Hosea 11

bevafaaee kay baavujood allaah kee shafqat

¹rabb farmaata hai, “israaeel abhee ladka tha jab main nay usay piyaar kiya, jab main nay apnay betay ko misr say bulaaya. ²lekin baad men jitna hee main unhen bulaata raha utna hee vah mujh say door hotay gaay. vah baal devtaaon kay liyay jaanvar chadhaanay, buton kay liyay bakhoor jalaanay lagay. ³main nay khud israaeel ko chalnay kee tarbiyat dee, baar baar unhen god men utha kar liyay phira. lekin vah na samjhay ki main hee unhen shifa denay vaala hoon. ⁴main unhen khainchta raha, lekin aisay rasson say naheen jo insaan bardaasht na kar sakay balki shafqat bharay rasson say. main nay un kay galay par ka jooa halka kar diya aur narmee say unhen khuraak khilaaee.

⁵kya unhen mulk-ay-misr vaapas naheen jaana padega? balki asoor hee un ka baadshaah banega, is liyay ki vah meray paas vaapas aanay kay liyay tayyaar naheen. ⁶talvaar un kay shaheron men ghoom ghoom kar ghaibdaanon ko halaak karegee aur logon ko un kay ghalat mashvaron kay sabab say khaatee jaaegee. ⁷lekin meree qaum mujhay tark karnay par tulee huee hai. jab usay oopar allaah kee taraf dekhnay ko kaha jaaay to us men say koee bhee us taraf rujoo naheen karta.

⁸ai israaeel, main tujhay kis tarah chhod sakta hoon? main tujhay kis tarah dushman kay havaalay kar sakta, kis tarah adma kee tarah doosron kay qabzay men chhod sakta, kis tarah zaboeem kee tarah tabaah kar sakta hoon? mera iraada saraasar badal gaya hai, main tujh par shafqat karnay kay liyay bechain hoon. ⁹na main apna sakht ghazab naazil karoonga, na dubaara israaeel ko barbaad karoonga. kyoonki main insaan naheen balki khuda hoon, vah quddoos jo teray darmiyaan sukoonat karta hai. main ghazab men naheen aaoonga. ¹⁰us vaqt vah rabb kay peechhay hee chalengay. tab vah sherbabar kee tarah dahaadega. aur jab dahaadega to us kay farzand maghrib say laraztay huay vaapas aaengay. ¹¹vah parindon kee tarah phadphadaatay huay misr say aaengay, thartharaatay kabootaron kee tarah asoor say lautengay. phir main unhen un kay gharon men basa doonga. yah mera, rabb ka farmaan hai.

¹²israaeel nay mujhay jhoot say gher liya, fareb say mera muhaasara kar liya hai. lekin yahoodaah bhee mazbootee say allaah kay saath naheen hai balki aavaara phirta hai, haalaanki quddoos khuda vafaadaar hai.”