Azra 9

ghairyahoodee beeviyon par afsos

^1-2 kuchh der baad qaum kay raahanuma meray paas aaay aur kahenay lagay, “qaum kay aam logon, imaamon aur laaviyon nay apnay aap ko mulk kee deegar qaumon say alag naheen rakha, go yah ghinaunay rasm-o-rivaaj kay pairokaar hain. un kee aurton say shaadee karkay unhon nay apnay beton kee bhee shaadee un kee betiyon say karaaee hai. yoon allaah kee muqaddas qaum kan’aaniyon, hittiyon, farizziyon, yaboosiyon, ammoniyon, moaabiyon, misriyon aur amoriyon say aalooda ho gaee hai. aur buzurgon aur afsaron nay is bevafaaee men pahel kee hai!”

³yah sun kar main nay ranjeeda ho kar apnay kapdon ko phaad liya aur sar aur daadhee kay baal noch noch kar nangay farsh par baith gaya. ⁴vahaan main shaam kee qurbaanee tak behiss-o-harkat baitha raha. itnay men bahut say log meray ird-gird jama ho gaay. vah jilaavatanee say vaapas aaay huay logon kee bevafaaee kay baais tharathra rahay thay, kyoonki vah israaeel kay khuda kay javaab say nihaayat khaufzada thay. ⁵shaam kee qurbaanee kay vaqt main vahaan say uth khada hua jahaan main tauba kee haalat men baitha hua tha. vahee phatay huay kapday pahenay huay main ghutnay tek kar jhuk gaya aur apnay haathon ko aasmaan kee taraf uthaaay huay rabb apnay khuda say dua karnay laga,

⁶“ai meray khuda, main nihaayat sharminda hoon. apna munh teree taraf uthaanay kee mujh men jur’at naheen rahee. kyoonki hamaaray gunaahon ka itna bada dher lag gaya hai ki vah ham say ooncha hai, balki hamaara qusoor aasmaan tak pahunch gaya hai. ⁷hamaaray baapdaada kay zamaanay say lay kar aaj tak hamaara qusoor sanjeeda raha hai. isee vajah say ham baar baar pardesee hukmaraanon kay qabzay men aaay hain jinhon nay hamen aur hamaaray baadshaahon aur imaamon ko qatl kiya, giriftaar kiya, loot liya aur hamaaree behuramtee kee. balki aaj tak hamaaree haalat yahee rahee hai.

⁸lekin is vaqt rabb hamaaray khuda nay thodee der kay liyay ham par meharbaanee kee hai. hamaaree qaum kay bachay khachay hissay ko us nay rihaaee day kar apnay muqaddas maqaam par mahfooz rakha hai. yoon hamaaray khuda nay hamaaree aankhon men dubaara chamak paida kee aur hamen kuchh sukoon muhayya kiya hai, go ham ab tak ghulaamee men hain. ⁹beshak ham ghulaam hain, to bhee allaah nay hamen tark naheen kiya balki faars kay baadshaah ko ham par meharbaanee karnay kee tahereek dee hai. us nay hamen az sar-ay-nau zindagee ata kee hai taaki ham apnay khuda ka ghar dubaara taameer aur us kay khandaraat bahaal kar saken. allaah nay hamen yahoodaah aur yarooshalam men ek mahfooz chaardeevaaree say gher rakha hai.

¹⁰lekin ai hamaaray khuda, ab ham kya kahen? apnee in harkaton kay baad ham kya javaab den? ham nay teray un ahkaam ko nazar’andaaz kiya hai ¹¹jo too nay apnay khaadimon yaanee nabiyon kee maarifat diay thay.

too nay farmaaya, ‘jis mulk men tum daakhil ho rahay ho taaki us par qabza karo vah us men rahenay vaalee qaumon kay ghinaunay rasm-o-rivaaj kay sabab say naapaak hai. mulk ek siray say doosray siray tak un kee naapaakee say bhar gaya hai. ¹²lihaaza apnee betiyon kee un kay beton kay saath shaadee mat karvaana, na apnay beton ka un kee betiyon kay saath rishta baandhna. kuchh na karo jis say un kee salaamatee aur kaamyaabee badhtee jaaay. tab hee tum taaqatvar ho kar mulk kee achchhee paidaavaar khaaogay, aur tumhaaree aulaad hamesha tak mulk kee achchhee cheezen viraasat men paatee rahegee.’

¹³ab ham apnee shareer harkaton aur baday qusoor kee saza bhugat rahay hain, go ai allaah, too nay hamen itnee sakht saza naheen dee jitnee hamen milnee chaahiay thee. too nay hamaara yah bacha khacha hissa zinda chhoda hai. ¹⁴to kya yah theek hai ki ham teray ahkaam kee khilaafvarzee karkay aisee qaumon say rishta baandhen jo is qism kee ghinaunee harkaten kartee hain? hargiz naheen! kya is ka yah nateeja naheen niklega ki tera ghazab ham par naazil ho kar sab kuchh tabaah kar dega aur yah bacha khacha hissa bhee khatm ho jaaega? ¹⁵ai rabb israaeel kay khuda, too hee aadil hai. aaj ham bachay huay hissay kee haisiyat say teray huzoor khaday hain. ham qusoorvaar hain aur teray saamnay qaaim naheen rah saktay.”