Paidaaish 5

aadam say nooh tak ka nasabnaamaa

¹zail men aadam ka nasabnaama darj hai.

jab allaah nay insaan ko khalaq kiya to us nay usay apnee soorat par banaaya. ²us nay unhen mard aur aurat paida kiya. aur jis din us nay unhen khalaq kiya us nay unhen barkat day kar un ka naam aadam yaanee insaan rakha.

³aadam kee umr 130 saal thee jab us ka beta set paida hua. set soorat kay lihaaz say apnay baap kee maanind tha, vah us say mushaabahet rakhta tha. ⁴set kee paidaaish kay baad aadam mazeed 800 saal zinda raha. us kay aur betay-betiyaan bhee paida huay. ⁵vah 930 saal kee umr men faut hua.

⁶set 105 saal ka tha jab us ka beta anoos paida hua. ⁷is kay baad vah mazeed 807 saal zinda raha. us kay aur betay-betiyaan bhee paida huay. ⁸vah 912 saal kee umr men faut hua.

⁹anoos 90 baras ka tha jab us ka beta qeenaan paida hua. ¹⁰is kay baad vah mazeed 815 saal zinda raha. us kay aur betay-betiyaan bhee paida huay. ¹¹vah 905 saal kee umr men faut hua.

¹²qeenaan 70 saal ka tha jab us ka beta mahelal-el paida hua. ¹³is kay baad vah mazeed 840 saal zinda raha. us kay aur betay-betiyaan bhee paida huay. ¹⁴vah 910 saal kee umr men faut hua.

¹⁵mahelal-el 65 saal ka tha jab us ka beta yaarid paida hua. ¹⁶is kay baad vah mazeed 830 saal zinda raha. us kay aur betay-betiyaan bhee paida huay. ¹⁷vah 895 saal kee umr men faut hua.

¹⁸yaarid 162 saal ka tha jab us ka beta hanook paida hua. ¹⁹is kay baad vah mazeed 800 saal zinda raha. us kay aur betay-betiyaan bhee paida huay. ²⁰vah 962 saal kee umr men faut hua.

²¹hanook 65 saal ka tha jab us ka beta matoosilah paida hua. ²²is kay baad vah mazeed 300 saal allaah kay saath chalta raha. us kay aur betay-betiyaan bhee paida huay. ²³vah kul 365 saal duniya men raha. ²⁴hanook allaah kay saath saath chalta tha. 365 saal kee umr men vah ghaaib hua, kyoonki allaah nay usay utha liya.

²⁵matoosilah 187 saal ka tha jab us ka beta lamak paida hua. ²⁶vah mazeed 782 saal zinda raha. us kay aur betay aur betiyaan bhee paida huay. ²⁷vah 969 saal kee umr men faut hua.

²⁸lamak 182 saal ka tha jab us ka beta paida hua. ²⁹us nay us ka naam nooh yaanee tasallee rakha, kyoonki us nay us kay baaray men kaha, “hamaara kheteebaadee ka kaam nihaayat takleefdih hai, is liyay ki allaah nay zameen par laanat bhejee hai. lekin ab ham betay kee maarifat tasallee paaengay.” ³⁰is kay baad vah mazeed 595 saal zinda raha. us kay aur betay-betiyaan bhee paida huay. ³¹vah 777 saal kee umr men faut hua.

³²nooh 500 saal ka tha jab us kay betay sim, haam aur yaafat paida huay.