Hosea 14

rabb kay paas vaapas aao!

¹ai israaeel, tauba karkay rabb apnay khuda kay paas vaapas a! kyoonki tera qusoor teray zavaal ka sabab ban gaya hai. ²apnay gunaahon ka iqraar kartay huay rabb kay paas vaapas aao. us say kaho, “hamaaray tamaam gunaahon ko muaaf karkay hamen meharbaanee say qabool farma taaki ham apnay honton say teree taareef karkay tujhay munaasib qurbaanee ada kar saken. ³asoor hamen na bachaaay. aainda na ham ghodon par savaar ho jaaengay, na kahengay ki hamaaray haathon kee cheezen hamaara khuda hain. kyoonki too hee yateem par rahem karta hai.”

⁴tab rabb faramaaega, “main un kee bevafaaee kay asraat khatm karkay unhen shifa doonga, haan main unhen khulay dil say piyaar karoonga, kyoonki mera un par ghazab thanda ho gaya hai. ⁵israaeel kay liyay main shabnam kee maanind hoonga. tab vah sosan kee maanind phool nikaalega, lubnaan kay deodaar kay darakht kee tarah jad pakdega, ⁶us kee komplen phoot nikalengee, aur shaakhen ban kar phailtee jaaengee. us kee shaan zaitoon kay darakht kee maanind hogee, us kee khushboo lubnaan kay deodaar kay darakht kee khushboo kee tarah phail jaaegee.

⁷log dubaara us kay saay men ja basengay. vahaan vah anaaj kee tarah phalen phoolengay, angoor kay say phool nikaalengay. doosray un kee yoon taareef karengay jis tarah lubnaan kee umda mai kee. ⁸tab israaeel kahega, ‘mera buton say kya vaasta?’ main hee teree sun kar teree dekh-bhaal karoonga. main jooneepar ka saayaadaar darakht hoon, aur too mujh say hee phal paaega.”

⁹kaun daanishmand hai? vah samajh lay. kaun saahib-ay-fahem hai? vah matlab jaan lay. kyoonki rabb kee raahen durust hain. raastbaaz un par chaltay rahengay, lekin sarkash un par chaltay vaqt thokar kha kar gir jaaengay.