Hosea 3

jumar kee tarah israaeel ko vaapas khareeda jaaegaa

¹rabb mujh say hamkalaam hua, “ja, apnee beevee ko dubaara piyaar kar, haalaanki us ka aashiq hai jis say us nay zina kiya hai. usay yoon piyaar kar jis tarah rabb israaeeliyon ko piyaar karta hai, haalaanki un ka rukh deegar maaboodon kee taraf hai aur unhen un hee kee angoor kee tikkiyaan pasand hain.”

²tab main nay chaandee kay 15 sikkay aur jau kay 195 kilograam day kar usay vaapas khareed liya. ³main nay us say kaha, “ab tujhay baday arsay tak meray saath rahena hai. itnay men na zina kar, na kisee aadmee say sohbat rakh. main bhee badee der tak tujh say hambistar naheen hoonga.”

⁴israaeel ka yahee haal hoga. badee der tak na un ka baadshaah hoga, na raahanuma, na qurbaanee ka intizaam, na yaadgaar patthar, na imaam ka baalaaposh. un kay paas but tak bhee naheen hongay. ⁵is kay baad israaeelee vaapas a kar rabb apnay khuda aur daaood apnay baadshaah ko talaash karengay. aakhiree dinon men vah laraztay huay rabb aur us kee bhalaaee kee taraf rujoo karengay.