison say bail, mendhay, bhed kay bachchay aur un kee qurbaaniyon kay liyay darkaar ghalla aur mai kee nazren khareed len, aur unhen yarooshalam men apnay khuda kay ghar kee qurbaangaah par qurbaan karen. 18jo paisay bach jaaen un ko aap aur aap kay bhaaee vaisay kharch kar saktay hain jaisay aap ko munaasib lagay. shart yah hai ki aap kay khuda kee marzee kay mutaabiq ho. 19yarooshalam men apnay khuda ko vah tamaam cheezen pahunchaaen jo aap ko rabb kay ghar men khidmat kay liyay dee jaaengee. 20baaqee jo kuchh bhee aap ko apnay khuda kay ghar kay liyay khareedna paday us kay paisay shaahee khazaana ada karega.
21main, artakhshasta baadshaah darya-ay-furaat kay maghrib men rahenay vaalay tamaam khazaanachiyon ko hukm deta hoon ki har tarah say azra imaam kee maalee madad karen. jo bhee aasmaan kay khuda kee shareeat ka yah ustaad maangay vah usay diya jaaay. 22usay 3,400 kilograam chaandee, 16,000 kilograam gandum, 2,200 litar mai aur 2,200 litar zaitoon ka tel tak dena. namak usay utna milay jitna vah chaahay. 23dhyaan say sab kuchh muhayya karen jo aasmaan ka khuda apnay ghar kay liyay maangay. aisa na ho ki shahenshaah aur us kay beton kee saltanat us kay ghazab ka nishaana ban jaaay. 24neez, aap ko ilm ho ki aap ko allaah kay is ghar men khidmat karnay vaalay kisee shakhs say bhee kharaaj ya kisee qism ka taiks lenay kee ijaazat naheen hai, khwaah vah imaam, laavee, gulookaar, rabb kay ghar ka darbaan ya us ka khidmatgaar ho.
25ai azra, jo hikmat aap kay khuda nay aap ko ata kee hai us kay mutaabiq majistret aur qaazee muqarrar karen jo aap kee qaum kay un logon ka insaaf karen jo darya-ay-furaat kay maghrib men rahetay hain. jitnay bhee aap kay khuda kay ahkaam jaantay hain vah is men shaamil hain. aur jitnay in ahkaam say vaaqif naheen hain unhen aap ko taaleem denee hai. 26jo bhee aap kay khuda kee shareeat aur shahenshaah kay qaanoon kee khilaafvarzee karay usay sakhtee say saza dee jaaay. jurm kee sanjeedgee ka lihaaz karkay usay ya to saza-ay-maut dee jaaay ya jilaavatan kiya jaaay, us kee milkiyat zabt kee jaaay ya usay jel men daala jaaay.”
azra kee sitaaish
27rabb hamaaray baapdaada kay khuda kee tamjeed ho jis nay shahenshaah kay dil ko yarooshalam men rabb kay ghar ko shaandaar banaanay kee tahereek dee hai. 28usee nay shahenshaah, us kay musheeron aur tamaam asar-o-rasookh rakhnay vaalay afsaron kay dilon ko meree taraf maail kar diya hai. choonki rabb meray khuda ka shafeeq haath mujh par tha is liyay mera hausla badh gaya, aur main nay israaeel kay khaandaanee sarparaston ko apnay saath israaeel vaapas jaanay kay liyay jama kiya.