Hosea 13

allaah kee taraf say israaeel kee adaalat

¹pahelay jab israaeel nay baat kee to log kaamp uthay, kyoonki mulk-ay-israaeel men vah sarfaraaz tha. lekin phir vah baal kee butparastee men mulavvas ho kar halaak hua. ²ab vah apnay gunaahon men bahut izaafa kar rahay hain. vah apnee chaandee lay kar mahaarat say but dhaal letay hain. phir dastakaaron kay haath say banay in buton kay baaray men kaha jaata hai, “jo bachhday kay buton ko choomna chaahay vah kisee insaan ko qurbaan karay!” ³is liyay vah subah-saveray kee dhund jaisay aarizee aur dhoop men jald hee khatm honay vaalee os kee maanind hongay. vah gaahatay vaqt gandum say alag honay vaalay bhoosay kee maanind hava men ud jaaengay, ghar men say nikalnay vaalay dhuen kee tarah zaaay ho jaaengay.

⁴“lekin main, rabb tujhay misr say nikaaltay vaqt say lay kar aaj tak tera khuda hoon. tujhay meray siva kisee aur ko khuda naheen jaanna hai. meray siva aur koee najaatadihanda naheen hai. ⁵registaan men main nay teree dekh-bhaal kee, vahaan jahaan taptee garmee thee. ⁶vahaan unhen achchhee khuraak milee. lekin jab vah jee bhar kar kha sakay aur ser huay to maghroor ho kar mujhay bhool gaay. ⁷yah dekh kar main un kay liyay sherbabar ban gaya hoon. ab main cheetay kee tarah raastay kay kinaaray un kee taak men baithoonga. ⁸us reechhnee kee tarah jis kay bachchon ko chheen liya gaya ho main un par jhapatta maar kar un kee antadiyon ko phaad nikaaloonga. main unhen sherbabar kee tarah hadap kar loonga, aur janglee jaanvar unhen tukday tukday kar dengay.

⁹ai israaeel, too is liyay tabaah ho gaya hai ki too meray khilaaf hai, us kay khilaaf jo teree madad kar sakta hai. ¹⁰ab tera baadshaah kahaan hai ki vah teray tamaam shaheron men a kar tujhay chhutkaara day? ab teray raahanuma kidhar hain jin say too nay kaha tha, ‘mujhay baadshaah aur raahanuma day day.’ ¹¹main nay ghussay men tujhay baadshaah day diya aur ghussay men usay tujh say chheen bhee liya.

¹²israaeel ka qusoor lapet kar godaam men rakha gaya hai, us kay gunaah hisaab-kitaab kay liyay mahfooz rakhay gaay hain. ¹³dard-ay-zah shuroo ho gaya hai, lekin vah naasamajh bachcha hai. vah maan kay pet say nikalna naheen chaahata.

¹⁴main fidya day kar unhen paataal say kyoon riha karoon? main unhen maut kee girift say kyoon chhudaaoon? ai maut, teray kaantay kahaan rahay? ai paataal, tera dank kahaan raha? usay kaam men la, kyoonki main taras naheen khaaoonga. ¹⁵khwaah vah apnay bhaaiyon kay darmiyaan phalta phoolta kyoon na ho to bhee rabb kee taraf say mashriqee loo us par chalegee. aur jab registaan say aaegee to israaeel kay kuen aur chashmay khushk ho jaaengay. har khazaana, har qeemtee cheez loot ka maal ban jaaegee. ¹⁶saamriya kay baashindon ko un kay qusoor kee saza bhugatnee padegee, kyoonki vah apnay khuda say sarkash ho gaay hain. dushman unhen talvaar say maar kar un kay bachchon ko zameen par patakh dega aur un kee haamila aurton kay pet cheer daalega.”