Azra 8
azra kay saath jilaavatanee say vaapas aanay vaalon kee faherist
1darj-ay-zail un khaandaanee sarparaston kee faherist hai jo artakhshasta baadshaah kee hukoomat kay dauraan meray saath baabal say yarooshalam kay liyay ravaana huay. har khaandaan kay mardon kee taadaad bhee darj hai :
2-3 feenhaas kay khaandaan ka jairsom,
itmar kay khaandaan ka daanyaal,
daaood kay khaandaan ka hattoosh bin sakaniyaah,
paraoos kay khaandaan ka zakariyaah. 150 mard us kay saath nasbanaamay men darj thay.
4pakhat-moaab kay khaandaan ka ileehooainee bin zarakhiyaah 200 mardon kay saath,
5zattoo kay khaandaan ka sakaniyaah bin yahezeeel 300 mardon kay saath,
6adeen kay khaandaan ka abad bin yoontan 50 mardon kay saath,
7ailaam kay khaandaan ka yasaayaah bin ataliyaah 70 mardon kay saath,
8safatiyaah kay khaandaan ka zabadiyaah bin meekaael 80 mardon kay saath,
9yoaab kay khaandaan ka abadiyaah bin yaheeel 218 mardon kay saath,
10baanee kay khaandaan ka saloomeet bin yoosifayaah 160 mardon kay saath,
11babee kay khaandaan ka zakariyaah bin babee 28 mardon kay saath,
12azjaad kay khaandaan ka yoohanaan bin haqqaataan 110 mardon kay saath,
13adooniqaam kay khaandaan kay aakhiree log ileefalat, yaeeel aur samaayaah 60 mardon kay saath,
14bigvaee ka khaandaan ka ootee aur zabood 70 mardon kay saath.
15main yaanee azra nay mazkoora logon ko us naher kay paas jama kiya jo ahaava kee taraf bahetee hai. vahaan ham khaimay laga kar teen din thaheray rahay. is dauraan mujhay pata chala ki go aam log aur imaam a gaay hain lekin ek bhee laavee haazir naheen hai. 16chunaanchay main nay ileeazar, areeel, samaayaah, ilnaatan, yareeb, ilnaatan, naatan, zakariyaah aur masullaam ko apnay paas bula liya. yah sab khaandaanee sarparast thay jabki shareeat kay do ustaad banaam yooyaareeb aur ilnaatan bhee saath thay. 17main nay unhen laaviyon kee aabaadee kaasifiyaah kay buzurg iddoo kay paas bhej kar vah kuchh bataaya jo unhen iddoo, us kay bhaaiyon aur rabb kay ghar kay khidmatgaaron ko bataana tha taaki vah hamaaray khuda kay ghar kay liyay khidmatgaar bhejen.
18allaah ka shafeeq haath ham par tha, is liyay unhon nay hamen mahelee bin laavee bin israaeel kay khaandaan ka samajhdaar aadmee saribiyaah bhej diya. saribiyaah apnay beton aur bhaaiyon kay saath pahuncha. kul 18 mard thay. 19in kay ilaava miraaree kay khaandaan kay hasabiyaah aur yasaayaah ko bhee un kay beton aur bhaaiyon kay saath hamaaray paas bheja gaya. kul 20 mard thay. 20un kay saath rabb kay ghar kay 220 khidmatgaar thay. in kay tamaam naam nasbanaamay men darj thay. daaood aur us kay mulaazimon nay un kay baapdaada ko laaviyon kee khidmat karnay kee zimmaadaaree dee thee.
yarooshalam kay liyay ravaangee kee tayyaariyaan
21vaheen ahaava kee naher kay paas hee main nay elaan kiya ki ham sab roza rakh kar apnay aap ko apnay khuda kay saamnay past karen aur dua karen ki vah hamen hamaaray baal-bachchon aur saamaan kay saath salaamatee say yarooshalam pahunchaaay. 22kyoonki hamaaray saath faujee aur ghudsavaar naheen thay jo hamen raastay men daakuon say mahfooz rakhtay. baat yah thee ki main shahenshaah say yah maangnay say sharm mahsoos kar raha tha, kyoonki ham nay usay bataaya tha, “hamaaray khuda ka shafeeq haath har ek par thaherta hai jo us ka taalib raheta hai. lekin jo bhee usay tark karay us par us ka sakht ghazab naazil hota hai.” 23chunaanchay ham nay roza rakh kar apnay khuda say iltimaas kee ki vah hamaaree hifaazat karay, aur us nay hamaaree sunee.
24phir main nay imaamon kay 12 raahanumaaon ko chun liya, neez saribiyaah, hasabiyaah aur mazeed 10 laaviyon ko. 25un kee maujoodgee men main nay sona-chaandee aur baaqee tamaam saamaan tol liya jo shahenshaah, us kay musheeron aur afsaron aur vahaan kay tamaam israaeeliyon nay hamaaray khuda kay ghar kay liyay ata kiya tha.
26main nay tol kar zail ka saamaan un kay havaalay kar diya : taqreeban 22,000 kilograam chaandee, chaandee ka kuchh saamaan jis ka kul vazan takreen 3,400 kilograam tha, 3,400 kilograam sona, 27sonay kay 20 piyaalay jin ka kul vazan taqreeban saadhay 8 kilograam tha, aur peetal kay do paalish kiay huay piyaalay jo sonay kay piyaalon jaisay qeemtee thay.
28main nay aadmiyon say kaha, “aap aur yah tamaam cheezen rabb kay liyay makhsoos hain. logon nay apnee khushee say yah sona-chaandee rabb aap kay baapdaada kay khuda kay liyay qurbaan kee hai. 29sab kuchh ehatiyaat say mahfooz rakhen, aur jab aap yarooshalam pahunchengay to isay rabb kay ghar kay khazaanay tak pahuncha kar raahanuma imaamon, laaviyon aur khaandaanee sarparaston kee maujoodgee men dubaara tolna.”
30phir imaamon aur laaviyon nay sona-chaandee aur baaqee saamaan lay kar usay yarooshalam men hamaaray khuda kay ghar men pahunchaanay kay liyay mahfooz rakha.
yarooshalam tak safar
31ham pahelay maheenay kay 12ven din [a] 19 aprail. ahaava naher say yarooshalam kay liyay ravaana huay. allaah ka shafeeq haath ham par tha, aur us nay hamen raastay men dushmanon aur daakuon say mahfooz rakha. 32ham yarooshalam pahunchay to pahelay teen din aaraam kiya. 33chauthay din ham nay apnay khuda kay ghar men sona-chaandee aur baaqee makhsoos saamaan tol kar imaam mareemot bin ooriyaah kay havaalay kar diya. us vaqt ileeazar bin feenhaas aur do laavee banaam yoozbad bin yashooa aur nauadiyaah bin binnooee us kay saath thay. 34har cheez ginee aur tolee gaee, phir us ka poora vazan faherist men darj kiya gaya.
35is kay baad jilaavatanee say vaapas aaay huay tamaam logon nay israaeel kay khuda ko bhasm honay vaalee qurbaaniyaan pesh keen. is naatay say unhon nay pooray israaeel kay liyay 12 bail, 96 mendhay, bhed kay 77 bachchay aur gunaah kee qurbaanee kay 12 bakray qurbaan kiay.
36musaafiron nay darya-ay-furaat kay maghribee ilaaqay kay gavarnaron aur haakimon ko shahenshaah kee hidaayaat pahunchaaeen. in ko padh kar unhon nay israaeelee qaum aur allaah kay ghar kee himaayat kee.